ព័ត៌មានអន្ដរជាតិ

[វិចារណកថា] ទាហានថៃជាន់មីន បញ្ជាក់ថា ទាហានថៃឈ្លានពានទន្ទ្រានចូលទឹកដីកម្ពុជា

បានផុស

២២ វិនាទី មុន

នៅ

ថ្ងៃសៅរ៍ ១៩ កក្កដា ២០២៥

ដោយ

សារព័ត៌មានថៃក្នុងប៉ុន្មានថ្ងៃនេះបានផ្សាយត្រឡប់ត្រឡិនជុំវិញឧបទ្ទវហេតុជាន់មីនរបួសទាហានថៃ៣នាក់នៅក្នុងទឹកដីកម្ពុជានៅតំបន់មុំបី តាមការអះអាងគ្មានមូលដ្ឋានរបស់មេបញ្ជាការភូមិភាគ២របស់ថៃដែលកំពុងល្បីខាងពន្យុះឲ្យទាហានក្រោមបង្គាប់ចូលទន្ទា្រនចូលដីកម្ពុជា និងពលរដ្ឋថៃដែលមានជាតិនិយមជ្រុលចូលទៅតំបន់ជម្លោះដើម្បីបង្កើនភាពតានតឹងរវាងកងទ័ពនៃប្រទេសទាំងពីរ។

លោក ប៊ុន ស៊ិន ប៉ាកក្លាង (Boonsin Padklang) បានផ្តល់បទសម្ភាសន៍ក្នុងពេលកន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីការអះអាងគ្មានមូលដ្ឋាន ត្រឡប់ត្រឡិន របស់មេបញ្ជាការភូមិភាគ២ថៃ លោក ប៊ុន ស៊ិន ប៉ាកក្លាង (Boonsin Padklang) មិនស៊ីសង្វាក់គ្នាជាមួយអង្គភាពជំនាញមីន ក៏ដូចជា អនុរដ្ឋមន្ត្រីការពារជាតិថៃ លោក Nattaphon Narkphanit ដែលស្នើកម្ពុជាដោះមីន និងសំណល់គ្រាប់ផ្ទុះសល់ពីសង្គ្រាម ភាគីថៃក៏គ្រោងប្តឹងទៅអន្តរជាតិរឿងគ្រាប់មីនដែលកម្ពុជាដោះមិនទាន់អស់នេះទៀត។ ប៉ុន្តែអ្វីកាន់តែជាក់ច្បាស់នោះ គឺភាគីថៃកំពុងតែធ្វើឲ្យពលរដ្ឋខ្លួនឯងវិលខួរក្បាល តាមមិនទាន់ព័ត៌មានដែលក្រុមយោធាព្យាយាមកុហក បំភ្លៃ ក្រឡៃការពិតប្រវត្តិសាស្ត្រ។

ជាមួយគ្នានេះអង្គភាពជំនាញមីន និងគ្រាប់មិនទាន់ផ្ទុះនៅកម្ពុជា បានចេញបញ្ជាក់យ៉ាងច្បាស់ថា កម្ពុជាគ្មានដាក់គ្រាប់ ឬបង្កប់មីនថ្មីនោះទេ។

ឧបទ្ទវហេតុជាន់គ្រាប់មីនដែលបង្ករបួសរហូតដល់៣នាក់ និងបណ្តាលឲ្យទាហានថៃម្នាក់របួសរហូតដាច់ជើង ក្នុងពេលដើរល្បាតបែបបង្ករឿងនៅក្នុងតំបន់មុំ៣ដែលប្រឈមដាក់គ្នា បង្ហាញថា យោធាថៃកំពុងតែទន្ទ្រានចូលបូរណៈភាពទឹកដីរបស់កម្ពុជាពិតប្រាកដ ដែលភាគីថៃមិនអាចប្រកែកបាន និងទទួលស្គាល់ការពិតជាក់ស្តែង បើទោះបីជាថៃប្រឹងក្រឡៃការពិតយ៉ាងណាក្តីក្នុងពេលកន្លងមក។

លោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីដែលត្រូវព្យួរពីអំណាចទៅមើលទាហានដែលជាន់មីនរបួសនៅមន្ទីរពេទ្យ។ FB

