សុខភាព

កត្តាសំខាន់នៃការពិនិត្យសុខភាពទារកទូទៅ ក្នុងអំឡុងពេល ២៤ម៉ោងក្រោយកើត

បានផុស

៣ years មុន

នៅ

ថ្ងៃពុធ ៣ កុម្ភៈ ២០២១

ដោយ

អ្នកម្ដាយគ្រប់រូបតែងតែចង់បានទារករបស់ខ្លួនមានសុខភាពល្អក្រោយកើត ដើម្បីឲ្យទារកមានការលូតលាស់ល្អទាំងកាយសម្បទា និង ប្រាជ្ញាស្មារតី ដែល ជាសុភមង្គលរបស់ក្រុមគ្រួសារម្នាក់ៗប្រាថ្នាចង់បាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសារក្ដីប្រាថ្នានេះហើយ បានជាម្ដាយសឹងតែគ្រប់រូបនៅពេលមានគត៌ចាប់កំណើតនៅក្នុងផ្ទៃពោះ គាត់ចាប់ផ្ដើមមកជួបគ្រូពេទ្យដើម្បីតាមដានផ្ទៃពោះឲ្យបានទៀងទាត់តាមវេជ្ជបញ្ជារបស់គ្រូពេទ្យ ដើម្បីធានា ថាពេលទារកប្រសូតមក មានសុខភាពល្អ និងខ្លួនគាត់ផ្ទាល់ ក៏មានសុវត្ថិភាពដែរ។ ក្រោយទារកប្រសូតមក ដើម្បីបញ្ជាក់កាន់តែច្បាស់ថែមទៀតថា កូនគាត់ពិតជាកើតមកមានសុខភាពល្អ គាត់ត្រូវតែយកកូនមកពិនិត្យសុខភាពទូទៅនៅផ្នែកថែទាំទារកតាមរយៈគ្រូពេទ្យជំនាញកុមារ និងទារកផ្ទាល់ មុនពេលម្ដាយបីកូនចេញទៅផ្ទះ។

តើការពិនិត្យសុខភាពទារកទូទៅក្នុងរយៈពេលក្រោយកើតមានសារៈសំខាន់យ៉ាងណាខ្លះ?

ការពិនិត្យសុខភាពទារក គឺភាគច្រើនតែងតែអនុវត្តឡើងនៅអំឡុងពេលទារកអាយុ១ថ្ងៃ ឬ៣ថ្ងៃក្រោយកើត នៅពេលដែលទារកស្នាក់នៅជាមួយម្ដាយនៅមន្ទីរពេទ្យផ្នែកសម្ភព។

តាមរយៈគ្រូពេទ្យជំនាញផ្នែកកុមារ និងទារក ជាអ្នកធ្វើការពិនិត្យមើលទូទៅ ហើយវិធីដែលល្អបំផុត ដើម្បីងាយស្រួលដល់ការ ផ្ដល់យោបល់ និងពិភាក្សារាល់ចម្ងល់ពីទារកក្នុងការថែទាំនៅផ្ទះត្រូវតែមានក្រុមគ្រួសារទារកផ្ទាល់មកជាមួយ អាចជាយាយ អ៊ំ មីង ឬ ឪពុកម្ដាយ។

ការពិនិត្យសុខភាពទូទៅនេះ គឺផ្ដល់សារៈសំខាន់ដល់ទារក ព្រោះគ្រូពេទ្យត្រូវពិនិត្យរកមើលករណីមួយចំនួន ដែលត្រូវជៀសវាងដូចជា៖

១- ភាពមិនប្រក្រតីពីកំណើតរបស់ទារក ដើម្បីធ្វើការព្យាបាលបន្តនៅផ្នែកសង្គ្រោះទារក ឬត្រូវការព្យាបាលវះកាត់បន្ទាន់ ដូចនេះគ្រូពេទ្យត្រូវប្រាប់ក្រុមគ្រួសាររបស់ទារកពីបញ្ហាបន្ទាន់ទាំងនេះ ដើម្បីជៀសផុតពីគ្រោះថ្នាក់ជាយថាហេតុ។

២- សុខភាពទារកក្រោយកើត តើគាត់អាចបន្សាំនឹងជីវិតខាងក្រៅបានល្អឬទេ ពីព្រោះទារកមួយចំនួនក្រោយពីកើតមក គាត់ចាប់ផ្ដើមមានបញ្ហាផ្លូវដង្ហើម បញ្ហាចុះជាតិស្ករ បញ្ហាមិនបៅ ឬក៏បញ្ហាផ្សេងៗទៀតដែលទាមទារឲ្យគ្រូពេទ្យ បញ្ជូនគាត់ទៅតាមដាននៅកន្លែងសង្គ្រោះទារក។

