អ្នកស្ម័គ្រចិត្តធ្វើតេស្តវ៉ាក់សាំងកូវីដម្នាក់បាត់បង់ជីវិតតែការសាកល្បងនៅតែបន្ត

ការសាកល្បងវ៉ាក់សាំងកូវីដដែលបង្កើតឡើងដោយក្រុមហ៊ុន AstraZeneca និងសាកលវិទ្យាល័យ Oxford នឹងនៅតែបន្តទៅមុខទៀតបន្ទាប់ពីការពិនិត្យមើលអំពីការស្លាប់របស់អ្នកស្ម័គ្រចិត្តម្នាក់នៅក្នុងប្រទេសប្រេស៊ីល។

អាជ្ញាធរសុខាភិបាលរបស់ប្រេស៊ីលមិនបានផ្តល់ព័ត៌មានលម្អិតអំពីការស្លាប់នេះទេដោយសម្អាងលើតម្រូវការរក្សាការសម្ងាត់។

ប៉ុន្តែសាកលវិទ្យាល័យ Oxford និយាយថា “ការវាយតម្លៃដោយប្រុងប្រយ័ត្ន” មិនបានបង្ហាញពីការព្រួយបារម្ភអំពីសុវត្ថិភាពអ្វីឡើយ។

មានតែអ្នកស្ម័គ្រចិត្តប្រហែលពាក់កណ្តាលប៉ុណ្ណោះដែលត្រូវបានផ្តល់វ៉ាក់សាំងកូវីដពិតប្រាកដរបស់សាកលវិទ្យាល័យ Oxford។ ក្រុមទី២កំពុងទទួលការចាក់វ៉ាក់សាំងដែលមានអាជ្ញាប័ណ្ណសម្រាប់សម្រាប់ជំងឺរលាកស្រោមខួរក្បាល។

ទាំងអ្នកចូលរួមនិងក្រុមគ្រួសាររបស់ពួកគេមិនដឹងថាតើពួកគេត្រូវបានចាក់វ៉ាក់សាំងមួយណានោះទេ។

ការធ្វើបែបនេះអាចឲ្យអ្នកស្រាវជ្រាវប្រៀបធៀបលទ្ធផលសម្រាប់ក្រុមទាំងពីរដើម្បីវាស់វែងថាតើវ៉ាក់សាំងមានប្រសិទ្ធភាពដែរឬក៏អត់។

ក្រុមហ៊ុន AstraZeneca បាននិយាយនៅក្នុងសេចក្តីថ្លែងការណ៍មួយថា ខ្លួនមិនអាចធ្វើអត្ថាធិប្បាយលើករណីបុគ្គលបានឡើយប៉ុន្តែខ្លួនអាចបញ្ជាក់បានថា ដំណើរការត្រួតពិនិត្យតាមតម្រូវការទាំងអស់ត្រូវបានអនុវត្តតាម។

មានក្តីសង្ឃឹមខ្ពស់ថា វ៉ាក់សាំងរបស់ Oxford និង AstraZeneca អាចជាថ្នាំដំបូងគេដែលនឹងមាននៅក្នុងទីផ្សារ។

វាទទួលបានជោគជ័យក្នុងការសាកល្បងដំណាក់កាលទី១និងទី២ខណៈពេលដែលការសាកល្បងដំណាក់កាលទី៣កំពុងត្រូវបានអនុវត្តទៅលើអ្នកចូលរួមនៅក្នុងប្រទេសនានារួមមានចក្រភព អង់គ្លេស ប្រេស៊ីលនិងឥណ្ឌាជាដើម។

ការសាកល្បងវ៉ាក់សាំងរបស់ Oxford ត្រូវបានផ្អាកកាលពីខែមុនបន្ទាប់ពីមានផលប៉ះពាល់លើអ្នកជំងឺនៅក្នុងចក្រភពអង់គ្លេសប៉ុន្តែបន្តឡើងវិញនៅប៉ុន្មានថ្ងៃក្រោយនៅពេលដែលវាត្រូវបានគេគិតថាមានសុវត្ថិភាព៕

ប្រែសម្រួលដោយ៖ Vann Vann

ចុចអាន៖ ពិតឬយ៉ាងណាថាលោកtrumpមាន​កូវីដ ហើយចុះបើលោកbidenក៏ឆ្លងដែរការបោះឆ្នោតទៅជាយ៉ាងណា?

ចុចអាន៖ ប្រជុំតាមzoomបែបណា អាច​ការពារសុវត្ថិភាព​បានពីពួក hackers

ប្រភព៖ BBC