ស្រ្តីដំបូងគេលើលោក ផ្តល់កំណើតកូន មានអង់ទីគ័រការពារជំងឺកូវីដ១៩ក្រោយចាក់វ៉ាក់សាំងតែមួយដូស

ម្ដាយម្នាក់ក្នុងរដ្ឋ Florida បានក្លាយជាស្ត្រីដំបូងគេនៅសហរដ្ឋអាមេរិក ដែលផ្តល់កំណើតដល់កូន ហើយត្រូវបានគេដឹងថា កើតមកមានអង់ទីគ័រការពារជំងឺកូវីដ១៩។

ស្ត្រីដែលមិនបញ្ចេញឈ្មោះរូបនេះមកពីតំបន់ Palm Beach។ នាងបានទទួលវ៉ាក់សាំងកូវីដរបស់ក្រុមហ៊ុន Moderna មួយដូស ប៉ុន្មានសប្តាហ៍មុនពេលសម្រាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែមករា ទារិកាត្រូវបានគេរកឃើញថាមានអង់ទីគ័រប្រឆាំងនឹងការឆ្លង ដែលជាធម្មតាអាចមាននៅក្នុងខ្លួនរយៈពេលច្រើនឆ្នាំ។

វេជ្ជបណ្ឌិតផ្នែកជំងឺកុមារ លោក Paul Gilbert បានប្រាប់ស្ថានីយ៍ទូរទស្សន៍ក្នុងស្រុក WPBF ថា “តាមការដឹងរបស់យើង នេះជាលើកដំបូងហើយនៅលើពិភពលោកដែលត្រូវបានគេរាយការណ៍ថា ក្មេងកើតមកមានអង់ទីគ័របន្ទាប់ពីម្តាយចាក់វ៉ាក់សាំង”។

ការសិក្សាកន្លងមកបានបង្ហាញថា ស្ត្រីមានផ្ទៃពោះដែលទទួលបានការចាក់វ៉ាក់សាំងប្រឆាំងនឹងជំងឺផ្តាសាយ តេតាណូស រោគខាន់ស្លាក់និងក្អកមាន់ បានចម្លងអង់ទីគ័រតាមរយៈសុកទៅកូនរបស់ពួកគេ។

ខណៈពេលដែលវាត្រូវបានគេរំពឹងថាក៏នឹងក្លាយជាការពិតសម្រាប់វ៉ាក់សាំងកូវីដដែរនោះ ការស្រាវជ្រាវត្រូវបានកំណត់លើប្រធានបទនេះ។

អ្នកនិពន្ធការសិក្សានេះនិយាយថា ម្តាយដែលជាបុគ្គលិកផ្នែកថែទាំសុខភាពជួរមុខ មានផ្ទៃពោះ៣៦សប្តាហ៍ នៅពេលនាងបានទទួលវ៉ាក់សាំង Moderna ដូសដំបូង។

បីសប្តាហ៍ក្រោយមកពោលគឺនៅចុងខែមករា ស្ត្រីរូបនេះបានផ្តល់កំណើតដល់ទារិកាដែលមានសុខភាពល្អ ហើយក្រុមគ្រូពេទ្យបានយកសំណាកឈាមដើម្បីពិនិត្យមើលថាតើ ម្តាយបានបញ្ជូនអង់ទីគ័រទៅកូនដែលទើបនឹងកើតរបស់នាងដែរឬទេ។

ការធ្វើតេស្តបង្ហាញថា ទារិកាមានអង់ទីគ័រ IgG ដែលជាប្រូតេអ៊ីន ដែលរាងកាយផលិតក្នុងដំណាក់កាលចុងក្រោយនៃការឆ្លងរោគ ហើយអាចរក្សាវត្តមានក្នុងរយៈពេលរហូតដល់ច្រើនខែឬអាចច្រើនឆ្នាំបន្ទាប់ពីមនុស្ស ជាសះស្បើយ។

វេជ្ជបណ្ឌិតផ្នែកជំងឺកុមារម្នាក់ទៀតឈ្មោះ Chad Rudnick បានប្រាប់ WPBF ថា “នេះគឺជាករណីដ៏កម្រ។ យើងត្រូវការការសិក្សាបន្ថែម ដើម្បីកំណត់ថាតើការការពារនេះនឹងមានរយៈពេលយូរប៉ុនណា”៕

ប្រែសម្រួលដោយ៖ Vann Vann

ប្រភព៖ Daily Mail