វិមានក្រឹមឡាំងព្រមានថា ការផ្តល់អាវុធឲ្យអ៊ុយក្រែន វាយប្រហារទឹកដីរុស្ស៊ី នឹងធ្វើឲ្យជម្លោះឈានដល់កម្រិតថ្មី

សហរដ្ឋអាមេរិកត្រូវបានគេនិយាយថា កំពុងពិចារណាផ្តល់អាវុធដល់អ៊ុយក្រែនដើម្បីវាយប្រហារឧបទ្វីបគ្រីមៀ ដែលបានក្លាយជាផ្នែកមួយនៃប្រទេសរុស្ស៊ីនៅក្នុងឆ្នាំ២០១៤ បន្ទាប់ពីប្រជាជនជិត៩៧% បោះឆ្នោតគាំទ្រការបង្រួបបង្រួមឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ អ្នកនាំពាក្យវិមានក្រឹមឡាំង លោក Dmitry Peskov បានព្រមានថា ការចែកចាយសព្វាវុធដ៏មានសក្ដានុពល ដែលអាចកំណត់គោលដៅរុស្ស៊ី ពីអ៊ុយក្រែន គឺមានគ្រោះថ្នាក់ខ្លាំងណាស់ ហើយនឹងធ្វើឲ្យជម្លោះឈានដល់កម្រិតថ្មីមួយទៀត។

លោក​ក៏​បាន​សង្កត់​ធ្ងន់​ដែរ​ថា ការ​អភិវឌ្ឍ​បែប​នេះ​នឹង​មិន​ល្អឡើយ ​សម្រាប់​សន្តិសុខ​ពិភពលោក និង​តំបន់​អឺរ៉ុប។

លោក Peskov បន្ថែមថា សេចក្តីថ្លែងការណ៍របស់ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិក លោក Anatoly Antonov ថា កងកម្លាំងរុស្ស៊ីនឹងឆ្លើយតបចំពោះការវាយប្រហារលើទឹកដីរុស្ស៊ី រួមទាំងនៅ គ្រីមៀ ផងដែរនោះ គឺបានឆ្លុះបញ្ចាំងពីជំហរផ្លូវការរបស់វិមានក្រឹមឡាំង។

លោក Antonov និយាយថា កងទ័ពរុស្ស៊ីនឹងបំផ្លាញរាល់សព្វាវុធ ដែលសហរដ្ឋអាមេរិក និងបណ្តាប្រទេសលោកខាងលិចផ្សេងទៀតផ្ដល់ឲ្យអ៊ុយក្រែន និងសងសឹកការវាយប្រហារលើទឹកដីរុស្ស៊ី រួមទាំងនៅឧបទ្វីបគ្រីមៀផងដែរ។

ថ្មីៗ​នេះ សហរដ្ឋអាមេរិក និង​ប្រទេស​លោកខាងលិច​មួយចំនួនទៀត ​បានប្រកាស​ការផ្គត់ផ្គង់​ផ្នែកយោធា​ថ្មី​ដល់ទី​ក្រុងកៀវ រួមទាំង​រថក្រោះ​ប្រយុទ្ធ រថពាសដែក និង​ប្រព័ន្ធ​កាំភ្លើងធំផងដែរ។ ក្រសួងការបរទេសអាមេរិកនិយាយថា អ៊ុយក្រែន អាចមានលទ្ធភាពបើកការវាយប្រហារប្រឆាំងនឹងកងទ័ពរុស្ស៊ីនៅគ្រីមៀ ដោយសារអាវុធដែលផ្គត់ផ្គង់ដោយទីក្រុងវ៉ាស៊ីនតោន។

កន្លងមក រុស្ស៊ីធ្លាប់បានផ្ញើលិខិតទៅបណ្តាប្រទេសណាតូ ដើម្បីតវ៉ាចំពោះការផ្គត់ផ្គង់សព្វាវុធដល់អ៊ុយក្រែន ដោយរដ្ឋមន្ត្រីការបរទេស Sergey Lavrov បានសង្កត់ធ្ងន់ថា រាល់អាវុធដែលបញ្ជូនទៅអ៊ុយក្រែន នឹងក្លាយជាគោលដៅស្របច្បាប់សម្រាប់កងកម្លាំងរុស្ស៊ី៕

ប្រែសម្រួល៖ Vann Vann

ប្រភព៖ Sputnik

ចុចអាន៖ រុស្ស៊ី ប្តេជ្ញាកម្ទេចរាល់សព្វាវុធ ដែលលោកខាងលិចបញ្ជូនទៅឲ្យ កងទ័ពអ៊ុយក្រែន