រញ្ជួយដីនៅឥណ្ឌូនេស៊ី៖ អ្នកស្លាប់កើនដល់៥៦នាក់ របួស៨២៦នាក់

ទីភ្នាក់ងារគ្រប់គ្រងគ្រោះមហន្តរាយជាតិឥណ្ឌូនេស៊ី បាននិយាយនៅថ្ងៃអាទិត្យនេះថា ចំនួនអ្នកស្លាប់ដោយសារគ្រោះរញ្ជួយដីកម្រិត៦.២រ៉ិចទ័រដែលវាយប្រហារខេត្ត West Sulawesi របស់ប្រទេសឥណ្ឌូនេស៊ីកាលពីថ្ងៃសុក្រ បានកើនឡើងដល់៥៦នាក់ហើយ។

អ្នកនាំពាក្យទីភ្នាក់ងារលោក Raditya Jati បាននិយាយថា អ្នករងរបួសនៅតែមានចំនួន៨២៦នាក់ ដោយក្នុងនោះមាន១៨៩នាក់របួសធ្ងន់ក្នុងទីក្រុង Mamuju និង១២នាក់ផ្សេងទៀតរបួសធ្ងន់នៅស្រុក Majene។

លោក Jati បាននិយាយថា ចរន្តអគ្គិសនីត្រូវបានស្តារឡើងវិញបន្ទាប់ពីការដាច់ទ្រង់ទ្រាយធំ នៅក្នុងទីក្រុង Mamuju និងស្រុក Majene។

ក្រៅពីនេះ លោកនិយាយថា ផ្លូវធំដែលតភ្ជាប់តំបន់ទាំងពីរក៏បើកដំណើរការឡើងវិញផងដែរ បន្ទាប់ពីការរញ្ជួយបានកាត់ផ្តាច់ហេដ្ឋារចនាសម្ព័ន្ធដឹកជញ្ជូនផ្លូវគោក។

លោកបានបន្ថែមថា ជំនួយសង្គ្រោះបន្ទាន់នៅតែបញ្ជូនទៅឲ្យអ្នករងផលប៉ះពាល់ ដែលកំពុងសម្រាកនៅតាមមណ្ឌលជម្លៀសនានា៕

ប្រែសម្រួលដោយ៖ Vann Vann

ប្រភព៖ Xinhua

ចុចអាន៖ Update ៖ អ្នកស្លាប់ក្នុងគ្រោះរញ្ជួយដីនៅឥណ្ឌូនេស៊ីកើនដល់ ៣៤ នាក់