រដ្ឋបាលស្រុកកែវសីមា បើកការដ្ឋានសាងសង់ផ្លូវបេតុងថ្មីមួយខ្សែ សម្រួលដល់ការធ្វើដំណើរ

រដ្ឋបាលស្រុកកែវសីមា ខេត្តមណ្ឌលគិរី នៅថ្ងៃទី ១៦​ខែតុលានេះ បានបើកការដ្ឋានសាងសង់ផ្លូវបេតុងអាមេមួយខ្សែថ្មីប្រវែងជិត ១គីឡូម៉ែត្រ ស្ថិតក្នុងភូមិឡាប៉ាខេ ឃុំស្រែខ្ទុំ ដើម្បីសម្រួលដល់ការធ្វើដំណើររបស់ប្រជាពលរដ្ឋនៅក្នុងមូលដ្ឋាន។

លោក សុះ ម៉ីឡែន អភិបាលរងស្តីទីស្រុកកែវសីមា បានប្រាប់«កម្ពុជាថ្មី» ឱ្យដឹងថា ដើម្បីបំពេញតាមបេសកកម្មជំរុញការអភិវឌ្ឍសេដ្ឋកិច្ច និងបង្កើនគុណភាពជីវភាពរស់នៅរបស់ប្រជាពលរដ្ឋ រដ្ឋបាលស្រុកបានស្ថាបនាផ្លូវបេតុងថ្មី ព្រោះផ្លូវនេះរងការខូតខាតខ្លាំងនិងពិបាកធ្វើដំណើរនាពេលកន្លងមក ជាពិសេសនារដូវវស្សា។

លោកបន្តថា ផ្លូវដែលត្រូវស្ថាបនានេះមានប្រវែង ៦៨០ ម៉ែត្រ ទទឹង ៥ម៉ែត្រ កម្រាស០.១៥ម៉ែត្រ ដោយក្រុមហ៊ុន(HBSD) ដែលបានចំណាយក្នុងគម្រោងអភិវឌ្ឍស្រុក អស់ថវិកាចំនួន ៧៧០ លានរៀល។ លោកបន្ថែមថា ក្រោយពីស្ថាបនាផ្លូវនេះរួចរាល់ លោករំពឹងថាអាចលើកស្ទួយជីវភាពរស់នៅដល់ប្រជាពលរដ្ឋក្នុងមូលដ្ឋាន និងបង្កើនគុណភាពនៅពេលបើកបរប្រកបដោយសុវត្ថិភាព ក៏ដូចជាងាយស្រួលដឹកជញ្ជូនកសិផលផ្សេងៗរបស់កសិករ។

អភិបាលរងរូបនេះបញ្ជាក់ថា ការស្ថាបនាផ្លូវនេះ គឺជាការឆ្លើយតបតាមគោលការណ៍របស់រាជរដ្ឋាភិបាលដែលបានជំរុញការអភិវឌ្ឍផ្លូវលំជនបទដោយប្រែក្លាយពីផ្លូវដី មកជាផ្លូវក្រាលក្រួសក្រហម ពីក្រួសក្រហមមកជាផ្លូវក្រាលថ្មមិច ហើយពីថ្មមិច មកជាផ្លូវក្រាលកៅស៊ូ បេតុងជាដើម សម្រាប់ការប្រើប្រាស់បានយូរអង្វែងតរទៅថ្ងៃអនាគត៕

អត្ថបទ៖ រៀម សុខហេង