អ្នកចាក់វ៉ាក់សាំងរបស់ ចិន កុំបារម្ភមិនបង្កហានិភ័យជំងឺស្ទះសរសៃឈាមក្នុងខួរក្បាល ឬដុំកំណកឈាមឡើយ

យោងតាមសេចក្តីថ្លែងការណ៍ពីក្រុមហ៊ុនជីវសាស្ត្រជាតិចិន (CNBG) បានឲ្យដឹងថា វ៉ាក់សាំងការពារជំងឺកូវីដ ១៩ Sinopharm មិនបង្កហានិភ័យនៃជំងឺស្ទះសរសៃឈាមក្នុងខួរក្បាល ឬដុំកំណកឈាម ចំពោះអ្នកចាក់ឡើយ ។

ដោយដកស្រង់ការសិក្សាដែលត្រូវបានបោះពុម្ភផ្សាយចេញពីទស្សនាវដ្ដី Science Bulletin, ក្រុមហ៊ុន CNBG បាននិយាយថា មិនមានករណីជំងឺស្ទះសរសៃឈាមក្នុងខួរក្បាល ឬដុំកំណកឈាមឡើយ ក្នុងអំឡុងពេលតាមដានក្រោយចាក់វ៉ាក់សាំង Sinopharm រយៈពេល ៨ សប្តាហ៍ ។

ការសិក្សានេះត្រូវបានធ្វើឡើងទៅលើបុគ្គលិកថែទាំសុខភាពចំនួន ៤០៦ នាក់ដែលបានទទួលការចាក់វ៉ាក់សាំងចំនួន ២ ដូសចន្លោះរយៈពេល ២១ ថ្ងៃនៅក្នុងមន្ទីរពេទ្យ Shanghai Ruijin និងមានរយៈពេលតាមដានយ៉ាងតិច ៨ សប្តាហ៍ ។

ទន្ទឹមនោះ ទិន្នន័យចុងក្រោយបង្អស់ពីប្រទេសអាហ្សង់ទីនបង្ហាញថា វ៉ាក់សាំង Sinopharm មានប្រសិទ្ធភាពការពារការស្លាប់ពីជំងឺកូវីដ ១៩ ចំនួន ៨៤ ភាគរយក្នុងចំណោមមនុស្សដែលមានអាយុ ៦០ ឆ្នាំឡើងទៅ ។

ក្រុមហ៊ុន CNBG បាននិយាយថា ចំណែកការដូសដំបូងអាចផ្តល់នូវប្រសិទ្ធភាពការពារការស្លាប់ ដល់ទៅ ៦១.៦ ភាគរយ សម្រាប់មនុស្សដែលមានអាយុចាប់ពី ៦០ ឆ្នាំឡើងទៅ ។

គួរបញ្ជាក់ថា វ៉ាក់សាំង Sinopharm ត្រូវបានអនុម័តឲ្យប្រើប្រាស់ជាបន្ទាន់នៅក្នុងប្រទេសចិន និងតំបន់ចំនួន ៩៨ ហើយត្រូវបានទទួលស្គាល់ដោយអង្គការអន្តរជាតិរួមទាំងអង្គការសុខភាពពិភពលោក (WHO) ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Global Times

ចុចអាន ៖ រថភ្លើងល្បឿនលឿនរត់ ១៦០ គីឡូម៉ែត្រក្នុងមួយម៉ោង លើផ្លូវដែក ចិន-ឡាវ មកដល់ទីក្រុងវៀងចន្ទន៍ហើយ