កូរ៉េ​ខាង​ត្បូង​រក​ឃើញ​អ្នក​ឆ្លង Omicron ដំបូង​៥​នាក់​ ក្នុង​នោះអ្នក​ចាក់​វ៉ាក់សាំង​រួច​២​នាក់

ប្រទេសកូរ៉េខាងត្បូងបានកំពុងរងការវាយប្រហារពីកូវីដ-១៩អាក្រក់បំផុត និងចាត់​វិធានការទប់ស្កាត់វីរុសបំប្លែងខ្លួនថ្មី Omicron ដែលកំពុងក្លាយជាក្តីបារម្ភទូទាំងពិភពលោក។

ទីភ្នាក់ងារគ្រប់គ្រង និងបង្ការជំងឺឆ្លងកូរ៉េខាងត្បូង (KDCA) បានឲ្យដឹងថា កាលពីថ្ងៃពុធមានករណីឆ្លងកូវីដ-១៩ចំនួន ៥២៦៦នាក់ដែលនេះជាចំនួនឆ្លងជាប់កំណត់ត្រាថ្មីបំផុត បន្ទាប់ពីចំនួនឆ្លងប្រចាំថ្ងៃកើនឡើងលើ៥០០០នាក់ជាលើកដំបូងចំពេល​មានការព្រួយបារម្ភជុំវិញអ្នកជំងឺដែលកើតមានរោគសញ្ញាធ្ងន់ធ្ងរ។

ទីភ្នាក់ងារគ្រប់គ្រង និងបង្ការជំងឺឆ្លងកូរ៉េខាងត្បូងបន្តថា កូរ៉េខាងត្បូងនឹងចាត់វិធានការធ្វើចត្តាឡីស័ករយៈពេល១០ថ្ងៃសម្រាប់អ្នកធ្វើដំណើរចូលទាំងអស់ដែលនឹងត្រូវប្រើពេល២សប្តាហ៍គិតចាប់ពីថ្ងៃសុក្រស្អែកទៅ។ បញ្ឈប់ការលើកលែងអ្នកដែលបានចាក់វ៉ាក់សាំងពេញដូសដែលផ្តល់ពីមុន។

វិធានការបានធ្វើឡើង បន្ទាប់ពីកូរ៉េខាងត្បូងបានរកឃើញអ្នកឆ្លងវីរុសបំប្លែងខ្លួន Omicron ៥នាក់ជាលើកដំបូងកាលពីថ្ងៃពុធ ក្នុងនោះមានអ្នក​បានចាក់វ៉ាក់សាំងពេញដូស២នាក់ក៏ឆ្លងដែរដែលបានធ្វើ​ដំណើរ​មកពីប្រទេសនីហ្សេរីយ៉ាដល់កូរ៉េខាងត្បូង ហើយ​បាន​ក៏ឆ្លងដល់សមាជិកគ្រួសារពីរនាក់ និងមិត្តភក្តិម្នាក់ទៀត។

កូរ៉េខាងត្បូងបានចាក់វ៉ាក់សាំងពេញជិត៩២%នៃមនុស្សធំ ហើយឥឡូវនេះកំពុងផ្តោតលើកុមារ ព្រមទាំងចាក់ដូសបន្ថែមទៀត ប៉ុន្តែអ្នកជំនាញបានព្រមានថា ករណីឆ្លងអាចនឹងកើនឡើងកាន់តែអាក្រក់ដោយសារវីរុសបំប្លែងថ្មីដែលមានសក្តានុពល។

រហូតដល់ពេលនេះ កូរ៉េខាងត្បូងមានករណីឆ្លងកូវីដសរុប៤៥៧៦១២នាក់ និងស្លាប់៣៧០៥នាក់៕

ប្រែសម្រួល៖ វីរបុត្រ
ប្រភព៖ reuters