អ្នកជំនាញថា អាកាសធាតុក្តៅមិនអាចកាត់បន្ថយការចម្លងវីរុសកូវីដ-១៩បានទេ

ទោះបីជាអាកាសធាតុក្ដៅក៏ដោយ ក៏ពុំមានន័យថា ការរីករាលដាលនៃវីរុសកូវីដ-១៩ ត្រូវបានកាត់បន្ថយឡើយ។ នេះបើតាមការលើកឡើងរបស់អ្នកជំនាញមកពីសហរដ្ឋអាមេរិក។

ដោយឡែក ​ការសិក្សាស្រាវជ្រាវពីមុនៗជាច្រើនបានផ្តល់នូវក្តីសង្ឃឹមខ្លះថា កម្តៅខ្លាំងអាចបន្ថយល្បឿននៃការរីករាលដាលនៃវីរុស។ ប៉ុន្តែអ្នកឯកទេសខាងជំងឺឆ្លងនិយាយថា គ្មានភស្តុតាងណាមួយអាចបញ្ជាក់ច្បាស់ឡើយថា វីរុសផ្សេងៗថយចុះអត្រាចម្លងក្នុងអំឡុងរដូវក្តៅ។ កត្តាតុណ្ហភាពកើនឡើងក៏ដោយ ក៏មិនមែនមានន័យថាវានឹងល្អដែរ។

យ៉ាងណាមិញ ការស្រាវជ្រាវដំបូងមួយចំនួននិយាយថា សីតុណ្ហភាពនិងសំណើមមានទំនាក់ទំនងជាមួយកម្រិតថយចុះឬកើនឡើងនៃការរីករាលដាលរបស់វីរុសកូវីដ-១៩ ។

ការវិភាគរបស់អ្នកវិទ្យាសាស្ត្រនៅឯវិទ្យាស្ថានបច្ចេកវិទ្យា ម៉ាសាឈូសេត សហរដ្ឋអាមេរិក ចុះផ្សាយតាមអ៊ិនធរណេតនៅថ្ងៃទី ១៩ ខែមីនា ឆ្នាំ២០២០ បានរកឃើញថា ការឆ្លងវីរុសកូវីដ-១៩ កើតឡើងច្រើនបំផុតនៅក្នុងតំបន់ដែលមានសីតុណ្ហភាពជាមធ្យមប្រចាំឆ្នាំចន្លោះពី ២.៧៨ អង្សារទៅ ១៧.២២ អង្សាសេ។ រីឯចំនួនករណីសរុបនៅក្នុងប្រទេសដែលមានសីតុណ្ហភាពជាមធ្យមលើសពី ១៧.៧៨ អង្សារគឺមានតែ ៦% ប៉ុណ្ណោះ។

ចំណែកការសិក្សាដែលចេញផ្សាយនៅក្នុងខែមីនា ឆ្នាំមុនដែរ ដោយអ្នកស្រាវជ្រាវចិនបានរកឃើញថា មុនពេលរដ្ឋាភិបាលចិនចាប់ផ្តើមរឹតត្បិត ទីក្រុងនានាដែលមានអាកាសធាតុក្តៅនិងសើមមានអត្រាឆ្លងទាបជាងមុន។

រីឯការបោះពុម្ភផ្សាយមួយទៀត ដោយអ្នកស្រាវជ្រាវមកពីប្រទេសអេស្ប៉ាញនិងហ្វាំងឡង់បានរកឃើញថា ៩៥% នៃការបង្ករោគទូទាំងពិភពលោកបានកើតឡើងនៅសីតុណ្ហភាពចន្លោះប្រហែល -២.២២ អង្សាសេ ទៅ ១០ អង្សាសេ ហើយក្នុងអាកាសធាតុស្ងួត វា​បានបន្ថយករណីឆ្លងថ្មី។

ទាក់ទិននឹងអំណះអំណាងខាងលើ ​លោកស្រី Elizabeth McGraw នាយកមជ្ឈមណ្ឌលរោគរាតត្បាតនៃសាកលវិទ្យាល័យ Pennsylvania មានប្រសាសន៍ថា “ដំណក់ទឹកដែលផ្ទុកវីរុសមិនទុកចោលក្នុងខ្យល់ស្ងួតយូរទេ ហើយសីតុណ្ហភាពកាន់តែក្តៅនាំឱ្យមេរោគងាប់រហ័សជាងសីតុណ្ហភាពត្រជាក់” ។

ទោះយ៉ាងណា ការរីករាលដាលនៃជំងឺកូវីដ-១៩ថ្មីៗបានបង្ហាញផងដែរថា អាកាសធាតុក្តៅនិងសើមនឹងមិនអាចបញ្ឈប់ការឆ្លងមេរោគបានទាំងស្រុងទេ។ ជាក់ស្ដែងនៅប្រទេសថៃក្ដី ឬនៅកម្ពុជាក្ដី សុទ្ធតែបានរកឃើញករណីឆ្លងថ្មីកើនឡើង បើទោះបីស្ថិតក្នុងអាកាសធាតុក្ដៅក៏ដោយ។

ពាក់ព័ន្ធនឹងករណីនេះ លោក Thomas Bollyky នាយកកម្មវិធីសុខភាពពិភពលោកមកពីក្រុមប្រឹក្សាទំនាក់ទំនងបរទេសដែលមានមូលដ្ឋាននៅទីក្រុងវ៉ាស៊ីនតោន មានប្រសាសន៍ថា “រដូវក្តៅមិនអាចកំណត់ពីការថយចុះកម្រិតឆ្លងឡើយ ហើយមានតែការស្នាក់នៅផ្ទះ ការរក្សាគម្លាតសង្គម ក៏ដូចជារក្សាអនាម័យផ្ទាល់ខ្លួនប៉ុណ្ណោះ ទើបគ្រប់គ្នាអាចធានាបានសុវត្ថិភាពខ្ពស់”៕

ប្រែសម្រួល៖ សន្យា

ប្រភព៖ TIME

ចុចអាន៖ កុំខំតែពាក់ម៉ាសនិងលាងដៃ ហើយភ្លេចរឿងសំខាន់ៗប៉ុន្មាននេះ

ចុចអាន៖ វ៉ាក់សាំង​អាច​មាន​ប្រសិទ្ធភាព​តិច បើ​ចាក់​ឲ្យ​អ្នក​កំពុង​ឆ្លង​កូវីដ ហើយ​គ្រូពេទ្យ​ណែនាំ​ប្រើ​ពេល​នេះ​វិញ