អ្វី​ទៅជា​ផលប៉ះពាល់​នៃ​ការប្រើប្រាស់​ថ្នាំ កូរ​ទី​កូ​អ៊ី​ត ឬក៏ ស្តេ​រយ មិនបាន​ត្រឹមត្រូវ​តាម​វេជ្ជបញ្ជា ឬ​ដោយ​គ្មាន​វេជ្ជបញ្ជា​!

​ថ្នាំពេទ្យ​ប្រភេទ កូរ​ទី​កូ​អ៊ី​ត ឬ​ក៏ ស្តេ​រយ ជា​ថ្នាំ​ដែល​គេ​ប្រើប្រាស់​សម្រាប់​ព្យាបាល រលាក​សន្លាក់ ឈឺសន្លាក់ និង​ជំងឺ​រ៉ាំរ៉ៃ​មួយចំនួនទៀត​។ ថ្នាំ​ទាំងនេះ​មាន​ប្រភេទ​ជា​ថ្នាំ​គ្រាប់ៈ (Cortancyl, Prednisone, Prednisolone,Dexamethaxone…) ដែល​បងប្អូន​ប្រជាជន​យើង​ចំណាំ​ហៅថា ថ្នាំ​គ្រាប់​ត្រសក់ ថ្នាំ​ក្រពើ​ហោះ -​ល​-​។ ប្រភេទ​ថ្នាំ​ចាក់​មានៈ (Triamcinolone methylprednisolone…)​។ ក្រៅពី​ថ្នាំលេប និង​ថ្នាំ​ចាក់ ក៏មាន​ប្រភេទ​ថ្នាំ​បឺ​តាម​មាត់ (Becotide, Serritide…) និង​ថ្នាំលាប​លើ​ស្បែក (Hydrocortisone cream, betamethasone…)​។

​ថ្នាំ​ដែល​បាន​រៀបរាប់​ខាងលើនេះ មាន​ប្រសិទ្ធភាព​ខ្ពស់​សម្រាប់​ប្រើប្រាស់​ព្យាបាល​ជំងឺ ប៉ុន្តែ​បើ​យើង​មិនបាន​គោរព​នូវ​លក្ខខណ្ឌ​វេជ្ជសាស្ត្រ​នៃ​ការប្រើប្រាស់​ថ្នាំ​ទាំង​នោះទេ វា​អាច​បណ្តាលឲ្យ​មាន​គ្រោះថ្នាក់ ហើយ​ជួនកាល​វា​អាច​គ្រោះថ្នាក់​ដល់​អាយុជីវិត​ទៀត​ផង​។​

​អ្វីដែល​យើង​សង្កេតឃើញ​កន្លងមក គឺមាន​អ្នក​ប្រកប​របរ​មិន​សុចរិត មិន​ត្រឹមត្រូវ យក​ថ្នាំ​ទាំងនេះ​ទៅប្រើ​ប្រាស់​ខុស​ក្បួន​វេជ្ជសាស្ត្រ​ដូចជា ធ្វើជា​ថ្នាំ​សូន ថ្នាំ​ឬ​ស​ឈើ​សម្រាប់​ផឹក​ឲ្យ​ហូប​បាន និង​បំបាត់​ការឈឺចាប់​ឆ្អឹងឆ្អែង ឈឺ​ចុកចាប់​សាច់ដុំ​ជាដើម​។ យើង​ក៏​សង្កេតឃើញ​ផងដែរ ថា​មាន​អ្នកខ្លះ​យក​ថ្នាំ​ទាំងនេះ​ទៅ​ចាក់ ដើម្បី​បំបាត់​ការឈឺចាប់ ដោយ​មិន​បានគិត​ស្វែងរក​រោគវិនិច្ឆ័យ​នៃ​ជំងឺ​ទេ ដូចជា ឈឺ​ត្រង់ណា​ចាក់​ត្រង់នោះ ជួនកាល​មាន​រហូតដល់​ចាក់​ចូលទៅក្នុង​សន្លាក់​ទៀតផង​។​ ​អ្វី​ទៅជា​ផលប៉ះពាល់​នៃ​ការប្រើប្រាស់​ថ្នាំ កូរ​ទី​កូ​អ៊ី​ត ឬ​ក៏ ស្តេ​រយ មិនបាន​ត្រឹមត្រូវ​?

