រកឃើញវីរុសសាហាវមួយទៀតក្នុងសត្វចៃ ខាំត្រឹម១៥នាទីឆ្លងទៅមនុស្ស និងអាចសម្លាប់ជីវិតបាន 

នៅរដ្ឋ Pennsylvania សហរដ្ឋអាមេរិក, សត្វចៃចំនួន៩ក្បាល ក្នុងចំណោម១០ក្បាលនៅក្នុងឧទ្យានមួយ ត្រូវបានគេរកឃើញថាមានមេរោគ Powassan ដែលអាចសម្លាប់ជីវិតមនុស្សបាន។

Powassan ក៏ត្រូវបានគេហៅថាជា “មេរោគចៃជើងខ្មៅ”។ មេរោគដ៏កម្រនេះ អាចបង្កឲ្យមានការឆ្លង បណ្តាលឲ្យប៉ះពាល់សរសៃប្រសាទធ្ងន់ធ្ងរ និងយូរអង្វែង។ វាត្រូវបានចម្លង ដោយសារចៃមានផ្ទុកមេរោគ ខាំ។ រដ្ឋនេះ​បារម្ភ​ថា មេរោគ​ Powassan និង​ជំងឺ​ដែល​កើត​ពីចៃផ្សេងទៀត ​នឹង​ក្លាយ​ទៅ​ជារឿង​ធម្មតានាពេល​អនាគត។

មេរោគនេះត្រូវបានចម្លងក្នុងរយៈពេល១៥នាទីបន្ទាប់ពីចៃខាំ។

Pawassan ត្រូវបានចុះបញ្ជីជាលើកដំបូងក្នុងឆ្នាំ១៩៥២។ កុមារដំបូងដែលឆ្លងមេរោគនេះ បានបាត់បង់ជីវិត។ រហូត​មក​ដល់​ពេល​នេះ ​មិន​ទាន់​មានវ៉ាក់សាំង ឬ​ថ្នាំ​ប្រឆាំង​មេរោគនៅឡើយទេ​។ ដូច្នេះ ការ​ការពារកុំឲ្យចៃនេះខាំ ​គឺ​ជា​ការ​ប្រុង​ប្រយ័ត្ន​ដ៏​ល្អ​បំផុត។

យោងតាមមជ្ឈមណ្ឌលគ្រប់គ្រង និងបង្ការជំងឺសហរដ្ឋអាមេរិក បានឲ្យដឹងថា មនុស្សមួយចំនួនដែលឆ្លងមេរោគ Powassan មិនមានរោគសញ្ញាឡើយ។ ប៉ុន្តែ​អ្នក​ដែល​ចេញ​រោគ​សញ្ញា ​អាច​បណ្តាល​ឲ្យ​ស្លាប់បាន។

អ្នកឆ្លងមានអាការក្តៅខ្លួន ឈឺក្បាល ក្អួត និងខ្សោយកម្លាំង។ រោគសញ្ញាធ្ងន់ធ្ងររួមមាន វង្វេងស្មារតី ស្ពឹកដៃជើង ពិបាកនិយាយ និងប្រកាច់។

យោងតាមស្ថិតិបង្ហាញថា មនុស្សម្នាក់ក្នុងចំណោម១០នាក់ដែលឆ្លងមេរោគនេះ គឺត្រូវស្លាប់។ ទន្ទឹមនឹងនេះដែរ ប្រហែលពាក់កណ្តាលនៃមនុស្សឈឺធ្ងន់ គឺមានបញ្ហាសុខភាពសរសៃប្រសាទរយៈពេលយូរ។

អ្នកជំនាញណែនាំថា ចំនួនសត្វចៃដែលមានមេរោគកំពុងកើនឡើងយ៉ាងច្រើន ដោយសារការប្រែប្រួលអាកាសធាតុ។ ការកើនឡើងសីតុណ្ហភាព និងសំណើម ទំនងជារួមចំណែកដល់ការបន្តពូជ និងការរីករាលដាលនៃសត្វចៃ៕

ប្រែសម្រួល៖ Vann Vann

ប្រភព៖ Generico

ចុចអាន៖ មនុស្ស៥ប្រភេទនេះ មានហានិភ័យខ្ពស់អាចឈានដល់ស្លាប់ បើឆ្លង អូមីក្រុង