អង់គ្លេស​ត្រៀម​ទទួល​ស្គាល់​រដ្ឋ​ប៉ាឡេស្ទីន​ ចំពេល​មាន​ការ​ប្រឆាំង​របស់​អាមេរិក

កាសែត The Times នៅថ្ងៃទី១៨ខែកញ្ញា នេះបានរាយការណ៍ថា ចក្រភពអង់គ្លេសត្រូវបានគេរំពឹងថានឹងទទួលស្គាល់រដ្ឋប៉ាឡេស្ទីនជាផ្លូវការនៅចុងសប្តាហ៍នេះ បន្ទាប់​ពី​ប្រធានាធិបតី​សហរដ្ឋ​អាមេរិកលោក ដូណាល់​ទ្រាំ​បញ្ចប់​ដំណើរ​ទស្សនកិច្ច​ផ្លូវ​រដ្ឋ​នៅចក្រភពអង់គ្លេស។

នាយករដ្ឋមន្ត្រីអង់គ្លេសលោក Keir Starmer បាននិយាយកាលពីខែកក្កដាថា ចក្រភពអង់គ្លេសនឹងចាត់វិធានការនេះ ប្រសិនបើអ៊ីស្រាអែលមិនបន្ធូរបន្ថយការវាយប្រហារនៅតំបន់ហ្គាហ្សា ឬយល់ព្រមលើបទឈប់បាញ់ក្នុងសង្គ្រាមជិតពីរឆ្នាំរបស់ខ្លួនជាមួយក្រុមហាម៉ាស។

ប្រទេសផ្សេងទៀត រួមទាំងបារាំង កាណាដា និងអូស្ត្រាលី ក៏បាននិយាយរួចហើយដែរថា ពួកគេមានគម្រោងទទួលស្គាល់ប៉ាឡេស្ទីនក្នុងខែនេះ។ យ៉ាង​ណា​ក៏​ដោយ អ៊ីស្រាអែល​ប្រឆាំង​យ៉ាង​ខ្លាំង​ចំពោះ​ចំណាត់​ការ​នេះ ដោយ​លើក​ហេតុផល​ថា នេះ​គ្រាន់​តែ​ផ្តល់​រង្វាន់​ដល់​ក្រុម​ហាម៉ាសប៉ុណ្ណោះ។

សហរដ្ឋអាមេរិកក៏បានព្រមានប្រឆាំងនឹងការទទួលស្គាល់ផងដែរ។ ទោះបីជាដំបូងលោក ត្រាំ បាននិយាយថាលោកមិនប្រកាន់ក៏ដោយ ក៏សហរដ្ឋអាមេរិកបានបញ្ជាក់យ៉ាងច្បាស់ថា ខ្លួនមិនគាំទ្រសកម្មភាពបែបនេះរបស់សម្ព័ន្ធមិត្តឡើយ។

គួរបញ្ជាក់ថាជាច្រើនឆ្នាំមកនេះ ចក្រភពអង់គ្លេសបានគាំទ្រគំនិតនៃ «ដំណោះស្រាយរដ្ឋពីរ» ដែលមានន័យថា អ៊ីស្រាអែលឯករាជ្យ និងប៉ាឡេស្ទីនរស់នៅក្បែរគ្នា។ ប៉ុន្តែរហូតមកដល់ពេលនេះ មេដឹកនាំអង់គ្លេសបាននិយាយថា ការទទួលស្គាល់គួរតែកើតឡើងនៅពេលដែលពេលវេលាត្រឹមត្រូវប៉ុណ្ណោះ។ ការសម្រេចចិត្តរបស់លោក Starmer បង្ហាញពីការផ្លាស់ប្តូរយ៉ាងច្បាស់លាស់នៅក្នុងគោលនយោបាយ ដែលជំរុញដោយស្ថានភាពមនុស្សធម៌កាន់តែអាក្រក់នៅក្នុងតំបន់ហ្គាហ្សា៕

អត្ថបទ៖ ប៊ុន សុភាព