១) ធ្វើឲ្យ​មាន​ការប្រែប្រួល​អរ​ម៉ូ​ន កូរ​ទី​កូ​អ៊ី​ត ឬ​ក៏ ស្តេ​រយ ធម្មជាតិ​នៅក្នុង​ខ្លួន​៖

​នៅពេលដែល​យើង​កំពុង​ប្រើប្រាស់​ថ្នាំ​ ដែល​បាន​រៀបរាប់​ខាងលើ​ក្នុង​រយៈពេល​យូរ និង​កម្រិត​ដូ​ស​ខ្ពស់​មិនបាន​ត្រឹមត្រូវ ពេលនោះ​អ្នកជំងឺ​លេចចេញ​នូវ​រោគសញ្ញា​ដូចជា ហើម​មុខ ធាត់​ក្បាលពោះ​ប៉ុន្តែ​អវយវៈ​ដៃជើង​តូចៗ ស្បែក​ឡើង​ផុយ​ងាយ​ជាំ រលាត់ (​សូម​មើល​រូបភាព​)​។​

​នៅពេល​អ្នកជំងឺ​ឈប់​ប្រើប្រាស់​ថ្នាំ​ទាំងនោះ ពេលនោះ​អរ​ម៉ូ​ន​ធម្មជាតិ​នៅក្នុង​ខ្លួន​យើង​មានការ​ថយចុះ ឬ​ក៏​មិន​ផលិត ពេលនោះ​ពួកគាត់​លេចចេញ​រោគសញ្ញា​ដូចជា អស់​កម្លាំង ហេវ​ហត់ ល្ហិតល្ហៃ ជាពិសេស​នៅពេល​ថ្ងៃរសៀល​ចាប់ពី​ម៉ោង ៤ សម្ពាធ​ឈាម​គាត់​ចុះ ហើយ​ជួនកាល​សម្ពាធ​ឈាម​ចុះ​រហូតដល់​មាន​គ្រោះថ្នាក់​ទៀត​ផង​។​

២) កើត​ជំងឺ​ទឹកនោមផ្អែម​៖

​កាលណា​យើង​ប្រើប្រាស់​ថ្នាំ​ប្រភេទ Corticoid ឬ​ក៏ Steroids អ្នកជំងឺ​ពេលនោះ គាត់​មាន​អាកា​រៈ​ឃ្លាន ទទួលទាន​ហូប​ឆ្ងាញ់ ទទួលទាន​បាន ជាហេតុ​ធ្វើ​ឲ្យ​គាត់​ចេញ​ជំងឺ​

​ទឹកនោមផ្អែម​។​

៣) កើត​ជំងឺ​ពុក​ឆ្អឹង​៖

​ថ្នាំ​ប្រភេទ កូរ​ទី​កូ​អ៊ី​ត ឬ​ក៏ ស្តេ​រយ ពេលដែល​យើង​ប្រើប្រាស់​រយៈពេល​យូរ វា​អាច​ធ្វើ​ឲ្យ​កំហាប់​ឆ្អឹង​ថយចុះ ពេលនោះ​អ្នកជំងឺ​ប្រឈមមុខ​នឹង​ការបាក់​ឆ្អឹងខ្នង បាក់ឆ្អឹង​ត្រគាក ។​ល​។​

៤) កើត​ជំងឺលើសឈាម​៖

​នៅពេលដែល​យើង​ទទួលទាន​ថ្នាំ កូរ​ទី​កូ​អ៊ី​ត ឬ​ក៏ ស្តេ​រយ ក្នុង​កម្រិត​មួយ​ខ្ពស់ វា​ធ្វើឲ្យ​យើង​ចាល​ជាតិ​ទឹក និង​ជាតិ​សូ​ដ្យូ​ម​នៅក្នុង​ខ្លួន ពេលនោះ​សម្ពាធ​ឈាម​យើង​កើនឡើង​។​

