ប្រជាជនមីយ៉ាន់ម៉ា សម្រុករត់ចេញពីប្រទេសទៅ ឥណ្ឌា

ក្រុមមន្រ្តីឥណ្ឌាបាននិយាយកាលពីថ្ងៃសៅរ៍ទី៦ខែមីនាថា ជនជាតិមីយ៉ាន់ម៉ាជាច្រើននាក់ បា​នប្រមូលផ្តុំគ្នានៅឯព្រំដែនជាប់ប្រទេសឥណ្ឌា រង់ចាំចូលរួមជាមួយមនុស្សប្រហែល៥០នាក់ដែលបានឆ្លងកាត់ព្រំដែនរួចទៅហើយ ដើម្បីរត់ចេញពីភាពចលាចលនៃរដ្ឋប្រហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនឹងនេះ អាជ្ញាធរមីយ៉ាន់ម៉ាបានស្នើឲ្យឥណ្ឌាប្រគល់ប៉ូលិស៨នាក់ ដែលបានរត់គេចខ្លួននៅសប្តាហ៍នេះមកវិញ។

មន្ត្រីជាន់ខ្ពស់នៅក្នុងកងកម្លាំងប្រដាប់អាវុធ Assam Rifles បានប្រាប់ AFP ថា ជនជាតិមីយ៉ាន់ម៉ាចំនួន៤៨នាក់ រួមទាំងប៉ូលិស៨នាក់ផងដែរ បានចូលក្នុងរដ្ឋ Mizoram ភាគឦសានប្រទេសឥណ្ឌា។

មន្ត្រីរូបនោះបាននិយាយក្នុងលក្ខខណ្ឌអនាមិកថា “មានជនស៊ីវិលយ៉ាងតិច៨៥នាក់មកពីប្រទេសមីយ៉ាន់ម៉ា បាននិងកំពុងរង់ចាំនៅឯច្រកព្រំដែនអន្តរជាតិដើម្បីចូលប្រទេសឥណ្ឌា”។

របាយការណ៍ប្រព័ន្ធផ្សព្វផ្សាយឥណ្ឌាបាននិយាយថា អ្នកដែលឆ្លងកាត់ព្រំដែនរួមមានប៉ូលិសនិងមន្រ្តីមូលដ្ឋានដែលបដិសេធធ្វើតាមបទបញ្ជាយោធា។

បាតុកម្មប្រឆាំងរដ្ឋប្រហារទម្លាក់មេដឹកនាំស៊ីវិលលោកស្រីអ៊ុងសានស៊ូជី បានរីករាលដាលពាសពេញប្រទេសមីយ៉ាន់ម៉ា ចាប់តាំងពីថ្ងៃទី១ខែកុម្ភៈមក។ កងកម្លាំងសន្តិសុខ បានបង្កើនការបង្ក្រាបយ៉ាងសាហាវឃោរឃៅទៅលើក្រុមបាតុករ ដោយបានសម្លាប់មនុស្សជាង៥០នាក់៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ កាន់តែផ្ទុះកំហឹង អាជ្ញាធរមីយ៉ាន់ម៉ាគាស់សាកសព Kyal Sin មកវិញព្រោះមិនអស់ចិត្ត

ចុចអាន៖ ក្រុមប្រឹក្សាសន្តិសុខរបស់ UN បរាជ័យចាត់វិធានការរួមគ្នាលើប្រទេសមីយ៉ាន់ម៉ា