អ៊ុយក្រែន​ គំរាម វាយប្រហារចូលកាន់តែជ្រៅ ក្នុងទឹកដី រុស្ស៊ី (មានវីដេអូ)

ប្រមុខចារកម្មរបស់អ៊ុយក្រែនលោក Kirill Budanov បាននិយាយកាលពីថ្ងៃពុធទី០៤ខែមករាថា នឹងមានការវាយប្រហារថ្មីចូលកាន់តែជ្រៅទៅក្នុងទឹកដីរុស្ស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងទៅកាន់ ABC News លោក Budanov ត្រូវបានគេសួរថា តើជាស្នាដៃអ៊ុយក្រែនមែនទេ ដែលបានវាយប្រហារនាពេលថ្មីៗនេះលើមូលដ្ឋានទ័ពអាកាសរុស្ស៊ី។ លោកឆ្លើយតបថា “ឥឡូវ ខ្ញុំ​មិន​អាច​ផ្តល់​ចម្លើយ​ ​ចំពោះ​សំណួរ​នេះបាន​ទេ។ មានតែពេលចប់សង្គ្រាមប៉ុណ្ណោះ ប៉ុន្តែខ្ញុំរីករាយ ដែលឃើញការវាយប្រហារនេះ”។

ស្របពេលជាមួយគ្នានោះ ចារកម្មកំពូលរូបនេះ ក៏បានថ្លែងអំណរគុណដល់សហរដ្ឋអាមេរិកផងដែរ សម្រាប់ការគាំទ្រដល់អ៊ុយក្រែន។ លោកបានស្នើឲ្យទីក្រុងវ៉ាស៊ីនតោន បន្តដំណើរការនេះទៅមុខ ហើយសន្យាថា លទ្ធផលនឹងមិនចំណាយពេលយូរទេ។

ក្នុង​ប៉ុន្មាន​រយៈពេលសប្តាហ៍​ថ្មីៗ​នេះ ទីក្រុងមូស្គូ​​បាន​ចោទទី​ក្រុង​កៀវជាច្រើនលើកច្រើនសា​ថា ​បានបើក​ការ​វាយ​ប្រហារ​លើ​ទីតាំង​យោធា​របស់​ខ្លួន​នៅ​ក្នុង​ទឹកដី​រុស្ស៊ី។

កាលពីសប្តាហ៍មុន ក្រសួងការពារជាតិរុស្ស៊ីនិយាយថា ដ្រូនរបស់អ៊ុយក្រែន បានព្យាយាមកំណត់គោលដៅលើអាកាសយានដ្ឋាន Engels ក្នុងតំបន់ Saratov ដែលផ្ទុកយន្តហោះទម្លាក់គ្រាប់បែកយុទ្ធសាស្ត្រ។ នៅពេលនោះ ក្រសួងនិយាយថា កងការពារអាកាស បានបាញ់ទម្លាក់ដ្រូន ប៉ុន្តែកម្ទេចកម្ទីរបស់វាបានសម្លាប់យោធាបីនាក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ដាក់នាវាចម្បាំងទី១ បំពាក់ដោយមីស៊ីលល្បឿនលឿនជាងសំឡេង ចូលក្នុងប្រតិបត្តិការប្រយុទ្ធ ហើយ