៣- ពិនិត្យ និងស្វែងរកពីអាយុពិតប្រាកដរបស់ទារក និងទម្ងន់ពីកំណើតរបស់គាត់ ចំពោះទារកដែលកើតមិនគ្រប់ខែ ឬលើសខែ តែងតែមានបញ្ហាកើតឡើងក្រោយកើត ដូចនេះពួកគាត់ត្រូវតែបន្តការតាមដានថែទាំនៅផ្នែកព្យាបាលទារក ដោយមិនអាចឲ្យគាត់នៅជាមួយម្ដាយបានឡើយ។ ដូចគ្នានេះដែរ ចំពោះទារកដែលមានទម្ងន់ពីកំណើតតូចពេក (<2500g) ឬធំពេក(>4000g) ក៏ទាមទារការតាមដានដាច់ពីម្ដាយ ផងដែរ។

៤- ទារកដែលមានខាន់លឿង រឺក៏កើតពីម្ដាយដែលមានក្ដៅខ្លួនមុនសម្រាល រឺពេលសម្រាលគ្រូពេទ្យត្រូវធ្វើការតាមដាន និងព្យាបាលដោយនៅដាច់ពីម្ដាយដូចគ្នា។

ក្រៅពីការពិនិត្យសុខភាពទូទៅនៅផ្នែកសង្គ្រោះព្យាបាល និងថែទាំទារកនៃមន្ទីរពេទ្យកាល់ម៉ែតគឺនៅមានការពិនិត្យមើលឈាមទារក ជំងឺពីកំណើត រកមើលប្រភេទក្រុមឈាមទារក ដែលទាមទារដល់ការតាមដានព្យាបាលជាបន្ទាន់ ដើម្បីឲ្យទារករួចផុតពីពិការភាពកាយសម្បទា និងប្រាជ្ញាស្មារតី ដែលជាជំងឺអាចមើលឃើញបានទាន់ពេលវេលា និងជំងឺពីកំណើតមួយទៀត គឺកង្វះអង់ស៊ីម G6PD (Glucose 6 Phospfate De hydrogenase) ដែលទាមទារឲ្យទារកត្រូវតមចំណីអាហារ និងឱសថមួយចំនួនទៅថ្ងៃអនាគត។

ក្រៅពីការជួសឈាម មន្ទីរពេទ្យមានការឆ្លុះបេះដូងទារកតាមរយៈម៉ាស៊ីនអេកូសាស្ត្រEchocardiography រកមើលពីបញ្ហាបេះដូងពីកំណើត ដែលត្រូវការព្យាបាលវះកាត់បន្ទាន់ ឬព្យាបាលតាមដានរយៈពេលយូរ។ រាល់ព័ត៌មានទាំងអស់ដែលបានពិនិត្យទារក ព័ត៌មានក្នុងពេលកើត ទម្ងន់ពេលកើត ប្រវែងពេលកើត និង ទំហំក្បាលទារកពីកំណើត គឺមានកត់ត្រាទុកក្នុងសៀវភៅសុខភាពទារក ដើម្បីទុកជាព័ត៌មានទៅថ្ងៃក្រោយជូនក្រុមគ្រួសារទារក ពេលទារកលូតលាស់ធំទៅអនាគត។

ក្រៅពីពិនិត្យសុខភាព វេជ្ជបណ្ឌិតឯកទេសតែងតែផ្តល់អនុសាសន៍ល្អៗដល់ក្រុមគ្រួសារទារកអំពីការថែទាំទារកនៅផ្ទះ ដូចជាការចិញ្ចឹមទារកដោយទឹកដោះម្តាយ ការចាក់ថ្នាំបង្ការតាមកម្មវិធីជាតិការមុជទឹកកូន ការដាក់កូនគេងឲ្យបានត្រឹមត្រូវ ក្នុងស្ថានភាពសុវត្ថិភាព ជៀសវាងមានគ្រោះថ្នាក់ដល់ជីវិតជាយថាហេតុ។

ការពិនិត្យសុខភាពទារកទូទៅ គឺផ្តល់សារៈសំខាន់ណាស់ ទោះបីទារកកើតមកមានសុខភាពល្អក៏ដោយ ក៏ក្រុមគ្រួសាររបស់ទារកគួរយកកូនរបស់លោកអ្នកមកពិនិត្យសុខភាពឡើងវិញ នៅផ្នែកសង្គ្រោះព្យាបាល និងថែទាំទារក ដើម្បីជៀសវាងនូវបញ្ហាមួយចំនួនដូចបានរៀបរាប់ខាងលើមុនពេលទារកចេញពីមន្ទីរពេទ្យ។ សុខភាពទារក គឺជាក្ដីស្រមៃរបស់ក្រុមគ្រួសារម្នាក់ៗ ព្រោះថាទារកជាទំពាំងស្នងឬស្សី ទារកជាក្ដីសង្ឃឹមរបស់ប្រទេសជាតិ៕

អត្ថបទ៖ រស្មី

សូមចុចអាន៖ ការធ្វើសមាធិជួយយ៉ាងពិសេសដល់ម្តាយនិងទារកក្នុងអំឡុងពេលមានផ្ទៃពោះ