តើមេដឹកនាំអឺរ៉ុបណាខ្លះត្រូវធ្វើចត្តាឡីស័កបន្ទាប់ពីលោក Macron ឆ្លងកូវីដ?

មេដឹកនាំអឺរ៉ុបមួយចំនួនកំពុងធ្វើចត្តាឡីស័កបន្ទាប់ពីប្រធានាធិបតីបារាំងលោក Emmanuel Macron បានធ្វើតេស្តវិជ្ជមានជំងឺកូវីដ-១៩។

លោក Macron អាយុ៤២ឆ្នាំនឹងត្រូវដាក់ខ្លួននៅដាច់ពីគេរយៈពេល៧ថ្ងៃហើយធ្វើការពីចម្ងាយ។

ប្រធានាធិបតីបារាំងរូបនេះបានចូលរួមព្រឹត្តិការណ៍សំខាន់ៗជាច្រើនក្នុងរយៈពេលប៉ុន្មានថ្ងៃថ្មីៗនេះរួមទាំងកិច្ចប្រជុំកំពូលរបស់សហភាពអឺរ៉ុបផងដែរ។

គេមិនទាន់ដឹងថាតើលោក Macron បានឆ្លងវីរុសនេះយ៉ាងដូចម្តេចនោះទេប៉ុន្តែការិយាល័យរបស់គាត់បាននិយាយថា ខ្លួនកំពុងព្យាយាមកំណត់អំពីទំនាក់ទំនងរបស់គាត់នាពេលថ្មីៗនេះ។

តើមានអ្នកណាទៀតដែលត្រូវធ្វើចត្តាឡីស័ក?

ក្នុងចំណោមអ្នកដែលត្រូវធ្វើចត្តាឡីស័ករួមមានប្រធានក្រុមប្រឹក្សាអឺរ៉ុបលោក Charles Michel, នាយករដ្ឋមន្រ្តីអេស្ប៉ាញលោក Pedro Sánchez និងអគ្គលេខាធិការអង្គការ OECD លោក Angel Gurría។ មេដឹកនាំទាំងអស់នេះបានជួបជាមួយលោក Macron នៅក្នុងសប្តាហ៍នេះ។

នាយករដ្ឋមន្រ្តីព័រទុយហ្កាល់ លោក António Costa អាយុ៥៩ឆ្នាំបានលុបចោលរាល់ការធ្វើទស្សនកិច្ចជាផ្លូវការហើយកំពុងធ្វើចត្តាឡីស័កនិងរង់ចាំលទ្ធផលតេស្តបន្ទាប់ពីលោកបានទទួលទានអាហារថ្ងៃត្រង់ការងារនៅទីក្រុងប៉ារីសជាមួយលោក Macron កាលពីថ្ងៃពុធ។

នាយករដ្ឋមន្រ្តីប៊ែលហ្សិកលោក Alexander De Croo និងនាយករដ្ឋមន្រ្តីលុចសាំប៊ួលោក Xavier Bettel ក៏កំពុងធ្វើចត្តាឡីស័កផងដែរបន្ទាប់ពីទាក់ទងជាមួយប្រធានាធិបតីបារាំង៕

ប្រែសម្រួលដោយ៖ Vann Vann

ប្រភព៖ BBC

ចុចអាន៖ ប្រធានាធិបតីបារាំងលោក Macron ឆ្លងកូវីដ

ចុចអាន៖ មេដឹកនាំទួរគីស្នើឲ្យជនរួមជាតិធ្វើពហិការទំនិញបារាំង