ព័ត៌មានអន្ដរជាតិ

បេសកជនអាស៊ានពិសេសសម្រាប់មីយ៉ាន់ម៉ាស្នើបទឈប់បាញ់គ្នា៤ខែ

បានផុស

៣ years មុន

នៅ

ថ្ងៃចន្ទ ៦ កញ្ញា ២០២១

ដោយ

បេសកជនពិសេសរបស់អាស៊ានសម្រាប់ប្រទេសមីយ៉ាន់ម៉ាបាននិយាយថា លោកបានអំពាវនាវឲ្យមានបទឈប់បាញ់គ្នារយៈពេល៤ខែពីភាគីពាក់ព័ន្ធទាំងអស់នៅក្នុងជម្លោះដើម្បីអាចមានលទ្ធភាពដឹកជញ្ជូនជំនួយមនុស្សធម៌លើកដំបូងចូលប្រទេសនេះឲ្យបានរលូននៅពាក់កណ្តាលខែកញ្ញា។

និយាយក្នុងបទសម្ភាសផ្តាច់មុខជាមួយសារព័ត៌មាន Kyodo News កាលពីថ្ងៃសៅរ៍ លោក Erywan Yusof អនុរដ្ឋមន្ត្រីក្រសួងការបរទេសព្រុយណេបាននិយាយថា លោកបានស្នើបទឈប់បាញ់គ្នារហូតដល់ចុងឆ្នាំនេះនៅក្នុងសន្នីសីទវីដេអូជាមួយរដ្ឋមន្ត្រីក្រសួងការបរទេសដែលយោធាមីយ៉ាន់បានតែងតាំងលោក Wunna Maung Lwin កាលពីថ្ងៃអង្គារ៍មុន និងបន្ថែមថា យោធាបានទទួលយក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកមានប្រសាសន៍ថា ៖«នេះមិនមែនជាបទឈប់បាញ់គ្នានយោបាយទេ។ បទឈប់បាញ់គ្នានេះគឺដើម្បីធានាសុវត្ថិភាព និងសន្តិសុខនៃការងារមនុស្សធម៌» ពីព្រោះបុគ្គលិកមនុស្សធម៌ត្រូវចេញក្រៅ និងចែកអំណោយដល់ប្រជាជនដោយសុវត្ថិភាព»។

«ពួកគេមិនបានជំទាស់នឹងអ្វីដែលខ្ញុំនិយាយទេពាក់ព័ន្ធនឹងបទឈប់បាញ់គ្នានេះ»។ បេសកជនពិសេសរូបនេះមានប្រសាសន៍ និងបន្ថែមថា លោកក៏បានឆ្លងសំណើរដោយប្រយោលរបស់លោកទៅភាគីដែលប្រឆាំងនឹងការគ្រប់គ្រងរបស់យោធា បន្ទាប់ពីរដ្ឋប្រហារកាលពីខែកុម្ភៈដែលផ្តួលរំលំរដ្ឋាភិបាលជាប់ឆ្នោត។

«ខ្ញុំសង្ឃឹមថា សាររបស់ខ្ញុំបានទៅដល់ពួកគេ»។ លោកបញ្ជាក់បន្ថែម។

លោកបន្តថា បន្ទាប់មកនឹងនាំយកវ៉ាក់សាំងចូលទៅមីយ៉ាន់ម៉ា។ ខណៈពេលការចរចារបស់លោកជាមួយយោធាមីយ៉ាន់ម៉ាដើម្បីបំពេញអាណត្តិរបស់លោកកំពុងបន្ត លោកសង្ឃឹមនឹងធ្វើដំណើរទស្សនកិច្ចទៅកាន់មីយ៉ាន់ម៉ាខែក្រោយ និងធ្វើឲ្យវាក្លាយជាដំណើរទស្សនកិច្ចសំខាន់ដែលអាចឲ្យលោកជួបគ្រប់ភាគីពាក់ព័ន្ធដែលមានកង្វល់។

បេសកជនបានបញ្ជាក់ថា ៖«ខ្ញុំចង់មានរូបភាពមួយយ៉ាងច្បាស់លាស់ពីអ្វីដែលខ្ញុំត្រូវបានអនុញ្ញាតឲ្យធ្វើ និងអ្វីដែលខ្ញុំមិនត្រូវបានអនុញ្ញាតឲ្យធ្វើ ដូច្នេះខ្ញុំអាចធ្វើការសម្រេចចិត្តថាតើដំណើរទស្សនិច្ចនឹងបន្តដំណើរការ ឬអត់»៕

ប្រែសម្រួល៖ វីរបុត្រ
ប្រភព៖ Kyodo News

Related Topics:ប្រទេសមីយ៉ាន់ម៉ា