សុខភាព

ជំងឺស្ទះសរសៃវ៉ែនខួរក្បាល!

បានផុស

៣ years មុន

នៅ

ថ្ងៃព្រហស្បតិ៍ ២២ មេសា ២០២១

ដោយ

នៅថ្ងៃទី១០ ខែមេសា ឆ្នាំ២០១៧ វេលាម៉ោង៦ល្ងាចបន្ទាប់ពីត្រឡប់ពីធ្វើការមកដល់ផ្ទះ ប្អូនប្រុស ឃុន សារិទ្ធិ មានអាការៈឈឺក្បាល អស់កម្លាំងល្ហិតល្ហៃ រួចបានចូលទៅបន្ទប់ទឹក ស្រាប់តែមានអការៈប្រកាច់ និងបាត់បង់ស្មារតី។ អការៈដូចនេះតែងកើតមានឡើង៦ដងក្នុងមួយថ្ងៃ ដោយមានរោគសញ្ញាបន្ថែម ដូចជាខ្សោយកម្លាំង និងស្ពឹកដៃជើងមួយចំហៀងខាងស្តាំលើកមិនរួច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយដឹងខ្លួនមានស្ថានភាពមិនស្រួល ប្អូនសារិទ្ធិ បានហៅមិត្តភក្ដិឲ្យជូនទៅពិនិត្យនៅមន្ទីរឯកជនដែលនៅជិតផ្ទះ។ ដោយស្ថានភាពនៃជំងឺមានសភាពធ្ងន់ធ្ងរ គ្រូពេទ្យបានសម្រេចបញ្ជូនអ្នកជំងឺទៅកាន់មន្ទីរពេទ្យរដ្ឋមួយនិងបានទទួលការព្យាបាល ប៉ុន្តែដោយសារឧបករណ៍មិនគ្រប់គ្រាន់ ក៏បានបញ្ជូនមកកាន់មន្ទីរពេទ្យកាល់ម៉ែតដើម្បីធ្វើការសង្គ្រោះ។ អ្នកជំងឺត្រូវបានបញ្ជូនចូលមកផ្នែកសង្គ្រោះបន្ទាន់ និងបន្ទាប់មកត្រូវបានបញ្ជូនមកសម្រាកព្យាបាលនៅផ្នែកប្រសាទសាស្ត្រនៃមន្ទីរពេទ្យកាល់ម៉ែត។

ក្រុមគ្រូពេទ្យឯកទេស បានប្រជុំគ្នាធ្វើការពិនិត្យគ្លីនិក និងអមគ្លីនិក ជាពិសេសគឺបានបញ្ជូនអ្នកជំងឺធ្វើការស្កេនខួរក្បាល ដោយមានការចាក់ថ្នាំជំនួយ និងស្កេនដោយម៉ាស៊ីនស្កេនទំនើប(Multibarette)ជាជំនួយផងនោះ ក្រុមគ្រូពេទ្យឯកទេសប្រសាទសាស្ត្រកំណត់បានរោគវិនិច្ឆ័យច្បាស់លាស់ជាជំងឺស្ទះសរសៃវ៉ែនខួរក្បាល (Thrombophlébite Cérébrale)។ ក្រោមការពិនិត្យព្យាបាល និងយកចិត្តទុកដាក់ខ្ពស់ពីក្រុមគ្រូពេទ្យឯកទេសប្រសាទសាស្ត្រ តាមលក្ខណៈបច្ចេកទេស ច្បាស់លាស់ក្នុងរយៈពេល១៤ថ្ងៃរួចមក ស្ថានភាពអ្នកជំងឺមានការធូរស្រាលយ៉ាងឆាប់រហ័ស ដោយអ្នកជំងឺលែងមានការប្រកាច់ទៀតហើយ ព្រមទាំងមានកម្លាំងដៃជើងប្រសើរឡើងវិញ ហើយអ្នកជំងឺអាចក្រោកឈរ និងដើរដោយខ្លួនឯងបាន។ មិនត្រឹមតែទទួលការព្យាបាលដោយក្រុមគ្រូពេទ្យឯកទេស អ្នកជំងឺក៏ត្រូវទទួលបានការព្យាបាលដោយចលនាបន្ថែមផងដែរ ដើម្បីជួយអោយស្ថានភាពអ្នកជំងឺកាន់តែឆាប់ជារសះស្បើយ និងអាចត្រលប់ចេញពីមន្ទីរពេទ្យវិញនៅថ្ងៃទី២៤ ខែមេសា ឆ្នាំ២០១៧។

អ្នកជំងឺ និងក្រុមគ្រួសារមានការសប្បាយរីករាយយ៉ាងខ្លាំងចំពោះសេវាព្យាបាលដ៏មានប្រសិទ្ធភាព របស់មន្ទីរពេទ្យកាល់ម៉ែត ដែលមានក្រុមគ្រូពេទ្យឯកទេសជាច្រើនជំនាញ ជាពិសេសក្រុមគ្រូពេទ្យឯកទេសផ្នែកប្រសាទសាស្ត្រ ព្រមទាំងមានបរិក្ខារទំនើបដែលអាចសង្គ្រោះ ជីវិតប្អូនប្រុស ឃុន សារិទ្ធិ និងជួយអោយគាត់រួចផុតពីពិការភាព ក្នុងពេលដែលម្តាយអ្នកជំងឺមានភាពអស់សង្ឃឹមទៅហើយនៅពេល ឃើញស្ថានភាពនៃជំងឺរបស់កូនប្រុសពីដំបូងនោះ។ មិនត្រឹមតែប៉ុណ្ណោះក្រុមគ្រួសារអ្នកជំងឺ បានកោតសរសើរអំពីសមត្ថភាពរបស់ក្រុមគ្រូពេទ្យ និងបុគ្គលិកទាំងអស់ដែលប្រកបដោយ ភាពរួសរាយ រាក់ទាក់ និងមានការយកចិត្តទុកដាក់ខ្ពស់ទៅលើអ្នកជំងឺ ដែលផ្ទុយពីពាក្យចចាមអារាមខាងក្រៅ ពោលគឺមន្ទីរពេទ្យកាល់ម៉ែតទទួលព្យាបាលអ្នកជំងឺដោយគ្មានរើសអើង។

ប្អូនប្រុស សារិទ្ធិ និងក្រុមគ្រួសារសូមអំពាវនាវដល់អ្នកជំងឺដែលមានអាការៈដូចគាត់សូមប្រញាប់រួសរាន់មកទទួលការពិនិត្យ ព្យាបាលនៅមន្ទីរពេទ្យកាល់ម៉ែត ជាមួយក្រុមគ្រូពេទ្យឯកទេស និងមានសម្ភារៈបរិក្ខារទំនើបជំនួយក្នុងការធ្វើរោគវិនិច្ឆ័យយ៉ាងត្រឹមត្រូវ និងធ្វើការព្យាបាលបានទាន់ពេលវេលា ព្រមទាំងទទួលបានប្រសិទ្ធភាពខ្ពស់៕

អត្ថបទ៖ រស្មី

សូមចុចអាន៖ វិធីសាស្ត្រទាំង ៧ ដើម្បីការរក្សាសុខភាពតម្រងនោម!

Related Topics:សុខភាពខួរក្បាល