អាជ្ញាធររាជធានី ព្រមានបិទឃ្លាំងលក់រថយន្តទាំងអស់

ភ្នំពេញ៖ អាជ្ញាធររាជធានីភ្នំពេញ បានធ្វើការព្រមានចុះបិទឃ្លាំងលក់រថយន្តទាំងអស់នៅក្នុងរាជធានីភ្នំពេញ បើម្ចាស់ឃ្លាំងទាំងនោះនៅតែបំពាន បន្តបើកអាជីវកម្មរបស់ខ្លួន ដោយមិនព្រមស្តាប់តាមការណែនាំរបស់អាជ្ញាធរ ដើម្បីចូលរួមទប់ស្កាត់ការឆ្លងជំងឺកូវីដ-១៩ ខណៈដែលជម្ងឺនេះកាន់តែរីករាលដាលខ្លាំងឡើង។

នៅព្រឹកថ្ងៃទី១៥ ខែមេសា ឆ្នាំ២០២១ រដ្ឋបាលរាជធានភ្នំពេញបានផ្ញើសារព្រមានមួយ ទៅកាន់ម្ចាស់ឃ្លាំងរថយន្ត សូមបញ្ឈប់អាជីវកម្មជាបន្ទាន់ បើមិនចង់ប្រឈមនឹងការចុះបិទអាជីវកម្ម។

ការព្រមានចំៗទៅដល់កន្លែងលក់រថយន្តខាងលើនេះ បានកើតឡើង ក្រោយមានព័ត៌មានថា ឃ្លាំងលក់រថយន្តខ្លះនៅតែបំពាន ហើយនៅបន្តលក់រថយន្តដោយមិនចូលរួមទប់ស្កាត់ជាមួយរាជរដ្ឋាភិបាល និងសាលារាជធានីភ្នំពេញនោះឡើយ។

សូមបញ្ជាក់ថា រាជរដ្ឋាភិបាលកម្ពុជា នៅយប់ថ្ងៃទី១៤ ខែមេសា ឆ្នាំ២០២១ បានចេញសេចក្តីសម្រេចពិសេសបន្ទាន់មួយ ដោយប្រកាសបិទរាជធានីភ្នំពេញទាំងស្រុង និងក្រុងតាខ្មៅរយៈពេល១៤ថ្ងៃ ចាប់ពីវេលាម៉ោង ០០និង០០នាទី​ឈានចូលថ្ងៃទី១៥ ដល់ថ្ងៃទី២៨ ខែមេសា ឆ្នាំ២០២១ ដើម្បីទប់ស្កាត់ការរីករាលដាលជំងឺកូវីដ-១៩ ដែលកំពុងមានការកើនឡើងខ្លាំង ។ ការដាក់ចេញវិធានការនេះ គឺបានហាមឃាត់ប្រជាពលរដ្ឋមិនឱ្យចេញពីផ្ទះ និងបិទអាជីវកម្មនានា​ដែល​មិន​ចាំបាច់។ ទោះបីយ៉ាងណា វិធានការបានអនុញ្ញាតសម្រាប់ការធ្វើដំណើរចាំបាច់ដូចជាការទៅមន្ទីរពេទ្យ និងការទិញម្ហូបអាហារជាដើម។ ដោយឡែកអាជីវកម្មចាំបាច់មួយចំនួន ក៏ត្រូវបានរក្សាទុកផងដែរ ជាពិសេសអាជីវកម្មពាក់ព័ន្ធការលក់ដូរ ឬផ្គត់ផ្គង់ស្បៀងអាហារ៕

អត្ថបទ៖ ស្រីរ័ត្ន