ព័ត៌មានអន្ដរជាតិ

គណបក្សរបស់បព្វជិត Al-Sadr ឈ្នះការបោះឆ្នោតសភាអ៉ីរ៉ាក់

បានផុស

២ years មុន

នៅ

ថ្ងៃអង្គារ ១២ តុលា ២០២១

ដោយ

គណបក្សរបស់បព្វជិត Moqtada al-Sadr ទទួលបានសំឡេងឆ្នោតច្រើនជាងគេនៅក្នុងការបោះឆ្នោតសភាអ៉ីរ៉ាក់។ នេះបើយោងតាមលទ្ធផលបឋមបានបង្ហាញកាលពីថ្ងៃចន្ទម្សិលមិញ។

លទ្ធផលបឋមបានបង្ហាញថា គណបក្សបព្វជិតមូស្លីមនីកាយស៊ីអ៉ិត (Shiite Muslim) ទទួលបានជាង៧០អាសនៈនៅក្នុងសភាដែលមាន៣២៩អាសនៈ។ គណបក្សរបស់លោក Al-Sadr បាននិយាយថា ខ្លួនទទួលបាន៧៣អាសនៈដែលបានកើន៥៤អាសនៈ និងផ្តល់ឲ្យគណបក្សនេះមានឥទ្ធិពលក្នុងការបង្កើតរដ្ឋាភិបាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីភ្នាក់ងារសារព័ត៌មាន Reuters បានផ្សាយថា យោងតាមលទ្ធផលបឋម អតីតនាយករដ្ឋមន្ត្រី Nouri al-Maliki ទំនងជាទទួលបានសំឡេងច្រើនបំផុតលំដាប់ទី២ក្នុងចំណោមគណបក្សនិកាយស៊ីអ៉ិត។

ក្រុមនិកាយស៊ីអ៉ិតលេចធ្លោខ្លាំងនៅក្នុងនយោបាយប្រទេសអ៉ីរ៉ាក់ បន្ទាប់ពីដួលរលំរបស់មេដឹកនាំនិកាយស៊ុននីលោក Saddam Hussein ក្នុងឆ្នាំ២០០៣។

បើយោងតាមគណៈកម្មការរៀបចំការបោះឆ្នោតអ៉ីរ៉ាក់បានឲ្យដឹងថា ការបោះឆ្នោតកាលពីថ្ងៃអាទិត្យកន្លងទៅនេះមិនសូវដំណើរការល្អប្រសើរឡើយ ដោយសារអ្នកទៅបោះឆ្នោតទាបបំផុតគឺបានត្រឹមតែ៤១%ប៉ុណ្ណោះ។ ប្រការនេះគឺទាបជាងកំណត់ត្រាកាលពីឆ្នាំ២០១៨ដែលមានអ្នកទៅបោះឆ្នោត៤៤.៥% គិតគ្រប់សម័យកាលបោះឆ្នោត។

ការបោះឆ្នោតត្រូវបានធ្វើឡើងមុនពេលកាលកំណត់ច្រើនខែដើម្បីឆ្លើយតបនឹងការតវ៉ាដែលដឹកនាំដោយយុវជនប្រឆាំងនឹងអំពើពុករលួយ និងសេវាសាធារណៈមិនល្អ។ ការតវ៉ាបាននាំមនុស្សរាប់ពាន់នាក់ដើរតាមផ្លូវនៅចុងឆ្នាំ២០១៩ និងដើមឆ្នាំ២០២០ ខណៈក្រុមបាតុករបានអំពាវនាវឲ្យមានកំណែទម្រង់ និងការបោះឆ្នោតថ្មី។

ជាលទ្ធផលនៃការបង្ក្រាបរបស់ប៉ូលិសលើការតវ៉ាបានបណ្តាលឲ្យមនុស្សជិត៦០០នាក់បានស្លាប់។

អ្នកគាំទ្រលោក Moqtada al-Sadr អបអរជ័យជម្នះ

ការបោះឆ្នោតកាលពីថ្ងៃអាទិត្យធ្វើឡើងក្រោមច្បាប់ថ្មីដែលធ្វើឲ្យកាន់តែងាយស្រួលសម្រាប់ឯករាជ្យ និងកែទម្រង់បេក្ខភាពដែលត្រូវបានជ្រើសរើស ក្នុងងនោះរាប់ទាំងការបោះឆ្នោតថ្នាក់ស្រុក។ ទោះបីជាយ៉ាងណា គណបក្សដែលមានឥទ្ធិពលខ្លាំងនៅតែអាចទាក់ទាញអ្នកគាំទ្រស្ថិតក្រោមច្បាប់ថ្មី។

បែបណាក្តី ដោយគ្មានបក្សណាមួយឈ្នះអាសនៈភាគច្រើននៅរដ្ឋសភា ការចរចាដើម្បីជ្រើសរើសនាយករដ្ឋមន្ត្រីត្រូវធ្វើដើម្បីដឹកនាំរដ្ឋាភិបាល ហើយត្រូវគេរំពឹងថា នឹងចំណាយពេលច្រើនសប្តាហ៍ ឬខែ៕

ប្រែសម្រួល៖ វីរបុត្រ
ប្រភព៖ reuters

Related Topics:ប្រទេសអ៊ីរ៉ាក់