មន្រ្តី​ខណ្ឌមានជ័យម្នាក់ឆ្លង​កូវីដ​១៩ ពាក់ព័ន្ធ​អធិការរង​ជា​ច្រើន​នាក់ទៀត

ភ្នំពេញ៖ លោកអនុសេនីយ៍ឯក ស៊ឹម ប៊ុនធឿន ឋានៈនាយរងផ្នែកអន្តរាគមន៍នៃអធិការដ្ឋាននគរបាលខណ្ឌមានជ័យបានឆ្លងជំងឺកូវីដ១៩ និងពាក់ព័ន្ធមន្ត្រីនគរបាលចំនួន ១៥ នាក់​ទៀត។

លោក វរសេនីយ៍ទោ កាំង ដារ៉ាវុធ អធិការរងនគរបាលខណ្ឌមានជ័យប្រាប់​នៅរសៀលថ្ងៃទី២០មេសានេះថា លោកអនុសេនីយ៍ឯក ស៊ឹម ប៊ុនធឿន ត្រូវបានរកឃើញវិជ្ជមានកូវីដ១៩នៅថ្ងៃទី១៩ ដែលលទ្ធផលបង្ហាញនៅថ្ងៃនេះ។

លោកបានបន្តថា មានមន្ត្រីដែលពាក់ព័ន្ធផ្ទាល់ និងប្រយោល ជាមួយលោកអនុសេនីយ៍ឯក ស៊ឹម ប៊ុនធឿនសរុបចំនួន១៥នាក់ ក្នុងនោះមានអធិការរងចំនួន៥នាក់រួមទាំងរូបលោក នាយកប៉ិ៍ស្តីទីចំនួន១នាក់ នាយរងប៉ិ៍ស្តចំនួន៣នាក់និងមន្ត្រីចំនួន៦នាក់។

បើ​តាមលោកអធិការរងខណ្ឌ កាលធ្វើតេស្តតាមរយៈឧបករណ៍តេស្តលឿនរហ័ស​ព្រឹកមិញនេះ​ មន្រ្តី​ពាក់ព័ន្ធ​ផ្សេង​ទៀត​លទ្ធផលអវិជ្ជមានទាំងអស់ និងរង់ចាំការធ្វើតេស្តជាលើកទី២បន្តទៀត ហើយ​អ្នកដែលពាក់ព័ន្ធត្រូវបានធ្វើចត្តាឡីស័កនៅតាមផ្ទះរៀងៗខ្លួន៕

អត្ថបទ៖ សំអឿន