ម៉ាឡាវី ប្រកាសដាក់ប្រទេសក្នុងគ្រាអាសន្ន បន្ទាប់ពីរដ្ឋមន្ត្រីនិងមន្ត្រីជាន់ខ្ពស់ស្លាប់ជាបន្តបន្ទាប់ដោយសារកូវីដ

ប្រធានាធិបតី ម៉ាឡាវីលោក Lazarus Chakwera បានប្រកាសដាក់ប្រទេសក្នុងគ្រាអាសន្នបន្ទាប់ពីរដ្ឋមន្រ្តី ២រូបស្លាប់ដោយសារជំងឺកូវីដ១៩ចំពេលមានការរីករាលដាលនៃជំងឺឆ្លងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរដ្ឋាភិបាលបាននិយាយថា រដ្ឋមន្រ្តីក្រសួងដឹកជញ្ជូនលោក Sidik Mia និងរដ្ឋមន្រ្តីរដ្ឋាភិបាលក្នុងតំបន់លោក Lingson Berekanyama បានទទួលមរណភាពដោយសារជំងឺនេះកាលពីព្រឹកថ្ងៃអង្គារ។

រដ្ឋាភិបាលបានប្រកាសការកាន់ទុក្ខរយៈពេល៣ថ្ងៃ ដោយចាប់ផ្តើមពីថ្ងៃពុធនេះទៅ។

អ្នកទាំងពីរ ជាសមាជិកជាន់ខ្ពស់នៃគណបក្សសមាជម៉ាឡាវី (MCP) ដែលជាដៃគូដ៏សំខាន់នៅក្នុងសម្ព័ន្ធភាពមួយដែល ទម្លាក់លោកប្រធានាធិបតី Peter Mutharika កាលពីខែមិថុនាឆ្នាំមុន។

ការស្លាប់នេះបានកើតឡើង បន្ទាប់ពីមានកិច្ចប្រជុំគណៈរដ្ឋមន្រ្តីនិងការជួបជុំផ្សេងទៀត ដែលមានការចូលរួមពីអ្នកនយោបាយក្នុងឱកាសបុណ្យណូអែល ប៉ុន្តែក្រុមមន្រ្តីមិនបាននិយាយទេថាតើ ជនរងគ្រោះឆ្លងជំងឺនៅឯណា។

រដ្ឋាភិបាលបានប្រកាសថា អតីតអភិបាលធនាគារកណ្តាលម៉ាឡាវី លោក Francis Perekamoyo និងលេខាធិការនៃក្រសួងព័ត៌មាន លោក Ernest Kantchentche ក៏បានទទួលមរណភាពដោយសារជំងឺនេះផងដែរ។

គួរបញ្ជាក់ថា មកទល់ពេលនេះ ប្រទេសម៉ាឡាវី បានកត់ត្រាករណីឆ្លងជំងឹកូវីដ១៩ចំនួន ៩,០២៧ករណី ស្លាប់២៣៥នាក់និងជាសះស្បើយ ៦,៨៣៨នាក់៕

ប្រែសម្រួលដោយ៖ Vann Vann

ប្រភព៖ Al Jazeera

ចុចអាន៖ ប្រធានាធិបតីព័រទុយហ្គាល់ តេស្តវិជ្ជមានកូវីដ១៩