ជំងឺមហារីក បានសម្លាប់ប្រជាជនថៃប្រមាណ ៨៦ ០០០​នាក់ក្នុងមួយឆ្នាំៗ

យោងតាមរដ្ឋមន្ត្រីសុខាភិបាលថៃ ជំងឺមហារីកបានសម្លាប់ប្រជាជនថៃ ៨៦ ០០០​នាក់ក្នុងមួយឆ្នាំៗ និងមានករណីជំងឺមហារីកថ្មីចំនួន ១៤០ ០០០ជារៀងរាល់ឆ្នាំ។ នេះបើយោងតាមការចេញផ្សាយរបស់ The Nation។

រដ្ឋមន្ត្រីសុខាភិបាលសាធារណៈលោក Somsak Thepsutin បាននិយាយ​ក្នុង​​ទិវា​មហារីក​ពិភពលោកឆ្នាំ​២០២៥នៅ​ផ្សារ​ទំនើប CentralWorld កាលពីថ្ងៃអង្គារ​ទី​៤​ខែ​កុម្ភៈ​ឆ្នាំ​២០២៥​ថា ជាមធ្យមមានករណីមហារីកថ្មីចំនួន ៣៨៦ ត្រូវបានរាយការណ៍ដោយមន្ទីរពេទ្យក្នុងមួយថ្ងៃៗ ខណៈអ្នកជំងឺមហារីកជាមធ្យម ២៣២នាក់បានស្លាប់ជារៀងរាល់ថ្ងៃ។ លើសពីនេះ បច្ចុប្បន្ន មហារីកមាត់ស្បូនថ្មីប្រហែល ៥ ៣២០ករណី ត្រូវបានធ្វើរោគវិនិច្ឆ័យជារៀងរាល់ឆ្នាំ។ ស្ត្រី​អាយុ​ពី​៣០​ដល់​៦០​ឆ្នាំ​​ដែល​ត្រូវ​បានរកឃើញមានជំងឺ​មហារីក​មាត់ស្បូន​ក្នុង​រយៈពេល​២០​ឆ្នាំ​មក​នេះ ​មានប្រមាណ ​២១​លាន​ករណី។

ជា​លទ្ធផល ក្រសួងសុខាភិបាលថៃ​កំពុង​កែលម្អ​សេវា​វេជ្ជសាស្រ្ដ ដើម្បី​ជួយ​សង្គ្រោះ​ជីវិត​អ្នក​ជំងឺ​មហារីក។ ក្រសួងសុខាភិបាលសាធារណៈបានអនុវត្តវិធានការដ៏ទូលំទូលាយសម្រាប់ការពិនិត្យ និងព្យាបាលជំងឺមហារីកដែល​ជួយ​ជីវិតមនុស្សជាច្រើន។ គោលនយោបាយរបស់ក្រសួង បាន​អនុញ្ញាតឱ្យប្រជាជនស្ថិត​នៅ​ក្រោមគម្រោងថែទាំសុខភាពជាសកល និង​ទទួលបានការព្យាបាលគ្រប់ទីកន្លែង ហើយ​អ្នកជំងឺមហារីកអាចទទួលបានការថែទាំ​ឆាប់​រហ័ស និង​លឿនជាងមុន។

ការិយាល័យសន្តិសុខសុខភាពជាតិថៃ (NHSO) ក៏បានបែងចែកប្រាក់ចំនួន ៩ ពាន់លានបាតក្នុងមួយឆ្នាំសម្រាប់ការព្យាបាលជំងឺមហារីក។ ក្នុង​ចំណោម​ថវិកា​នេះ ៧ពាន់​លាន​បាត​ត្រូវ​បញ្ជូន​ទៅ​មន្ទីរពេទ្យ​ធំ​ៗ​ដែល​មាន​សាលា​ពេទ្យ។ចំណែក​២​ពាន់​លាន​បាត​ទៀត​ទៅ​មន្ទីរពេទ្យ​របស់​​ក្រសួង​សុខាភិបាល​សាធារណៈ។ នៅទូទាំងប្រទេស​ថៃមានមន្ទីរពេទ្យចំនួន ១០០០ ដែលដំណើរការដោយក្រសួងសុខាភិបាល​ តែយ៉ាងណាមន្ទីរពេទ្យ​សុខភាព​សាធារណៈ​នៅ​តែ​ប្រឈម​នឹង​ការ​ខ្វះខាត​អ្នកជំនាញព្យាបាលជំងឺមហារីក៕

អត្ថបទ៖ ប៊ុន សុភាព