សុខភាព

តើកុមារចាប់ពីអាយុ៦ឆ្នាំដល់ក្រោម១៨ឆ្នាំអាចចាក់ដូសជំរុញ ឬដូសទី៣បានឬទេ?

បានផុស

២ years មុន

នៅ

ថ្ងៃពុធ ២៩ កញ្ញា ២០២១

ដោយ

បច្ចុប្បន្ននេះកម្ពុជាបាននឹងកំពុងបើកយុទ្ធនាការចាក់វ៉ាក់សាំងការពារជំងឺកូវីដ១៩ដល់កុមារចាប់ពីអាយុ៦ឆ្នាំដល់ក្រោម១៧ឆ្នាំ ដើម្បីបង្កើតភាពស៊ាំនៅក្នុងសហគមន៍សំដៅកាត់បន្ថយការឆ្លងជំងឺកូវីដ១៩ក៏ដូចជាបើកសាលារៀននិងសេដ្ឋកិច្ចជាតិឡើងវិញ។

ប៉ុន្តែមានមាតាបិតានិងអាណាព្យាបាលជាច្រើនបានលើកឡើងថា បន្ទាប់ពីកូនចៅរបស់ពួកគាត់ចាក់វ៉ាក់ សាំងបានពីរដូសរួចហើយ តើអាចបន្តចាក់ដូសទី៣ ឬដូសជំរុញដូចមនុស្សពេញវ័យបានដែរឬទេ?។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងចម្ងល់នេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលនិងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទូទាំងប្រទេសបានមានប្រសាសន៍នៅថ្ងៃទី២៩ខែកញ្ញានេះថា ចំពោះការចាក់ដូសទី៣ ឬដូសជំរុញដល់កុមារអាយុចាប់ពី៦ឆ្នាំដល់ក្រោម១៨ឆ្នាំនេះ នៅមិនទាន់មានការសិក្សានៅឡើយទេ។

បើតាមគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខ័ណ្ឌទូទាំងប្រទេស កម្ពុជានឹងបើកយុទ្ធនាការចាក់វ៉ាក់សាំងដូសជំរុញដល់ពលរដ្ឋអាយុ១៨ឆ្នាំឡើងនៅថ្ងៃទី១១ ខែតុលា ខាងមុខនេះដោយប្រើប្រាស់វ៉ាក់សាំងស៊ីណូវ៉ាក់របស់ចិន។

លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានមានប្រសាសន៍នៅក្នុងឱកាសពិធីប្រគល់ទទួលវ៉ាក់សាំងស៊ីណូវ៉ាក់៣លានដូសដែលរាជរដ្ឋាភិបាលកម្ពុជាបានបញ្ជាទិញពីក្រុមហ៊ុនចិននាព្រឹកថ្ងៃទី២៨ ខែកញ្ញានេះថា កម្ពុជាមិនមានបញ្ហាខ្វះវ៉ាក់សាំងនោះទេទាំងសម្រាប់ចាក់ឲ្យកុមារពី៦ឆ្នាំទៅ១២ឆ្នាំ និងសម្រាប់ដូសជំរុញឬដូសទី៣ ខណៈបច្ចុប្បន្ននេះកម្ពុជាមានវ៉ាក់សាំងសម្រាប់ចាក់ដូសជំរុញចំនួនជាង៦លានដូសនៅក្នុងដៃរួចហើយ ។

គួរបញ្ជាក់ថា បច្ចុប្បន្នកម្ពុជាមានវ៉ាក់សាំងកូវីដ-១៩ ចំនួន៣៥.៥លានដូសហើយ សម្រាប់ចាក់ជូនប្រជាពលរដ្ឋ ក្នុងនោះវ៉ាក់សាំងប្រមាណ២៩.៥លានដូសជាវ៉ាក់សាំងដែលកម្ពុជាទទួលបានពីប្រទេសចិនតាមរយៈជំនួយឥតសំណង និងការបញ្ជាទិញពីក្រុមហ៊ុនចិន ។

គួរបញ្ជាក់ថា កំណើនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី២៨ ខែកញ្ញា ឆ្នាំ២០២១ មាន ៩៨,៩៤% ធៀបជាមួយចំនួនប្រជាជនគោលដៅ១០លាននាក់ និងលើកុមារ-យុវវ័យអាយុពី ១២ឆ្នាំ ទៅក្រោម១៨ឆ្នាំ មាន ៨៩,៣១% ធៀបជាមួយចំនួនប្រជាជនគោលដៅ ១,៩៦៦,៩៣១ នាក់ និងលើកុមារអាយុពី ០៦ឆ្នាំដល់ក្រោម១២ឆ្នាំមាន ៨៥,៥១% ធៀបជាមួយនឹងប្រជាជនគោលដៅ១,៨៩៧,៣៨២ នាក់៕

អត្ថបទ៖ សំអឿន

Related Topics:

Up Next

អាហារ ៦ មុខ សក្ដិសមសម្រាប់អ្នកចង់សម្រកទម្ងន់ និងកំពូលឆ្ងាញ់ហូបមិនចេះណាយ

Don't Miss

សូមស្វែងយល់ស្ត្រីមានផ្ទៃពោះ និងថ្ងៃគ្រប់ខែសម្រាប់សម្រាលកូន