ព័ត៌មានអន្ដរជាតិ

ប្រព័ន្ធសុខាភិបាលប្រទេសប៉ាពួញហ្គីណេកំពុងដុនដាបដោយអ្នកជំងឺកូវីដ

បានផុស

២ years មុន

នៅ

ថ្ងៃចន្ទ ២៥ តុលា ២០២១

ដោយ

សហព័ន្ធកាកបាទក្រហម និងអឌ្ឍចន្ទក្រហមអន្តរជាតិនៅថ្ងៃចន្ទនេះបាននិយាយថា សកម្មភាពអន្តរជាតិរួមគ្នាត្រូវការធ្វើដើម្បីជួយដល់ប្រទេសប៉ាពួញហ្គីណេ ដោយសារកូវីដ-១៩កំពុងរាតត្បាតខ្លាំងធ្វើឲ្យប្រព័ន្ធសុខាភិបាលដុនដាប។

យោងតាមទិន្នន័យរបស់រដ្ឋាភិបាលចុងក្រោយបំផុតដែលរកបានបង្ហាញថា ករណីឆ្លងកូវីដ-១៩នៅប្រទេសកោះដែល មានប្រជាជន៩លាននាក់ថ្មីៗនេះបានកើនឡើងខ្លាំង ខណៈកាលពីថ្ងៃព្រហស្បតិ៍សប្តាហ៍មុនមានអ្នកឆ្លងថ្មី៣៨៥នាក់។

រហូតដល់ពេលនេះ ប្រទេសប៉ាពួញហ្គីណេ មានអ្នកឆ្លងសរុប២៦៧៣១នាក់ និង៣២៩នាក់ដែលត្រូវបានបញ្ជាក់ជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលកូវីដកំពុងរាតត្បាតខ្លាំង ការចាក់វ៉ាក់សាំងការពារមានដំណើរការយឹតខ្លាំងដោយទើបចាក់ពេញដូសបានតិចជាង១%ប៉ុណ្ណោះ។ នេះបើយោងតាមទិន្នន័យពិភពលោក បើទោះជារដ្ឋាភិបាលបានរំពឹងទុកជាច្រើនខែមកហើយថា ខ្លួននឹងចាក់វ៉ាក់សាំងដល់មនុស្សគ្រប់គ្នាឥឡូវនេះ។

កាកបាទក្រហមបាននិយាយថា ព័ត៌មានមិនពិត ការព្រួយបារម្ភពីសាធារណៈ និងបញ្ហាប្រឈមខាងដឹកជញ្ជូនបានធ្វើឲ្យយុទ្ធនាការណ៍ចាក់វ៉ាក់សាំងយឹត។

លោក Uvenama Rova អគ្គលេខាធិការកាកបាទក្រុមប្រទេសមួយនេះបាននិយាយក្នុងសេចក្តីប្រកាសមួយថា ៖«ការប្រឹងប្រែងបន្ទាន់ និងការឧបត្ថម្ភគាំទ្របន្ថែមគឺត្រូវការឲ្យជួយដល់ប្រព័ន្ធសុខាភិបាលដើម្បីទប់ស្កាត់ពីការបាត់បង់ជីវិតមនុស្សកាន់តែច្រើននាប៉ុន្មានថ្ងៃ និងសប្តាហ៍ខាងមុខ»។

យោងតាមមជ្ឈមណ្ឌលគ្រប់គ្រងកូវីដ-១៩ជាតិរបស់ប៉ាពួញហ្គីណេបង្ហាញថា មន្ទីរពេទ្យធំៗទាំងអស់នៅក្នុងប្រទេសកំពុងដុនដាបដោយករណីឆ្លងកំពុងកើនឡើង។

លោក Gary Nou ប្រធានក្រុមសម្រាប់ក្រុមវេជ្ជសាស្ត្រអាសន្ននៅមជ្ឈមណ្ឌលជាតិបាននិយាយថា ៖«នៅពេលនេះ ស្ទើរតែគ្រប់គ្រងលែងបានចំពោះអ្នកជំងឺដែលមានស្រាប់»។

ក្រុមគ្រូពេទ្យរបស់ប្រទេសអូស្ត្រាលីទើបបានទៅដល់ទីក្រុង Port Moresby ក្នុងខែនេះ ហើយចក្រភពអង់គ្លេសក៏បានបញ្ជូនក្រុមគ្រួសារពេទ្យទៅដែរ។

នៅពេលប្រទេសផ្សេងៗនៅតំបន់ប៉ាស៊ីហ្វិក ដូចជាកោះ Solomon និង Kiribati ក៏មានល្បឿនយឹតក្នុងការចាក់វ៉ាក់សាំង ប៉ុន្តែប្រទេសតូច Palau ចាក់បានដល់៩៩%នៃប្រជាជនរបស់ខ្លួនរាប់បញ្ចូលទាំងកុមារអាយុ១២ឆ្នាំគិតត្រឹមពាក់កណ្តាលខែតុលា ខណៈប្រទេសហ្វីជីចាក់បាន៩៦%៕

ប្រែសម្រួល៖ វីរបុត្រ
ប្រភព៖ Reuters