ថៃជួបព្យុះទី២ក្នុងរយៈពេលត្រឹមកន្លះខែ – Kampuchea Thmey Daily
Connect with us

ព័ត៌មានអន្ដរជាតិ

ថៃជួបព្យុះទី២ក្នុងរយៈពេលត្រឹមកន្លះខែ

Published

on

យោងតាមនាយកដ្ឋានឧតុនិយមថៃ (TMD) បានឲ្យដឹងថា ប្រទេសថៃកំពុងត្រៀមខ្លួនសម្រាប់ការមកដល់របស់ព្យុះត្រូពិកទី២ក្នុងរយៈពេលត្រឹមពីរសប្តាហ៍។ ព្យុះចុងក្រោយនេះត្រូវបានគេរំពឹងថានឹងបង្កឲ្យមានការខូចខាតកាន់តែធំ។

នៅក្នុងការធ្វើបច្ចុប្បន្នភាពព្យុះដែលចេញផ្សាយនៅម៉ោង១១យប់ថ្ងៃព្រហស្បតិ៍, TDM បាននិយាយថា ប្រព័ន្ធសម្ពាធទាបនៅភាគខាងកើតប្រទេសហ្វីលីពីនបានបង្កើនកម្លាំងកាន់តែខ្លាំងទៅជាព្យុះត្រូពិកប្រភេទ២។ ចាប់ពីថ្ងៃសុក្រដល់ថ្ងៃអាទិត្យ ប្រព័ន្ធសម្ពាធទាបត្រូវបានគេព្យាករណ៍ថានឹងវិវត្តទៅជាព្យុះត្រូពិកប្រភេទ៣ដែលនឹងបណ្តាលឲ្យមានការបាក់ដីនៅតំបន់ភាគកណ្តាលប្រទេសវៀតណាម។

ព្យុះដែលខិតជិតមកដល់នេះទំនងជានឹងបង្កឲ្យមានភ្លៀងធ្លាក់ឥតឈប់ឈរនិងនាំមកជាមួយខ្យល់បក់ខ្លាំងនៅតំបន់ភាគខាងជើង វាលទំនាបភាគកណ្តាល ភាគឦសាននិងតំបន់ភាគខាងកើត។ ការិយាល័យអាកាសធាតុបាននិយាយថា ជំនន់ទឹកភ្លៀងនិងទឹកហូរខ្លាំងត្រូវបានព្យាករណ៍នៅក្នុងតំបន់ដែលរងផលប៉ះពាល់។ ទឹកជំនន់ធ្ងន់ធ្ងរត្រូវបានគេព្យាករណ៍នៅក្នុងខេត្ត Nakhon Ratchasima។

TMD និយាយថា ព្យុះនេះកំពុងបង្កឲ្យមានទឹករលកកម្ពស់២ទៅ៣ម៉ែត្រនៅក្នុងសមុទ្រ Andaman និងនៅឈូងសមុទ្រថៃ។អាជ្ញាធរនៅតាមបណ្តាខេត្តនានាដែលស្ថិតចំផ្លូវព្យុះនេះកំពុងត្រៀមទប់ទល់នឹងការខូចខាតបន្ថែមទៀត។

នាយកដ្ឋានទប់ស្កាត់និងកាត់បន្ថយគ្រោះមហន្តរាយបាននិយាយថា មកដល់ពេលនេះ មានប្រជាជន១៥,៧៤០គ្រួសារនៅក្នុងខេត្តចំនួន១៩បានរងគ្រោះដោយសារទឹកជំនន់និងការបាក់ដី។ មនុស្សម្នាក់បានស្លាប់នៅក្នុងគ្រោះមហន្តរាយនេះ។

ក្នុងចំណោមខេត្តដែលរងផលប៉ះពាល់ ទឹកជំនន់នៅតែមិនទាន់ស្រកក្នុងខេត្ត Nakhon Ratchasima, Sa Kaeo, Chachoengsao, Surat Thani, Trang និង Satun ។ ទន្ទឹមនឹងនេះ ការបាក់ដីក៏ត្រូវបានគេរាយការណ៍ផងដែរនៅ Phuket, Satun និង Krabi៕

ប្រែសម្រួលដោយ៖ Vann Vann

ប្រភព៖ Bangkok Post

Click to comment

Leave a Reply

Your email address will not be published.

19 − 12 =

ចុច Like Facebook កម្ពុជាថ្មី

ព័ត៌មានពេញនិយម