ការជាន់មីនផ្ទុះដ៏កក្រើកហាក់ដូចជាចាក់ចំបេះដូងនៃមេដឹកនាំថៃ ក៏ដូចជាជនជាតិថៃគ្រប់រូបឲ្យដឹងពីពុតត្បុតអាក្រក់របស់ក្រុមមេយោធាស្រេកឃ្លានសង្គ្រាម និងបង្កហេតុឈ្លានពាន។ ឧបទ្ធវហេតុជាន់មីនរងរបួសលើក្រុមយោធាថៃនៅតំបន់មុំបីក្នុងស្រុកជាំក្សាន្ត មានទីតាំងស្ថិតនៅលើដងភ្នំរែក ក្នុងខេត្តព្រះវិហារនៃប្រទេសកម្ពុជា ប្រឈមព្រំប្រទល់ខេត្តអ៊ូប៊ុននៃប្រទេសថៃ និងខេត្តចំប៉ាសាក់របស់ប្រទេសឡាវ គឺជាការគាស់កកាយនូវរឿងអាថ៌កំបាំងដែលយោធាថៃ និងរដ្ឋាភិបាលថៃតែងតែបំភ្លៃព័ត៌មានកុហកប្រជាជនខ្លួនឯង និងសាធារណៈជនទូទៅនៅក្នុងពិភពលោក ដូច្នោះដែរ។

ក្រុមមេបញ្ជាការយោធាថៃមួយចំនួន និងជាពិសេសមេបញ្ជាការភូមិភាគ២របស់ថៃ លោកឧត្តមសេនីយ៍ទោ ប៊ុន ស៊ិន ប៉ាកក្លាង (Boonsin Padklang) ដែលគេស្គាល់ថា ជាមេបញ្ជាការនាំភ្លើងសង្គ្រាមមកកាន់ព្រំដែនកម្ពុជានិងនាំភាពក្តៅក្រហាយដល់ប្រជាជននៃប្រទេសទាំងពីរ សុទ្ធតែបានអះអាងជារឿយៗអំពីការការពារបូរណៈភាពទឹកដីរបស់ខ្លួន ក៏ប៉ុន្តែ ឧបទ្ធវហេតុជាន់មីនផ្ទុះដាច់ជើងទាហានថៃ គឺជារឿងដ៏អាម៉ាសរបស់យោធាថៃបកអាក្រាត ដែលពួកគេតែងតែបំភ្លៃ និង បំភ្លើសផ្ទុយពីការពិត លើការអះអាងលើការប្រឈមដាក់គ្នាពីចំណុចមុំ៣ រាលដាល់ដល់តំបន់ផ្សេងៗទៀតតាមបណ្តោយព្រំដែន ក៏ដូចជាវិស័យជាច្រើន ដូចជា ពាណិជ្ជកម្ម ថាមពល ទូរគមនាគមន៍ សន្តិសុខផ្ទៃក្នុង។

រឿងដែលគួរឲ្យអាម៉ាសបំផុតនោះ គឺការអះអាងផ្ទុយគ្នាស្រឡះ របស់មេបញ្ជាការយោធាភូមិភាគ២ លោក ប៊ុនស៊ិន ប៉ាកក្លាង និង អង្គភាពសកម្មភាពកម្ចាត់មីនថៃ ( MAU) លើហេតុការណ៍ផ្ទុះមីនតែមួយនោះ ដោយ លោក ប៊ុនស៊ិន ប៉ាកក្លាង បានអះអាងប្រាប់កាសែតថៃថា ទាហានរបស់ខ្លួនជាន់គ្រាប់មីនជាសំណល់ពីសង្គ្រាមយូរមកហើយ ប៉ុន្តែ អង្គភាពសកម្មភាពកម្ចាត់មីនថៃ ( MAU) វិញ បែរជាលើកឡើងថា តំបន់នោះក្នុងទឹកដីថៃ គឺត្រូវបានដោះមីនរួចអស់ហើយ និង មីនដែលជាន់ផ្ទុះនោះជាប្រភេតមីនបង្កប់ថ្មី។

