រដ្ឋមន្ត្រីការពារជាតិរុស្ស៊ីលោក Sergei Shoigu បាននិយាយកាលពីពេលថ្មីៗនេះថា ប្រទេសរុស្ស៊ីនឹងយកចិត្តទុកដាក់ជាពិសេសក្នុងការកសាងហេដ្ឋារចនាសម្ព័ន្ធសម្រាប់កងកម្លាំងនុយក្លេអ៊ែររបស់ខ្លួន ពោលជាផែនការដ៏សំខាន់នៅឆ្នាំ ២០២៣ ។

លោក Shoigu បាននិយាយនៅក្នុងការអត្ថាធិប្បាយតាមទូរទស្សន៍ថា រុស្ស៊ីក៏នឹងធ្វើការដើម្បីបង្កើនសមត្ថភាពប្រយុទ្ធរបស់កងកម្លាំងមីស៊ីលរបស់ខ្លួនផងដែរ ស្របពេលដែលសម្ភារៈបរិក្ខារនានាក៏កំពុងត្រូវបានសាងសង់ដើម្បីបំពាក់ប្រព័ន្ធមីស៊ីលថ្មី ។

ផែនការនេះកើតឡើង បន្ទាប់ពីលោកប្រធានាធិបតី វ្ល៉ាឌីមៀរ ពូទីន បានដាក់ទឹកដីដែលរុស្សីរឹបអូសបានក្នុងប្រទេសអ៊ុយក្រែន នៅក្រោមឆ័ត្រនុយក្លេអ៊ែររបស់ទីក្រុងមូស្គូ ដោយព្រមានថា លោកត្រៀមខ្លួនរួចជាស្រេចដើម្បីការពារ “បូរណភាពទឹកដី” របស់រុស្ស៊ី តាមគ្រប់មធ្យោបាយដែលមាន ខណៈសហរដ្ឋអាមេរិកក៏បានព្រមានរុស្ស៊ីវិញផងដែរ អំពីផលវិបាកនៃការប្រើប្រាស់អាវុធនុយក្លេអ៊ែរណាមួយ ។

ពាក់ព័ន្ធនឹងបញ្ហានេះដែរ រុស្ស៊ី និងសហរដ្ឋអាមេរិកគ្រោងនឹងជួបពិភាក្សាគ្នានៅទីក្រុង Cairo ក្នុងសប្តាហ៍នេះ ស្តីពីសន្ធិសញ្ញា New START ដើម្បីកំណត់ចំនួនក្បាលគ្រាប់ដែលអាចដាក់ពង្រាយបាន បន្ទាប់ពីរុស្ស៊ីត្រូវបានគេដឹងថា មានឃ្លាំងអាវុធនុយក្លេអ៊ែរធំជាងគេក្នុងពិភពលោក ដោយមានក្បាលគ្រាប់ជិត ៦,០០០ គ្រាប់ ។

ទោះជាយ៉ាងណា ទីក្រុងមូស្គូបានដកខ្លួនចេញនៅមុនថ្ងៃនៃកិច្ចប្រជុំនេះ ដោយចោទប្រកាន់សហរដ្ឋអាមេរិកពីអាកប្បកិរិយាបំពុលប្រឆាំងរុស្ស៊ី និងព្យាយាមរៀបចំសន្ធិសញ្ញានេះដើម្បីផលប្រយោជន៍របស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ លោក ពូទីន ប្រាប់ទំហំទឹកប្រាក់ពីការលក់អាវុធទៅទីផ្សារពិភពលោកក្នុងឆ្នាំ ២០២២ នេះ