លោតផ្លោះក្នុងពិធីបុណ្យភ្លើងនៅអ៊ីរ៉ង់ ស្លាប់ និងរងរបួសជាង ១,០០០ នាក់

ទីភ្នាក់ងារសារព័ត៌មានអ៊ីរ៉ង់ ISNA បានរាយការណ៍ដោយដកស្រង់សំដីរបស់ប្រធានអង្គការសង្គ្រោះបន្ទាន់របស់ប្រទេសអ៊ីរ៉ង់ថា យ៉ាងហោចណាស់មានមនុស្ស ៣ នាក់បានស្លាប់ និង ១,០៣០ នាក់ផ្សេងទៀតបានរងរបួសក្នុងអំឡុងពេលនៃការប្រារព្ធពិធីបុណ្យ Chaharshanbe Suri ឬពិធីបុណ្យភ្លើងនៅប្រទេសអ៊ីរ៉ង់កាលពីថ្ងៃអង្គារ ។

លោក Pir Hossein Kolivand បាននិយាយថា មនុស្សសរុបចំនួន ៨០ នាក់ត្រូវបានកាត់ដៃជើងដោយសារតែរងរបួសធ្ងន់ធ្ងរ និង ៣៤២ នាក់ផ្សេងទៀតបានរងរបួសភ្នែករបស់ពួកគេ បន្ទាប់ពីពួកគេលោតផ្លោះភ្លើង និងកាំជ្រួចនៅក្នុងពិធីអបអរនេះ ។

ការប្រារព្ធពិធីនេះត្រូវបានធ្វើឡើង ទោះបីជាអាជ្ញាធរតម្រូវឲ្យបញ្ចៀសការប្រមូលផ្តុំជាសាធារណៈដើម្បីការពារការរីករាលដាលនៃជំងឺកូវីដ ១៩ ក៏ដោយ ។

ពិធីបុណ្យភ្លើងត្រូវបានប្រារព្ធធ្វើឡើងជារៀងរាល់ឆ្នាំដោយប្រជាជនអ៊ីរ៉ង់នៅមុនថ្ងៃបុណ្យចូលឆ្នាំថ្មីដែលគេហៅថា Nowruz ដែលចាប់ផ្តើមនៅថ្ងៃទី ២១ ខែមីនាឆ្នាំនេះ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ អ៊ីរ៉ង់ព្រមានឆ្លងកូវីដរលកទី ៤ នៅថ្ងៃបុណ្យចូលឆ្នាំថ្មី

ចុចអាន ៖ អ៊ីរ៉ង់ឲ្យសហរដ្ឋអាមេរិកដកទណ្ឌកម្មទាំងអស់ មុនពេលចរចា