ជនសង្ស័យបាញ់សម្លាប់ Charlie Kirk បដិសេធមិនសហការជាមួយអ្នកស៊ើបអង្កេត

អាជ្ញាធរក្នុងរដ្ឋ Utah កំពុងស្វះស្វែងដើម្បីកំណត់មូលេហេតុនៅពីក្រោយការសម្លាប់សកម្មជនអភិរក្សនិយមលោក Charlie Kirk បន្ទាប់ពីជនសង្ស័យដែលត្រូវបានចាប់ខ្លួនឈ្មោះ Tyler Robinson អាយុ២២ ឆ្នាំបានបដិសេធមិនសហការជាមួយអ្នកស៊ើបអង្កេត។ នេះបើយោងតាមការចេញផ្សាយរបស់សារព័ត៌មាន CNA។

Robinson នឹងត្រូវបានចោទប្រកាន់ជាផ្លូវការនៅថ្ងៃអង្គារ ហើយអ្នកស៊ើបអង្កេតកំពុងសាកសួរជាមួយមិត្តភក្តិ និងក្រុមគ្រួសាររបស់ជនសង្ស័យដើម្បីដឹងពីមូលហេតុពីក្រោយការបាញ់ប្រហារ បើទោះបីជារូបគេមិនព្រមសហការក៏ដោយ។

គួររម្លឹកថាលោក Kirk ដែលជាសម្ព័ន្ធមិត្តជិតស្និទ្ធរបស់លោក ដូណាល់ ត្រាំ និងជាសហស្ថាបនិកនៃ Turning Point USA ត្រូវបានបាញ់សម្លាប់នៅកអំឡុងពេលព្រឹត្តិការណ៍មួយនៅខាងក្រៅសាកលវិទ្យាល័យ Utah Valley ដែលមានមនុស្សចូលរួមចំនួន៣ពាន់។ ការបាញ់ប្រហារនេះ ជនសង្ស័យបានបាញ់ចេញពីដំបូលផ្ទះ នៅមិនឆ្ងាយពីកន្លែងប្រមូលផ្ដុំប៉ុន្មាននោះទេ។

បន្ទាប់ពីការតាមប្រមាញ់អស់រយៈពេល ៣៣ ម៉ោង Robinson ដែលជានិស្សិតនៅមហាវិទ្យាល័យបច្ចេកទេស Dixie Technical College ត្រូវបានចាប់ខ្លួននៅផ្ទះឪពុកម្តាយរបស់គាត់។ យោង​តាម​ សាច់​ញាតិ​បាន​រាយការណ៍​ថា Robinson ជាប់​ពាក់ព័ន្ធ​នឹង​ការ​វាយ​ប្រហារ​នេះ ហើយ​ធ្លាប់​បាន​សម្ដែង​ការ​មិន​ពេញ​ចិត្ត​ចំពោះ Kirk កន្លង​មក។

សមាជិកគ្រួសារម្នាក់ក៏បានប្រាប់ក្រុមអ្នកស៊ើបអង្កេតថា Robinson ប្រែក្លាយជាអ្នកចូលចិត្តនយោបាយកាន់តែខ្លាំងឡើងក្នុងប៉ុន្មានឆ្នាំចុងក្រោយនេះ ហើយអាជ្ញាធរនិយាយថា រូបគេក៏ឆ្លាក់សារប្រឆាំងរបបហ្វាស៊ីស លើសម្បកគ្រាប់កាំភ្លើង ដែលគេបានរកឃើញជាមួយអាវុធប្រើក្នុងការសម្លាប់នោះ។ ​មិត្តរួមបន្ទប់របស់ Robinson ក៏កំពុងតែសហការណ៍ជាមួយ FBI ដែរ។

គួរបញ្ជាក់ថាការ​បាញ់​ប្រហារ​នេះ​បាន​ធ្វើ​ឲ្យ​អ្នក​អភិរក្ស​និយម​ជា​ច្រើន​ខឹង​សម្បា និងជំរុញឱ្យមានការព្រួយបារម្ភអំពីការកើនឡើងនៃអំពើហិង្សាផ្នែកនយោបាយនៅក្នុងសហរដ្ឋអាមេរិក៕

អត្ថបទ៖ ប៊ុន សុភាព