ក្ដៅៗ! រដ្ឋអាជ្ញាកូរ៉េខាងត្បូងរឹបអូស និងដាក់ដេញថ្លៃផ្ទះរបស់អតីតប្រធានាធិបតីលោកស្រី Park Geun-hye

រដ្ឋអាជ្ញាកូរ៉េខាងត្បូងនៅថ្ងៃអង្គារនេះបានរឹបអូសផ្ទះរបស់អតីតប្រធានាធិបតីលោកស្រី Park Geun-hye ហើយនឹងដាក់ដេញថ្លៃវា បន្ទាប់ពីលោកស្រីខកខានមិនបានបង់ប្រាក់ពិន័យចំនួន ១៩ លានដុល្លារពីបទពុករលួយ ។

លោកស្រី Park ត្រូវបានចោទប្រកាន់ក្នុងឆ្នាំ ២០១៧ បន្ទាប់ពីការតវ៉ាប្រឆាំងនឹងអំពើពុករលួយផ្តោតលើការចោទប្រកាន់ដែលលោកស្រីបានអនុញ្ញាតឲ្យមិត្តភក្តិជិតស្និទ្ធជ្រៀតជ្រែកនៅក្នុងកិច្ចការរបស់ជាតិ ហើយត្រូវបានជាប់ពន្ធនាគាររយៈពេល ២០ ឆ្នាំពីបទទទួលសំណូក និងរំលោភអំណាច ។

តំណាងការិយាល័យរដ្ឋអាជ្ញាប្រចាំនៅក្រុងសេអ៊ូលបានប្រាប់ AFP ថា លោកស្រីមិនបានបង់ប្រាក់ពិន័យសរុបចំនួន ២១.៥ ពាន់លានវ៉ុនតាមការកំណត់កាលពីខែមុន ហើយអាជ្ញាធរបានរឹបអូសយកផ្ទះរបស់លោកស្រី Park” ។

លោកបានបន្ថែមថា ពួកគេបានស្នើសុំឲ្យអ្នកទទួលជាផ្លូវការលក់វានៅឯការដេញថ្លៃជាសាធារណៈ ។

ផ្ទះពីរជាន់របស់លោកស្រី Park នៅក្នុងសង្កាត់អ្នកមាននៅភាគខាងត្បូងទីក្រុងសេអ៊ូលត្រូវបានគេប៉ាន់ស្មានតម្លៃ ២.៨ ពាន់លានវ៉ុន នៅពេលតុលាការបង្កកទ្រព្យសម្បត្តិរបស់លោកស្រីនៅឆ្នាំ ២០១៨ ។ នេះបើយោងតាមរបាយការណ៍របស់ប្រព័ន្ធផ្សព្វផ្សាយ ។

រួមទាំងការរំលោភច្បាប់បោះឆ្នោតរយៈពេលពីរឆ្នាំជាប់គ្នាផងដែរនោះលោកស្រី Park ជាប្រធានាធិបតីស្ត្រីដំបូងបង្អស់របស់ប្រទេសប្រឈមនឹងការជាប់ពន្ធនាគាររយៈពេល ២២ ឆ្នាំ ហើយលោកស្រីអាចនឹងឈានដល់វ័យ ៨០ ឆ្នាំប្រសិនបើលោកស្រីបញ្ចប់ការកាត់ទោសពេញលេញ ។

គួរបញ្ជាក់ថា រហូតមកដល់ពេលនេះអតីតប្រធានាធិបតីដែលកំពុងរស់នៅក្នុងប្រទេសកូរ៉េខាងត្បូងចំនួន ៤ នាក់ហើយត្រូវបានផ្តន្ទាទោសពីបទឧក្រិដ្ឋ នៅពេលគូប្រជែងនយោបាយរបស់ពួកគេបានធ្វើទៅជាប្រធានាធិបតីនៅឯសេតវិមាន ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ តុលាការកាត់ទោសអតីតប្រធានាធិបតីកូរ៉េខាងត្បូង ជាប់ពន្ធនាគារ ២០ ឆ្នាំ

ចុចអាន ៖ កូរ៉េខាងត្បូងពង្រាយយន្តហោះចម្បាំង ក្រោយយន្តហោះចិន និងរុស្ស៊ី ១៩ គ្រឿងចូលក្នុងតំបន់ការពារដែនអាកាស