៥) ធ្វើឲ្យ​ប្រព័ន្ធ​ភាពស៊ាំ​ក្នុង​ខ្លួន​ថយចុះ​៖

​អ្នក​ពិសារ​ថ្នាំ កូរ​ទី​កូ​អ៊ី​ត ឬ​ក៏ ស្តេ​រយ ក្នុង​រយៈពេល​យូរ ពេលនោះ​ប្រព័ន្ធ​ភាពស៊ាំ​ក្នុង​ខ្លួន​ថយចុះ​។ ពួកគាត់​អាច​ប្រឈមមុខ​នឹង​ការកើត​ជំងឺផ្សិត (​ស្រែង​លើ​ស្បែក​) ផ្សិត​អណ្តាត រលាក​ផ្លោក​នោម រលាក​តម្រងនោម​។​ល​។ ករណី​ដែល​គេ​យក​ថ្នាំ​ទាំងនេះ​ ទៅ​ចាក់​ចូល​ក្នុង​សន្លាក់​នេះ​មិនបាន​ត្រឹមត្រូវ វា​អាចធ្វើ​ឲ្យ​មាន​ខ្ទុះ​នៅក្នុង​សន្លាក់​។​

​ផលវិបាក​ដែល​បាន​រៀបរាប់​ខាងលើ​ជា​ផលវិបាក​ ដែល​យើង​ជួបប្រទះ​ញឹកញាប់ ប៉ុន្តែ​លើសពីនោះ​ទៅទៀត​ក៏​អាចមាន​ផល​លំបាក​មួយចំនួន​ទៀតផង​ដែរ​ ក្នុងករណី​ដែល​យើង​ប្រើប្រាស់​ថ្នាំ​ទាំងនោះ​មិនបាន​ត្រឹមត្រូវ ឧទាហរណ៍​ដូចជា រលាក​ក្រពះ ដំបៅ​ក្រពះ​ជាដើម​។ ប៉ុន្តែ​ទោះបីជា​យ៉ាងណា​គេ​សង្កេតឃើញថា ​ថ្នាំ​ដែល​អាច​ឲ្យ​មាន​ផលប៉ះពាល់​ច្រើន​គឺ ថ្នាំ​ប្រភេទ​គ្រាប់​និង​ចាក់ ដោយឡែក​ថ្នាំ​ដែល​បាញ់​តាម​ម៉ាត់ ឬ​ថ្នាំ​ដែល​លាប​លើ​ស្បែក​មិនសូវមាន​ផលប៉ះពាល់​ទេ​។​

​សរុប​ជារួម​មក ដូច​ដែរ​យើង​បា​នដឹង​ស្រាប់​ហើយ​ថា ថ្នាំ​ជា​អាវុធ​មុខ​ពីរ ហេតុដូចនេះ​យើង​គួរ​គប្បី​ប្រឹក្សា​ជាមួយ​គ្រូពេទ្យ​ឲ្យ​បាន​ត្រឹមត្រូវ មុន​ទទួលទាន​ថ្នាំ​ប្រភេទ កូរ​ទី​កូ​អ៊ី​ត ឬ​ក៏ ស្តេ​រយ ដោយ​ពិសា ​ក្នុង​កម្រិត​ដូ​ស​ត្រឹមត្រូវ រយៈពេល​ត្រឹមត្រូវ ហើយ​ជៀសវាង​ទទួលទាន​ថ្នាំ​ជា​ឱសថ​បុរាណ​ក្តី ជា​ថ្នាំ​សូន​ដើម្បី​ឲ្យ​បាយ​បាន បំបាត់​ការឈឺ​ចុកចាប់​ឆ្អឹងឆ្អែង​ក្តី ដែល​មិនមាន​ប្រភព​ច្បាស់លាស់​។​

​ប្រសិន​ណា​បងប្អូន​បាន​កំពុង​និង​ប្រើ​ប្រភេទ​ថ្នាំ​ទាំងនេះ ហើយ​លេចចេញ​នូវ​រោគសញ្ញា​ដូច​បាន​រៀបរាប់​ខាងលើ សូម​ប្រញាប់​មកជួប​ជាមួយ​វេជ្ជបណ្ឌិត​ជំនាញ​នៅ​មន្ទីរពេទ្យ​កាល់ម៉ែត ដើម្បី​ជៀសវាង​នូវ​ផលវិបាក​ទាំងនេះ​៕​

អត្ថបទ៖ រស្មី

សូមចុចអាន៖ ​កា​រព្យាបាល​តម្រង​កែវភ្នែក​ស្រអាប់​ ដោយ​កាំរស្មី (YAG-Capsulotomy)

​