បាងកក បិទសាលារៀន និងសាកលវិទ្យាល័យមួយចំនួន ដោយសារទឹកជំនន់ (មានវីដេអូ)

សាលារៀន និងសាកលវិទ្យាល័យមួយចំនួនក្នុងទីក្រុងបាងកក និងជាយក្រុង ត្រូវបានបិទកាលពីថ្ងៃពុធទី០៧ខែកញ្ញា ដោយសារទឹកជំនន់យ៉ាងខ្លាំង ជន់លិចតំបន់ជាច្រើននៃរាជធានី បន្ទាប់ពីភ្លៀងធ្លាក់ខ្លាំងពេញមួយយប់។

សាលាពិសោធន៍របស់សាកលវិទ្យាល័យ Kasetsart បានចេញសេចក្តីជូនដំណឹងនៅលើគេហទំព័ររបស់ខ្លួនថា តំបន់ជុំវិញសកលវិទ្យាល័យ និងសាលារៀន ត្រូវទឹកជន់លិច ដែលធ្វើឲ្យសិស្សនិស្សិតពិបាកចូលរៀនដោយផ្ទាល់ ដូច្នេះហើយ គណៈគ្រប់គ្រងសាលា បានសម្រេច ផ្អាកថ្នាក់រៀននៅនឹងកន្លែង ហើយប្រើការរៀនតាមអនឡាញជំនួសវិញ។

កាលពីព្រឹកថ្ងៃពុធ នាយកដ្ឋានឧតុនិយមបានព្យាករណ៍ថា ទីក្រុងបាងកក និងខេត្តជុំវិញរបស់ខ្លួន, តំបន់ភាគខាងកើត និងឆ្នេរភាគនិរតីនៃប្រទេសថៃ នឹងប្រឈមមុខនឹងភ្លៀងធ្លាក់ខ្លាំង ដែលគ្របដណ្តប់ ៨០% នៃតំបន់ទាំងនោះ។ ស្ថានភាពស្រដៀងគ្នានេះ ក៏ត្រូវបានព្យាករណ៍សម្រាប់តំបន់ភាគខាងជើង និងភាគឦសានផងដែរ។

ប្រជាពលរដ្ឋដែលរស់នៅក្បែរផ្លូវទឹកធម្មជាតិ និងតាមជើងភ្នំ ត្រូវបានគេណែនាំឲ្យត្រៀមខ្លួន ប្រយ័ត្នទឹកហូរជន់ និងជំនន់ទឹកភ្លៀង។

នៅទីក្រុងបាងកក អ្នកធ្វើដំណើរតាមរថយន្តក្រុងជាច្រើន ត្រូវជាប់គាំងនៅពេលយប់ ដោយ​សារកង្វះការដឹកជញ្ជូនសាធារណៈ ខណៈតាក់ស៊ី ក៏ត្រូវជាប់គាំងផងដែរដោយសារទឹកជំនន់។

ឡានទាហាន ត្រូវបានដាក់ពង្រាយ​នៅតាម​តំបន់​ដែល​មាន​ទឹក​ជំនន់​ខ្លាំង ដើម្បី​ផ្តល់​ការ​ដឹក​ជញ្ជូន​ដោយ​ឥត​គិត​ថ្លៃ​ដល់​អ្នក​ធ្វើ​ដំណើរ​។

នៅ​ផ្លូវ​ Chaengwattana, តំបន់​ខ្លះត្រូវទឹកលិច កន្លះម៉ែត្រដោយសារ​ភ្លៀង​ធ្លាក់ខ្លាំង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Thai PBS

ចុចអាន៖ ទឹកជំនន់ កំពុងវាយលុកទីក្រុងបាងកក ស្ទើរគ្រប់ទីកន្លែង