ព័ត៌មានអន្ដរជាតិ

ក្រុមវេជ្ជបណ្ឌិតនៅប៉ារីសព្រមានកន្លែង ICU នឹងមានអ្នកជំងឺកូវីដ-១៩លើសលប់ឆាប់ៗ

បានផុស

៣ years មុន

នៅ

ថ្ងៃចន្ទ ២៩ មីនា ២០២១

ដោយ

វេជ្ជបណ្ឌិតជាច្រើនមកពីក្រុមមន្ទីរពេទ្យរដ្ឋក្នុងទីក្រុងបារី (AP-HP) បានព្រមានថា ពួកគេបានកំពុងត្រៀមខ្លួនដើម្បីទទួលអ្នកជំងឺច្រើនលើសលប់នៅកន្លែងសង្គ្រោះបន្តាន់ក្នុងរយៈពេលពីរសប្តាហ៍ខាងមុខ ខណៈកូវីដ-១៩កំពុងផ្ទុះខ្លាំងនៅប្រទេសបារាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់កាសែតJournal du Dimanche កាលពីថ្ងៃអាទិត្យថា វេជ្ជបណ្ឌិតសង្គ្រោះបន្ទាន់៤១នាក់បានចង្អុលបង្ហាញពី«ធនធានដែលមានគឺមិនគ្រប់គ្រាន់នឹងតម្រូវការ» និងព្រមានថា «យើងដឹងហើយថា លទ្ធភាពរបស់ពួកយើងនឹងហួសពីតម្រូវការ»នៅក្នុងរយៈពេលពីរសប្តាហ៍ខាងមុខ។

ប្រភពនិយាយថា ៖«យើងនឹងបង្ខំឲ្យជ្រើសរើសថាតើអ្នកជំងឺបែបណាដែលត្រូវចូលកន្លែងសង្គ្រោះបន្ទាន់ (ICUs) និងអ្នកជំងឺបែបណាដែលមិនត្រូវចូលកន្លែងសង្គ្រោះបន្ទាន់ដើម្បីរក្សាអាយុជីវិតតាមលទ្ធភាពដែលអាចធ្វើទៅបាន។ ចំនួនអ្នកជំងឺច្រើននឹងមានទាំងអ្នកជំងឺកូវីដ-១៩ និងអ្នកជំងឺផ្សេងៗ ជាពិសសទាក់ទងទៅនឹងការទទួលបានការព្យាបាលចំាបាច់សម្រាប់អ្នកជំងឺពេញវ័យ»។

យោងតាមទិន្នន័យចេញផ្សាយដោយអាជ្ញាធរសុខាភិបាលបារាំង Santé Publique France ថា កាលពីយប់ថ្ងៃសៅរ៍កន្លងទៅ អ្នកជំងឺ១៤២៩នាក់ចូលកន្លែងសង្គ្រោះបន្ទាន់នៅតំបន់ Ile-de-France តែមួយដែលស្ថិតនៅទីក្រុងបារីស។

ប្រធានទីភ្នាក់ងារសុខាភិបាលតំបន់ (ARS) Ile-de-France លោក Aurélien Rousseau បានសរសេរលើបណ្តាញសង្គមថា កាលពីសប្តាហ៍មុន តំបន់របស់លោកត្រូវការគ្រែសង្គ្រោះបន្ទាប់ចំនួន២២៥០ដើម្បីដោះស្រាយចំពោះអ្នកជំងឺឆ្លងកូវីដ-១៩ ដែលកំពុងកើនឡើង។

វេជ្ជបណ្ឌិតនៅទីក្រុងបារីសបានសរសេរនៅលើទំព័រកាសែតរបស់ពួកគេថា ពួកគេមិនដែលជួបស្ថានភាពបែបនេះទេពីមុន សូម្បីកំឡុងពេលការវាយប្រហារភារវកម្មដ៏អាក្រក់បំផុតកាលពីឆ្នាំ២០១៥ ដែលសម្លាប់មនុស្ស១៣០នាក់ និងរបួស៤៩៤នាក់។

ពួកគេបានបន្ថែមថា ៖«សូចនាករទាំងអស់បង្ហាញថា វិធានការណ៍បច្ចុប្បន្ននឹងមិនគ្រប់គ្រាន់ទៅនឹងការចម្លងដែលកំពុងកើនឡើងគួរឲ្យព្រួយបារម្ភទេ»។

ប្រទេសបារាំងបានបញ្ជាក់ករណីឆ្លងកូវីដ-១៩ជាង៤.៥លាននាក់ និងស្លាប់៩៤៤៩២នាក់ចាប់តាំងពីជំងឺនេះចាប់ផ្តើមដែលបានក្លាយជាប្រទេសឆ្លងលំដាប់ទី៤នៅក្នុងពិភពលោក បន្ទាប់ពីអាមេរិក ប្រេស៊ីល និងឥណ្ឌា៕

ប្រែសម្រួល៖ វីរបុត្រ
ប្រភព៖ CNN