ព្យុះភ្លៀងនៅ​តំបន់​កាស្មៀរ​ ប្រទេសឥណ្ឌា​ សម្លាប់មនុស្ស​៤៦​នាក់ និង​ជាង​២០០​នាក់​បាត់​ខ្លួន

យោងតាមការចេញផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៥ខែសីហា ភ្លៀងធ្លាក់ខ្លាំងមួយរំពេចបង្កជាទឹកជំនន់ភ្លាមៗនិងបំណាក់ដីនៅក្នុងទីប្រជុំជន Chasoti ស្រុក Kishtwar ទីក្រុង Jammu និងតំបន់ Kashmir បានសម្លាប់មនុស្សយ៉ាងហោចណាស់ ៤៦ នាក់ និងបានធ្វើឱ្យមនុស្សជាង ២០០នាក់បាត់ខ្លួន។

គ្រោះមហន្តរាយនេះបានកើតឡើងនៅវេលាម៉ោង ១១ និង ៣០ នាទីព្រឹក នៅពេលដែលទឹកជំនន់ភ្លាមៗបានលេបត្របាក់ផ្ទះបាយ និងប៉ុស្តិ៍សន្តិសុខមួយដែលបង្កើតឡើងសម្រាប់អ្នកធ្វើធម្មយាត្រាដែលធ្វើដំណើរទៅកាន់ទីសក្ការបូជា Machail Mata ។ ជនរងគ្រោះជាច្រើនគឺជាអ្នកធ្វើធម្មយាត្រាដែលបានឈប់នៅទីនោះដើម្បីញ៉ាំអាហារថ្ងៃត្រង់មុនពេលបន្តដំណើររបស់ពួកគេ។

កិច្ចខិតខំប្រឹងប្រែងជួយសង្គ្រោះកំពុងដំណើរការជាមួយប៉ូលិស ក្រុមឆ្លើយតបគ្រោះមហន្តរាយ កងទ័ព និងកងទ័ពអាកាសទោះបីទីតាំងដាច់ស្រយាលក៏ដោយ។ សោកនាដកម្ម​នេះ​កើត​ឡើង​តែ​ជាង​មួយ​សប្តាហ៍​បន្ទាប់​ពី​មាន​ទឹក​ជំនន់​ស្រដៀង​គ្នា​នេះ​នៅ​ក្នុង​ខេត្ត Uttarakhand ដែលបណ្ដាលឲ្យបាត់ខ្លួនមនុស្សជាង១០០នាក់បាត់ខ្លួនដែរ។

គួរបញ្ជាក់ថាបើតាមនាយកដ្ឋានឧតុនិយមរបស់ប្រទេសឥណ្ឌា ព្យុះភ្លៀង គឺជាភ្លៀងធ្លាក់ខ្លាំងលើសពី ១០០ មីលីម៉ែត្រក្នុងមួយម៉ោង មានសមត្ថភាពអាចបង្កឱ្យមានទឹកជំនន់ភ្លាមៗ និងបំណាក់ដី ជាពិសេសនៅតំបន់ភ្នំក្នុងរដូវខ្យល់មូសុង។ មកដល់ពេលនេះភ្នាក់ងារអាកាសធាតុឥណ្ឌាបានព្រមានអំពីភ្លៀងធ្លាក់ខ្លាំងបន្ថែមទៀត និងបំណាក់ដីដែលអាចកើតមាននៅក្នុងតំបន់នេះ ដោយបានជំរុញឱ្យអ្នកស្រុកនៅតែបន្តរក្សាការប្រុងប្រយ័ត្ន៕

អត្ថបទ៖ ប៊ុន សុភាព