អ្នកសាធារណរដ្ឋ ត្រៀមលុយឲ្យលោក ត្រាំ យកទៅទិញកោះ Greenland ពីដាណឺម៉ាក

បណ្តាអ្នកសាធារណរដ្ឋនៅក្នុងសភាតំណាងរាស្រ្តអាមេរិកដែលសុទ្ធសឹងជាជំនិតរបស់លោក ដូណាល់ ត្រាំ បានបង្ហាញនូវសំណើច្បាប់ភ្ជាប់ជាមួយវិក្កយបត្រមួយ ដែលនឹងអនុញ្ញាតឲ្យសហរដ្ឋអាមេរិក បើកការចរចាទិញយកកោះ Greenland ពីប្រទេសដាណឺម៉ាក ភ្លាមៗបន្ទាប់ពីប្រធានាធិបតីជាប់ឆ្នោតរូបនេះ ចូលកាន់តំណែងជាផ្លូវការនៅថ្ងៃទី២០ខែមករាខាងមុខ។

តាមការចុះផ្សាយរបស់ Fox News កាលពីថ្ងៃចន្ទទី១៣ខែមករាឆ្នាំ២០២៥, សំណើច្បាប់ដែលគេហៅថា Make Greenland Great Again ត្រូវបានបង្ហាញដោយសមាជិកសភាលោក Andy Ogles ហើយមានការគាំទ្រពីអ្នកឧបត្ថម្ភចំនួន១០រូបទៀត ប៉ុន្តែក្នុងនោះមិនលាតត្រដាងអំពីទំហំទឹកប្រាក់ឡើយ។

កាលពីសប្តាហ៍មុន ក្នុងសន្និសីទសារព័ត៌មាននៅ Mar-a-Lago លោកត្រាំ បានប្រកាសថា លោកអាចប្រើកម្លាំងយោធាឬវិធានការសេដ្ឋកិច្ច ដើម្បីយកមិនត្រឹមតែកោះ Greenland ទេប៉ុន្តែក៏អាចយកព្រែកជីកបាណាម៉ា មកគ្រប់គ្រងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកនិយាយថា «យើងត្រូវការពួកគេសម្រាប់សន្តិសុខសេដ្ឋកិច្ច។ វាចាំបាច់ណាស់សម្រាប់សន្តិសុខរបស់អាមេរិក។ Greenland មានសារៈសំខាន់ផ្នែកយោធា ដើម្បីតាមដាននាវាចិននិងរុស្ស៊ី។ ខ្ញុំកំពុងនិយាយអំពីការការពារពិភពលោកសេរី»។

ជុំវិញរឿងនេះដែរ នាយករដ្ឋមន្ត្រី Greenland លោក Mute Egede បាន​លើក​ឡើង​ថា រដ្ឋាភិបាលរបស់លោកកំពុងស្វែងរកមធ្យោបាយដើម្បីធ្វើកិច្ចសហប្រតិបត្តិការជាមួយអាមេរិក ហើយបានត្រៀមខ្លួនរួចជាស្រេចដើម្បីចាប់ផ្តើមកិច្ចសន្ទនាជាមួយរដ្ឋបាលលោក ត្រាំ ប៉ុន្តែលោកបានសង្កត់ធ្ងន់ថា កិច្ច​សន្ទនា​នេះ​​នឹងអាស្រ័យ​លើ​ Greenland ក្នុង​​ការ​សម្រេច​ចិត្ត​ថា​ត្រូវ​ធ្វើ​ដូចម្ដេច។

Greenland គឺជាដែនដីស្វយ័តរបស់ដាណឺម៉ាក ដែលស្ថិតក្រោមការគ្រប់គ្រងរបស់ប្រទេសនេះអស់រយៈពេលជាង៦០០ឆ្នាំមកហើយ។ វាស្ថិតនៅចន្លោះមហាសមុទ្រអាត្លង់ទិកនិងអាកទិក ត្រូវ​បាន​គ្របដណ្ដប់ដោយផ្ទាំងទឹកកក​ប្រមាណ​ ៨០% និងជាជម្រករបស់មូលដ្ឋានយោធាអាមេរិកដ៏ធំមួយ។ 

កោះដ៏ធំបំផុតរបស់ពិភពលោក​មួយ​នេះ មានរដ្ឋធានីនៅជិតទីក្រុងញូវយ៉ក ជាងរដ្ឋធានីកូប៉ិនហាករបស់ដាណឺម៉ាក ហើយ​សម្បូរ​​ធនធានរ៉ែ ប្រេង និងឧស្ម័នធម្មជាតិ ប៉ុន្តែការអភិវឌ្ឍ​មានសភាពយឺតយ៉ាវ ដែលធ្វើឲ្យសេដ្ឋកិច្ចរបស់ខ្លួន​ត្រូវ​ពឹងផ្អែកលើការនេសាទ និងការឧបត្ថម្ភធនប្រចាំឆ្នាំពីប្រទេសដាណឺម៉ាក៕

អត្ថបទ៖ សុខ សុវណ្ណ

ចុចអាន៖ Greenland ចង់​ជួប​លោក ត្រាំ និយាយ​ពី​រឿង​ការពារ​ជាតិ និង​ជីក​រ៉ែ