ចិន ចាក់វ៉ាក់សាំងកូវីដជាង២២លានដូសរួចទៅហើយដល់ប្រជាជនរបស់ខ្លួន

មន្ត្រីសុខាភិបាលបាននិយាយនៅថ្ងៃពុធទី២៧ខែមករានេះថា ប្រទេសចិនបានចាក់វ៉ាក់សាំងកូវីដប្រហែល២២.៨លានដូសរួចទៅហើយ ខណៈពេលប្រទេសនេះ បង្កើនយុទ្ធនាការរបស់ខ្លួនមុនពិធីបុណ្យចូលឆ្នាំចិននៅខែក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសដែលមានប្រជាជនច្រើនជាងគេបំផុតនៅលើពិភពលោកមួយនេះ បានពង្រីកគ្រោងការណ៍នៃការចាក់វ៉ាក់សាំងតាមគោលដៅចាប់តាំងពីពាក់កណ្តាលខែធ្នូមក ដើម្បីដាក់បញ្ចូលក្រុមអាទិភាពដែលប្រឈមនឹងហានិភ័យខ្ពស់នៃការឆ្លងវីរុស ក្នុងគោលបំណងបង្ការការផ្ទុះឡើងនៅរដូវរងានិងរដូវផ្ការីក។

ដោយសំដៅទៅលើកិច្ចខិតខំប្រឹងប្រែងចាក់វ៉ាក់សាំងនេះ លោក Zeng Yixin អនុប្រធានគណៈកម្មការសុខភាពជាតិបានប្រាប់សន្និសីទកាសែតមួយថា “សរុបមក ការងារនេះកំពុងដំណើរការទៅដោយរលូននិងមានសណ្តាប់ធ្នាប់”។

ប្រព័ន្ធផ្សព្វផ្សាយរដ្ឋ Global Times បានរាយការណ៍ក្នុងខែនេះថា ប្រទេសចិនមានគោលបំណងចាក់វ៉ាក់សាំងដល់ប្រជាជនចំនួន៥០លាននាក់ មុនពិធីបុណ្យចូលឆ្នាំចិនក្នុងខែកុម្ភៈ។

គម្រោងចាក់ថ្នាំបង្ការទូទាំងប្រទេសឥឡូវនេះ បានផ្តល់អាទិភាពដល់ក្រុមសំខាន់ៗដូចជាកម្មករក្នុងសេវាវេជ្ជសាស្រ្ត ដឹកជញ្ជូននិងចំណីអាហារ និយោជិកនិងនិស្សិតដែលចេញទៅក្រៅប្រទេស។ ប៉ុន្តែមនុស្សចាស់និងអ្នកដទៃទៀតនឹងត្រូវរង់ចាំសិន៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ ប្រធានាធិបតីអាហ្វ្រិកខាងត្បូងទទូចឲ្យប្រទេសអ្នកមាន កុំទិញវ៉ាក់សាំងកូវីដស្តុកទុកច្រើនពេក