អ្នកនយោបាយណែនាំច្បាប់ប្រឆាំងការចាក់វ៉ាក់សាំង ទីបំផុតស្លាប់ដោយសារកូវីដ

អ្នកនយោបាយប្រេស៊ីលម្នាក់ ដែលបានណែនាំច្បាប់ហាមឃាត់ការចាក់វ៉ាក់សាំងកូវីដជាកំហិត ទីបំផុតបានស្លាប់ដោយសារជំងឺនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកច្បាប់ឈ្មោះ Silvio Antonio Favero អាយុ៥៤ឆ្នាំ បានទទួលមរណភាពនៅមន្ទីរពេទ្យឯកជនមួយក្នុងទីក្រុង Cuiaba នៃប្រទេសប្រេស៊ីលកាលពីថ្ងៃសៅរ៍។

លោក Favero ដែលជាអនុប្រធានសភានីតិបញ្ញត្ដិ Mato Grosso do Sul របស់គណបក្សសេរីនិយមសង្គម (PSL) បានសម្រាកព្យាបាលក្នុងមន្ទីរពេទ្យចាប់តាំងពីថ្ងៃទី៤ខែមីនាមក និងត្រូវបញ្ជូនទៅកាន់ផ្នែកសង្គ្រោះបន្ទាន់ដោយសារតែជំងឺកូវីដ១៩។

ក្រុមវេជ្ជបណ្ឌិតនិយាយថា គាត់បានស្លាប់ដោយសារផលវិបាកនិងរោគដែលបង្កឡើងដោយវីរុសនេះ។

លោក Favero បានណែនាំនូវសេចក្តីព្រាងច្បាប់មួយ ដែលបច្ចុប្បន្នកំពុងត្រូវបានពិនិត្យនៅក្នុងសភានីតិប្បញ្ញត្តិ ប្រឆាំងនឹងភាពចាំបាច់នៃការចាក់វ៉ាក់សាំងការពារជំងឺកូវីដ១៩។

លោកអះអាងថា សេចក្តីព្រាងច្បាប់នេះនឹងធានាសិទ្ធិរបស់ពលរដ្ឋក្នុងការសម្រេចថាតើ ពួកគេចង់ចាក់វ៉ាក់សាំងឬក៏អត់។ ចំពោះអនីតិជន លោក Favero ជឿជាក់ថា ជម្រើសគឺអាស្រ័យលើឪពុកម្តាយឬអាណាព្យាបាលរបស់ពួកគេ។

លោក Favero បាននិយាយអំពីសេចក្តីព្រាងច្បាប់ដែលស្នើឡើងនេះថា “វាមានគោលបំណងការពារការចាក់វ៉ាក់សាំងទាំងការបង្ខិតបង្ខំ ពីព្រោះបច្ចុប្បន្ននេះ មានភាពមិនប្រាកដប្រជាអំពីប្រសិទ្ធភាពនិងផលប៉ះពាល់ដែលអាចកើតមានពីវ៉ាក់សាំង។ ផលប៉ះពាល់នៃវ៉ាក់សាំង មិនទាន់ត្រូវបានគេដឹងនៅឡើយទេ”។

គួរបញ្ជាក់ថា ឥឡូវនេះ ប្រទេសប្រេស៊ីលបានចុះបញ្ជីការឆ្លងចំនួន ១១,៥២៥,៤៧៧ករណី ខណៈចំនួនអ្នកស្លាប់បានកើនឡើងដល់ ២៧៩,៦០២នាក់។ នេះជាចំនួនអ្នកស្លាប់និងរីករាលដាលបំផុតខ្លាំងបំផុតនៅលើពិភពលោកបន្ទាប់ពីសហរដ្ឋអាមេរិក៕

ប្រែសម្រួលដោយ៖ Vann Vann

ប្រភព៖​ Daily Mail

ចុចអាន៖ ធ្ងន់ធ្ងរខ្លាំងណាស់! មនុស្សម្នាក់ស្លាប់រាល់៥០វិនាទីម្តងនៅប្រេស៊ីល ដោយសារកូវីដ

ចុចអាន៖ ធ្ងន់ធ្ងរពេក អ្នកជំងឺកូវីដក្នុងប្រទេសប្រេស៊ីល ត្រូវទុកឲ្យស្លាប់នៅក្រៅបន្ទប់សង្គ្រោះបន្ទាន់ព្រោះអស់កន្លែងដាក់