ការអះអាងខុសគ្នារបស់អង្គភាពនិងមេដឹកនាំយោធាប្រចាំតំបន់គឺជារឿងអាម៉ាស់ណាស់ទៅហើយ ប៉ុន្តែការពិតមួយក៏ត្រូវបានបញ្ជាក់ពីក្នុងរឿងនេះដែរ គឺថា ចំណុចដែលផ្ទុះគឺជាទឹកដីរបស់កម្ពុជា ហើយទាហានថៃពិតជាបានដើរល្បាតរុលនិងទន្ទា្រនចូលទឹកដីកម្ពុជា ដែលមានចរិកបង្កហេតុ បង្កើតអរិភាព និង បង្កសង្គ្រាម យ៉ាងប្រាកដ។

មានហេតុផល២យ៉ាង អាចបញ្ជាក់ច្បាស់លាស់ថា ទីតាំងជាន់មីនរបស់ទាហានថៃជាទឹកដីកម្ពុជា៖

ទី១៖ មីនត្រូវបានបង្កប់តែក្នុងទឹកដីកម្ពុជាប៉ុណ្ណោះ

ទី ២៖ ក្នុងករណីមីនត្រូវបានបង្កប់ថ្មី ក៏យោធាកម្ពុជាបង្កប់នៅក្នុងទឹកដីកម្ពុជា ដើម្បីការពារទាហានចោរឈ្លានប៉ុណ្ណោះ

ភាពមិនស៊ីគ្នាដែលភាគីថៃអះអាងគឺនៅត្រង់ថា មេបញ្ជាការភូមិភាគ២ថៃ ចេញមុខនិយាយភ្លាមៗថា មីននោះជាសំណល់សម័យសង្គ្រាមត្រូវបានបង្កប់យូរមកហើយ ខណៈអង្គភាពសកម្មភាពកម្ចាត់មីនថៃ ( MAU) បានលើកឡើងថា មីននោះជាការបង្កប់ថ្មីថ្មោង ព្រោះថា ក្នុងទឹកដីថៃនៅតំបន់នោះត្រូវពួកគេបានសម្អាតរួចរាល់ហើយ។

សារព័ត៌មានថៃ បានរាយការណ៍ដោយដកស្រង់របាយការណ៍ចុងក្រោយដែលចេញផ្សាយនៅថ្ងៃទី ១៧ខែកក្កដា របស់អង្គភាពសកម្មភាពកំចាត់មីន (MAU) ដែលបញ្ជាក់ថា ផ្ទៃដីបៃតងដែលជាកន្លែងកំចាត់មីនដែលត្រូវបាន MAU បោសសម្អាត និងកម្ទេចចោលនោះ ត្រូវបានផ្ទៀងផ្ទាត់តាមរយៈរបាយការណ៍រូបភាព ថា ជាមីនប្រភេទ «PMN-2» ថ្មី ដែលសន្មតថាជាមីនដែលទើបដាក់ថ្មី។ បើសិនការបង្កប់ថ្មីជាការពិត នោះគឺជាទឹកដីកម្ពុជា។

ទោះបីជាគ្រាប់មីនទាំងនោះ បន្សល់ពីសម័យសង្គ្រាមស៊ីវិលក្នុងប្រទេសកម្ពុជាមុនទសវត្សរ៍ឆ្នាំ៩០ គឺសុទ្ធតែនៅលើទឹកដីរបស់កម្ពុជាប៉ុណ្ណោះ ដោយសារតែទាហានកម្ពុជាមិនអាចចូលទៅបង្កប់ក្នុងទឹកដីថៃដែលពួកគេអះអាងថា បានសម្ពាតទីតាំងនោះរួចហើយទេ ដោយមិនបាច់និយាយទៅដល់ពេលនៃការប្រឈមមុខដាក់គ្នាថ្មីៗនេះនោះទេ។

ភស្តុតាងនៃការឈ្លានពានចូលទឹកដីកម្ពុជាគឺច្បាស់ក្រឡែតតែម្តង។ តាមរយៈការបកស្រាយពីអង្គភាពសកម្មភាពកម្ចាត់មីនថៃ ( MAU) និង មេបញ្ជាការភូមិភាគ២របស់ថៃ ប្រៀបបាននឹងការទទួលស្គាល់ខ្លួនឯងថា «ជាចោរឈ្លានពាន់» ស្រេកឃ្លានទឹកដីដូច្នោះដែរ៕