ព័ត៌មានអន្ដរជាតិ

វ៉ាក់សាំងផ្លូវការរាប់លានដូសទៅដល់អង់គ្លេស ប៉ុន្តែដើម្បីសុវត្ថិភាព កន្លែងរក្សាទុក គឺអាថ៌កំបាំងបំផុត

បានផុស

៣ years មុន

នៅ

ថ្ងៃសុក្រ ៤ ធ្នូ ២០២០

ដោយ

វ៉ាក់សាំងប្រឆាំងកូវីដ ១៩ Pfizer/BioNTech ផ្លូវការដំបូងរាប់លានដូស បានទៅដល់ចក្រភពអង់គ្លេសហើយ ដោយបានបញ្ជូនទៅស្តុកទុកនៅមជ្ឈមណ្ឌលកណ្តាលមួយដែលមិនត្រូវគេជាក់ទីតាំងជាក់លាក់នោះឡើយ ដោយមជ្ឈមណ្ឌលនេះ នឹងដើរតួជាអ្នកចែកចាយវ៉ាក់សាំងទៅបានមជ្ឈមណ្ឌលផ្តល់វ៉ាក់សាំងទាំងអស់ទូទាំងចក្រភពអង់គ្លេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង់គ្លេស បានបញ្ជាទិញវ៉ាក់សាំង Pfizer/BioNTech សរុប ៤០លានដូស គ្រប់គ្រាន់សម្រាប់ផ្តល់ជូនពលរដ្ឋខ្លួនប្រមាណ ២០លាននាក់ ហើយបើយោងតាមអនុប្រធានបុគ្គលិកសុខាភិបាលអង់គ្លេស បានឲ្យដឹងថា រលកទី១នៃការផ្តល់វ៉ាក់សាំង គឺអាចការពារពលរដ្ឋខ្លួនពីការចូលពេទ្យ និងករណីស្លាប់ដោយជំងឺកូវីដ ១៩ បានដល់ទៅ ៩៩%។

ថ្លែងប្រាប់ភ្នាក់ងារព័ត៌មាន BBC លោកសាស្ត្រាចារ្យ Jonathan Van-Tam បាននិយាយថា វ៉ាក់សាំងនឹងផ្តល់ជូនមនុស្សគ្រប់គ្នាដែលមានអាទិភាពទទួលវ៉ាក់សាំង ពិសេសពលរដ្ឋប្រឈមហានិភ័យខ្ពស់បំផុតដោយសារជំងឺកូវីដ។ លោកថា នេះជាគន្លឹះក្នុងការចែកចាយវ៉ាក់សាំងឲ្យបានលឿន និងមានប្រសិទ្ធភាពខ្ពស់។

វ៉ាក់សាំង Pfizer/BioNTech គឺផលិតក្នុងប្រទេសប៊ែលហ្ស៊ិក ហើយដឹកជញ្ជូនមកអង់គ្លេសតាមរយៈផ្លូវក្រោមដី Eurotunnel ប៉ុន្តែទីតាំងស្តុកវ៉ាក់សាំងនៅតែជារឿងអាថ៌កំបាំង ព្រោះវាអាចប៉ះពាល់ដល់សុវត្ថិភាពវ៉ាក់សាំងទាំងនោះ។

ទោះជាយ៉ាងណា ដោយសារតាមបណ្តាមន្ទីរពេទ្យមានបរិក្ខាវេជ្ជសាស្ត្រគ្រប់គ្រាន់ក្នុងការរក្សាគុណភាពវ៉ាក់សាំង នាំឲ្យគេជឿថាវ៉ាក់សាំងទាំងនោះ នឹងត្រូវស្តុកទុកតាមបណ្តាមន្ទីរពេទ្យធំៗ សម្រាប់ផ្តល់ជូនពលរដ្ឋអាទិភាពដូចជា មនុស្សវ័យចំណាស់ បុគ្គលិកសុខាភិបាលជាតិ អ្នកថែទាំមនុស្សចាស់ និងអ្នកជំងឺផ្សេងៗ៕

ប្រែសម្រួល៖ សុភា
ប្រភព៖ BBC