អ៊ុយក្រែន បាញ់ផ្លោងចូលភូមិរុស្ស៊ីមានប្រជាជន ជាង ៤៧០០ នាក់

អភិបាលនៃតំបន់ Belgorod ភាគនិរតី លោក Vyacheslav Gladkov បាននិយាយថា ភូមិមួយទៀតក្នុងប្រទេសរុស្ស៊ី ត្រូវរងការវាយប្រហារពីខាងអ៊ុយក្រែននៅព្រឹកថ្ងៃអង្គារទី១៩ខែមេសានេះ។

លោកអភិបាលបានប្រកាសនៅលើ Channel Telegram របស់ខ្លួនថា ភូមិ Golovchino ដែលស្ថិតនៅចម្ងាយប្រហែល ១០ គីឡូម៉ែត្រពីព្រំដែនអ៊ុយក្រែន ត្រូវបានកំណត់គោលដៅ។

លោកបានសរសេរថា “ស្ត្រីក្នុងតំបន់ម្នាក់បានរងរបួសក្នុងការវាយប្រហារនេះ ហើយបច្ចុប្បន្នកំពុងទទួលការព្យាបាល”។

លោក Gladkov បានបន្ថែមថា ការបាញ់ផ្លោងនេះបានបណ្តាលឲ្យមានការបំផ្លិចបំផ្លាញ នៅក្នុងភូមិដែលមានប្រជាជនជាង ៤៧០០នាក់ ថ្វីបើទំហំនៃការខូចខាតទាំងស្រុង កំពុងត្រូវបានវាយតម្លៃក៏ដោយ។

គួរបញ្ជាក់ថា ភូមិជាច្រើននៅក្នុងតំបន់ព្រំដែនរបស់ប្រទេសរុស្ស៊ីដូចជា Belgorod និង Bryansk បានស្ថិតនៅក្រោមការបាញ់ផ្លោងពីសំណាក់អ៊ុយក្រែនកាលពីសប្តាហ៍មុន។ ការវាយប្រហារអាក្រក់បំផុតបានកើតឡើងកាលពីថ្ងៃព្រហស្បតិ៍នៅក្នុងភូមិ Klimovo នៃតំបន់ Bryansk ដោយមនុស្សចំនួនប្រាំបីនាក់ រួមទាំងក្មេងប្រុសអាយុ២ឆ្នាំម្នាក់ និងម្តាយដែលមានផ្ទៃពោះរបស់គាត់បានរងរបួស៕

ប្រែសម្រួល៖ Vann Vann

ប្រភព៖ RT

ចុចអាន៖ ទីបំផុត រូបភាពនិងវីដេអូដំបូង នៃការលិចនាវាចម្បាំងរុស្ស៊ី ក្នុងសមុទ្រខ្មៅ ត្រូវបានបញ្ចេញ