ប៉ូលិសមីយ៉ាន់ម៉ា បាញ់កាណុងទឹកដាក់ក្រុមអ្នកតវ៉ាក្នុងរដ្ឋធានី

នៅថ្ងៃចន្ទទី០៨ខែកុម្ភៈនេះ ប៉ូលិសនៅក្នុងរដ្ឋធានីរបស់ប្រទេសមីយ៉ាន់ម៉ា បានប្រើប្រាស់កាណុងបាញ់ទឹកប្រឆាំងនឹងក្រុមបាតុករ ដែលធ្វើបាតុកម្មប្រឆាំងនឹងរដ្ឋប្រហារយោធាកាលពីសប្តាហ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកថតរូប AFP ម្នាក់ក៏បានឃើញហេតុការណ៍នេះផងដែរ។ គាត់បានរាយការណ៍ជាលើកដំបូងអំពីការប្រើប្រាស់កាណុងបាញ់ទឹកប្រឆាំងនឹងក្រុមបាតុករ ចាប់តាំងពីការប្រមូលផ្តុំគ្នាបានចាប់ផ្តើមកាលពី៣ថ្ងៃមុន។

ប៉ូលិសបានបាញ់កាណុងទឹកមួយភ្លែតប្រឆាំងនឹងក្រុមបាតុកររាប់ពាន់នាក់ ដែលបានប្រមូលផ្តុំគ្នា។ រូបភាពក្នុងប្រព័ន្ធផ្សព្វផ្សាយសង្គមបានបង្ហាញថា ក្រុមអ្នកតវ៉ាមួយចំនួនហាក់ដូចជារងគ្រោះនៅពេលពួកគេត្រូវបាញ់ឲ្យដួលទៅនឹងដី។

ប៉ូលិសបានបញ្ឈប់ការប្រើប្រាស់កាណុងបាញ់ទឹក បន្ទាប់ពីក្រុមអ្នកតវ៉ាបានអំពាវនាវដល់ពួកគេប៉ុន្តែបាតុកម្មនៅតែបន្ត។

ហ្វូងមនុស្សយ៉ាងធំបានចូលរួមបាតុកម្មប្រឆាំងរដ្ឋប្រហារទូទាំងប្រទេសមីយ៉ាន់ដើម្បីទាមទារឲ្យមានការដោះលែងមេដឹកនាំលោកស្រី អ៊ួងសានស៊ូជី និងការវិលត្រឡប់មកវិញនៃលទ្ធិប្រជាធិបតេយ្យ។

ការប្រមូលផ្តុំគ្នាកាលពីចុងសប្តាហ៍ភាគច្រើនគឺដោយសន្តិវិធី ប៉ុន្តែប្រព័ន្ធផ្សព្វផ្សាយក្នុងស្រុកបានរាយការណ៍ថា នៅទីក្រុងភាគអាគ្នេយ៍ Myawaddy ប៉ូលិសបានបាញ់ឡើងលើអាកាសដើម្បីបំបែកក្រុមអ្នកតវ៉ា៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ គណបក្សរបស់លោកស្រី ស៊ូជី ស្នើពិភពលោកកុំទទួលស្គាល់របបយោធាមីយ៉ាន់ម៉ា