ព័ត៌មានអន្ដរជាតិ

សារព័ត៌មានធំៗទូទាំងពិភពលោកចាប់អារម្មណ៍ការស្លាប់កណ្តុរវីរបុរសកម្ពុជា

បានផុស

២ years មុន

នៅ

ថ្ងៃពុធ ១២ មករា ២០២២

ដោយ

បណ្តាញសារព័ត៌មានធំៗទូទាំងពិភពលោកបានចាប់អារម្មណ៍ និងចេញផ្សាយការស្លាប់របស់កណ្តុរស្វែងរកគ្រាប់មីនរបស់កម្ពុជាដែលត្រូវបានហៅថាជា វីរបុរស។

កណ្តុរជាវីរបុរសហិតក្លិនមីនកម្ពុជាឈ្មោះ Magawa ដែលបានឈ្នះមេដាយមាសសម្រាប់ភាពក្លាហានក្នុងការជួយសង្គ្រោះអាយុជីវិតរបស់កម្ពុជាបានស្លាប់ក្នុងអាយុ៨ឆ្នាំ។

កណ្តុរយក្សកម្ពុជាមួយក្បាលនេះបានរកឃើញគ្រាប់មីន និងគ្រឿងផ្ទុះជាង១០០គ្រាប់។ នេះបើយោងតាម APOPO ដែលជាអង្គការក្រៅរដ្ឋាភិបាលក្នុងការបោសសំអាតគ្រាប់មីនដែលបានបង្វឹកកណ្តុរនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្នាដៃរបស់កណ្តុរវីរបុរសនេះបានធ្វើឲ្យរូបគេបានឈ្នះមេដាយមាសពីអង្គការសប្បុរសធម៌ពេទ្យសត្វអង់គ្លេស មន្ទីរពេទ្យប្រជាជនសម្រាប់សត្វឈឺកាលពីឆ្នាំ២០២០។

សេចក្តីប្រកាសព័ត៌មានរបស់អង្គការ APOPO បាននិយាយថា ៖«ខ្លួនពិតជាក្រៀមក្រំ និងសោកស្តាយយ៉ាងខ្លាំងដែលត្រូវចែករំលែកដំណឹងដ៏សោកសៅនៅពេលកណ្តុរវីរបុរស Magawa បានស្លាប់នៅក្នុងចុងសប្តាហ៍កន្លងទៅ។ កណ្តុរនេះមានសុខភាពល្អ និងចំណាយពេលភាគច្រើនបំផុតក្នុងការលេងធម្មតាកាលពីសប្តាហ៍មុន ប៉ុន្តែនៅពេលចុងសប្តាហ៍ រូបគេចាប់ផ្តើមយឺត ដេកច្រើន និងចាប់អារម្មណ៍ចំពោះចំណីអាហារតិច។ Magawa ទើបតែរីករាយនឹងថ្ងៃកំណើតរបស់គេកាលពីខែវិច្ឆិកា ដែលឈានចូលដល់អាយុ៨ឆ្នាំ»។

ដំណឹងប្រកាសពីការស្លាប់របស់កណ្តុរវីរបុរសនេះត្រូវបានបណ្តាញសារព័ត៌មានធំៗទូទាំងពិភពលោកចាប់អារម្មណ៍ និងផ្សព្វផ្សាយយ៉ាងខ្លាំងដូចជា CNN, CBS News, BBC, Reuters, New York Times, Xinhuanet និង Yahoo ជាដើម។

APOPO បានបញ្ជាក់ថា កណ្តុរនេះបានកើតនៅខែវិច្ឆិកា ឆ្នាំ២០១៣នៅសាកលវិទ្យាល័យកសិកម្ម Sokoine ក្នុងប្រទេសតង់ហ្សានី ដែលជាកន្លែងរូបគេរៀនពីរៀនពីរបៀបស្វែងរកគ្រាប់មីនតាមរយៈវិញ្ញាណហិតក្លិនដ៏ពិសេស។ រយៈពេល៣ឆ្នាំក្រោយមក រូបគេត្រូវបានយកមកខេត្តសៀមរាប ប្រទេសកម្ពុជាដែលជាកន្លែងរូបគេចាប់ផ្តើមការងាររកគ្រាប់មីន និងគ្រឿងផ្ទុះពិតប្រាកដ។

បើគិតជាផ្ទៃដីវិញ Magawa បានជួយបោសសំអាតជាង២២៥០០០ម៉ែត្រការ៉េនៅក្នុងប្រទេសកម្ពុជា៕

អត្ថបទ៖ វីរបុត្រ

Related Topics:Magawa