កម្ពុជា-តួគីយ៉េ ចុះហត្ថលេខាលើកកម្ពស់កិច្ចសហប្រតិបត្តិការលើវិស័យអាទិភាពជាង១០

កម្ពុជា-តួគីយ៉េ បានចុះហត្ថលេខាលើកំណត់ហេតុរួមដើម្បីលើកកម្ពស់កិច្ចសហប្រតិបត្តិការលើវិស័យពាក់ព័ន្ធ និងអនុវិស័យអាទិភាពមួយចំនួនរួមមាន ពាណិជ្ជកម្ម កសិកម្ម អាកាសចរណ៍ស៊ីវិល ការដឹកជញ្ជូន ការអប់រំ សុខាភិបាល វិនិយោគ ឧស្សាហកម្ម ទេសចរណ៍ កិច្ចសហប្រតិបត្តិការស្តង់ដារហាឡាល់ វិទ្យាសាស្ត្រ និងបច្ចេកវិទ្យា ធនធានទឹក ការងារ និងសន្តិសុខសង្គម រ៉ែ និងថាមពល និងការពង្រឹងសិទ្ធិអំណាចរបស់ស្ត្រី ព្រមទាំងវិស័យពាក់ព័ន្ធផ្សេងៗទៀត ក្នុងគោលបំណងពង្រឹងភាពជាដៃគូបន្ថែមទៀត និងលើកកម្ពស់ផលប្រយោជន៍ទៅវិញទៅមកសម្រាប់ប្រទេសទាំងពីរ។

ពិធីចុះហត្ថលេខានេះធ្វើឡើងកាលពីថ្ងៃទី៤ ខែវិច្ឆិកា ឆ្នាំ ២០២៥ នាឱកាសលោកស្រី ជ្រឹង បុទុមរង្សី រដ្ឋលេខាធិការក្រសួងការបរទេស បានអញ្ជើញចូលរួមកិច្ចប្រជុំលើកទី៤ នៃ គណៈកម្មការសេដ្ឋកិច្ចចម្រុះកម្ពុជា-តួគីយ៉េ  ក្រោមអធិបតីភាពសហប្រធាន លោកស្រី ចម និមល រដ្ឋមន្ត្រីក្រសួងពាណិជ្ជកម្ម  និងលោក İbrahim Yumaklı រដ្ឋមន្ត្រីក្រសួងកសិកម្ម និងរុក្ខាប្រមាញ់នៃសាធារណរដ្ឋតួកគីយ៉េ នៅរដ្ឋធានីអង់ការ៉ា ប្រទេសតួគីយ៉េ។

គួរជម្រាបថា នៅក្នុងជំនួបរវាងលោក ហួត ហាក់ រដ្ឋមន្ត្រីក្រសួងទេសចរណ៍ និងលោកស្រី Suayb Ozhan Turkish អ្នកចាត់ការទូទៅរបស់ក្រុមហ៊ុនអាកាសចរណ៍តួគីប្រចាំនៅប្រទេសកម្ពុជា ថៃ ឡាវ មីយ៉ាន់ម៉ា កាលពីខែកុម្ភៈភាគីទាំងពីរបានឯកភាពជំរុញឱ្យមានការតភ្ជាប់ជើងហោះហើរត្រង់ ដើម្បីសម្រួលដល់ការធ្វើដមណើររបស់ប្រជាជន និងបំពេញតម្រូវការភ្ញៀវទេសចររវាងប្រទេសទាំងពីរ។ លើសពីនេះ ថ្នាក់ដឹកនាំនៃប្រទេសទាំងពីរ ក៏បានឯកភាពគ្នាជំរុញកិច្ចសហប្រតិបត្តិការលើគ្រប់វិស័យ និងការវិនិយោគផងដែរ៕