នាវា​ចម្បាំង​ម៉ាឡេស៊ី លិច​​ចូល​សមុទ្រ សង្ស័យ​បណ្ដាល​មកពី​ប៉ះ​ទង្គិច​នឹង​អ្វី​ម្យ៉ាង​នៅ​ក្រោម​ទឹក

នាវា​ចម្បាំង​​ល្បឿន​លឿនដែលជាកម្មសិទ្ធិរបស់​កងទ័ពជើងទឹក​ម៉ាឡេស៊ី បានលិចនៅឆ្នេរសមុទ្រ​​នៃ​រដ្ឋ Johor កាលពីចុងសប្តាហ៍ បន្ទាប់ពីមានការសង្ស័យថាបាន​បើក​បុកជាមួយវត្ថុ​ម្យ៉ាង​នៅក្រោមទឹក។

នាវា​ចម្បាំង KD Pendekar បានជួបប្រទះ​នឹង​បញ្ហា​ជន់​លិច​​យ៉ាង​ធ្ងន់ធ្ងរ ដោយសារតែការ​ធ្លាយ​ដែលត្រូវបានគេរកឃើញដំបូងនៅក្នុងបន្ទប់ម៉ាស៊ីន​​នៃ​នាវា​ចម្បាំង កាល​ពី​ថ្ងៃ​ទី​២៥​ខែ​សីហា។ កងទ័ពជើងទឹក​ម៉ាឡេស៊ី បាននិយាយថា ទោះបីជាមានកិច្ច​ខិតខំប្រឹងប្រែងអស់ពីសមត្ថភាពរបស់នាវិកក្នុងការគ្រប់គ្រង និងរក្សាលំនឹងក៏ដោយ នាវា​​នៅ​​តែ​ត្រូវបានលិច​ទាំងស្រុងនៅម៉ោង​៣​និង​៥៤​នាទី​រសៀល​ថ្ងៃ​អាទិត្យ។

កងទ័ពជើងទឹក បានរៀបរាប់​ថា «កិច្ចខិតខំប្រឹងប្រែងដើម្បីជួយសង្គ្រោះនាវា​កំពុងដំណើរការនៅឡើយ» ដោយបន្ថែមថាវាបានលិច​នៅ​ចម្ងាយ​ប្រហែល ៣,៧៤​គីឡូម៉ែត្រ​​ពី​ភាគអាគ្នេយ៍នៃ​ភូមិ Tanjung Penyusop។

កងទ័ពជើងទឹក បានបញ្ជាក់​​ទៀត​ថា មិនមាន​សេចក្ដី​រាយការណ៍ពីអ្នករងរបួសនោះទេ ដោយ​សមាជិកនាវិកទាំង​៣៩នាក់​ត្រូវបានជួយសង្គ្រោះ មុនពេលដែលនាវា​នោះ​លិច​ចូលទៅក្រោម​សមុទ្រ។ ក្រុម​នាវិកត្រូវបានបញ្ជូន​ទៅមូលដ្ឋានទ័ពជើងទឹក KD Sultan Ismail ដែល​នៅ​ក្បែរនោះ។

ក្រុមប្រឹក្សាស៊ើបអង្កេតពិសេសមួយត្រូវបានបង្កើតឡើង ដើម្បីកំណត់ពីមូលហេតុពិតប្រាកដនៃការលេចធ្លាយនេះ។ ក្រុមត្រួតពិនិត្យបរិស្ថានក៏ត្រូវបានដាក់ពង្រាយ​នៅ​កន្លែង​កើត​ហេតុ​ផង​ដែរ។

នាវា​ចម្បាំង KD Pendekar ដែលជានាវាវាយប្រហារ​ល្បឿន​លឿនលំដាប់ Handalan ត្រូវបានដាក់ឲ្យ​ដំណើរការក្នុងកងនាវា​ម៉ាឡេស៊ី​នៅថ្ងៃទី​២៧ខែកក្កដា​ឆ្នាំ១៩៧៩។ វា​គឺជា​នាវា​មួយក្នុងចំណោម​នាវា​ចំនួន​៤​គ្រឿង ដែលត្រូវបានសាងសង់ដោយរោងចក្រ​ផលិតកប៉ាល់ Kalskrona Varvet របស់ប្រទេសស៊ុយអែត។

KD Pendekar មានប្រវែង ៤៣,៦​ម៉ែត្រ ហើយ​បានបំពាក់កាំភ្លើងធំ Bofors ប្រវែង​៥៧​មិល្លិម៉ែត្រ កាំភ្លើង​ធំ​​ប្រវែង​៤០​មិល្លិម៉ែត្រ និងមីស៊ីល​ប្រឆាំងនាវា Exocet៕

ដោយ៖ ឈាង