ព័ត៌មានអន្ដរជាតិ

FBI បង្ហាញ ឃាតកម្មនៅអាមេរិកកើនឡើងជិត៣០%ក្នុងឆ្នាំ២០២០

បានផុស

២ years មុន

នៅ

ថ្ងៃអង្គារ ២៨ កញ្ញា ២០២១

ដោយ

បទល្មើសឃាតកម្ម និងឃាតកម្មដែលមិនធ្វេសប្រហែសបានកើនឡើង២៩.៤%កាលពីឆ្នាំ២០២០នៅសហរដ្ឋអាមេរិក ខ្ពស់ជាងឆ្នាំ២០១៩។ នេះបើយោងតាមការិយាល័យស៊ើបអង្កេតសហព័ន្ធ (FBI)។

FBI បាននិយាយក្នុងរបាយការណ៍ឧក្រិដ្ឋកម្មប្រចាំឆ្នាំរបស់ខ្លួនកាលពីថ្ងៃចន្ទថា ចំនួនឃាតកម្មនៅសហរដ្ឋអាមេរិកបានកើនឡើងជិត៣០%នៅឆ្នាំ២០២០ ហើយឧក្រិដ្ឋសរុបដោយហិង្សាបានកើនឡើងជាលើកដំបូងក្នុងរយៈពេល៤ឆ្នាំចុងក្រោយនេះ។ អ្នកជំនាញបានសន្មត់ថា វិបត្តិកូវីដ-១៩ជាផ្នែកមួយធ្វើឲ្យកើនឡើងឧក្រិដ្ឋកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សាយរបស់កាសែត New York Times និង Washington Post ថា បទល្មើសឃាតកម្ម និងឃាតកម្មដែលមិនធ្វេសប្រហែសបានកើនឡើង២៩.៤% នៅក្នុងឆ្នាំ២០២០ខ្ពស់ជាងឆ្នាំ២០១៩ ដែលនេះជាសញ្ញាកើនឡើងប្រចាំឆ្នាំខ្ពស់បំផុតចាប់តាំងពីកំណត់ត្រាជាតិត្រូវបានធ្វើឡើងចាប់តាំងពីទសវត្សរ៍ឆ្នាំ១៩៦០។

FBI បាននិយាយថា ឩក្រិដ្ឋហិង្សាទូទៅបានកើនឡើង៥.៦%ស្មើនឹងជិត១.៣លានឧបទ្ទវហេតុ ទោះជាយ៉ាងណា ឧក្រិដ្ឋកម្មពាក់ព័ន្ធនឹងទ្រព្យសម្បត្តិបានធ្លាក់ចុះ៧.៨%ស្មើនឹងជិត ៦.៥លានឧបទ្ទវហេតុ ដែលនេះជាសញ្ញា១៨ឆ្នាំជាប់ៗគ្នាដែលឧក្រិដ្ឋកម្មទ្រព្យសម្បត្តិបានធ្លាក់ចុះ។

កម្មវិធីរបាយការណ៍ឧក្រិដ្ឋកម្ម (UCR) របស់ការិយាល័យស៊ើបអង្កេតសហព័ន្ធបានប្រមូលទិន្នន័យពីរាយការណ៍របស់ភ្នាក់ងារអនុវត្តច្បាប់ទូទាំងប្រទេស។

កាសែត Washington Post បានផ្សាយថា ភាគរយអំពើឃាតកម្មកាន់តែច្រើនគឺបណ្តាលមកពីហិង្សាដោយអាវុធរហូតដល់៧៦%ក្នុងឆ្នាំ២០២០ ប្រៀបធៀបនឹង៧៣%ក្នុងឆ្នាំ២០១៩។ ក្នុងនោះទីក្រុង Houston បានកើនឡើង៥៥%នៅក្នុងអំពើឃាតកម្មដោយអាវុធ បានឡើងដល់៣៤៣ករណីនៅឆ្នាំ២០២០ ប្រៀបធៀបនឹង២២១ករណីនៅឆ្នាំ២០១៩។

លោកប្រធានាធិបតីសហរដ្ឋអាមេរិក ចូ បៃដិន បានជំរុញច្បាប់ប្រឆាំងហិង្សាដោយអាវុធ ជំរុញឲ្យមានកិច្ចសហការកាន់តែខ្លាំងថែមទៀតរវាងអាជ្ញាធរមូលដ្ឋាន និងមេដឹកនាំសហព័ន្ធ៕

ប្រែសម្រួល៖ វីរបុត្រ
ប្រភព៖ reuters