ច្រើនបំផុតករណីស្លាប់មនុស្សប្រុសស្រី ៥ នាក់ដោយសារជំងឺកូវីដ១៩

ក្រសួងសុខាភិបាលកម្ពុជា បានប្រកាសមុននេះថា មនុស្សប្រុសស្រីចំនួន ៥នាក់បានស្លាប់ដោយសារជំងឺកូវីដ១៩។

អ្នកទាំង៥នោះរួមមាន៖

១. បុរសជនជាតិខ្មែរ អាយុ ៣៣ឆ្នាំ រស់នៅសង្កាត់ដង្កោ ខណ្ឌដង្កោ រាជធានីភ្នំពេញ បានចូលសម្រាកនៅមន្ទីរពេទ្យនៅថ្ងៃទី ០៨ ខែមេសា ហើយបានស្លាប់បាត់បង់ជីវិតដោយសារវិបត្តិផ្លូវដង្ហើមស្រួចស្រាវធ្ងន់ធ្ងរ និងរលាកសួតទាំងសងខាងដោយសារវិរុសកូវីដ១៩។

២. ស្ត្រីជនជាតិខ្មែរអាយុ ៦៦ឆ្នាំ រស់នៅខេត្តព្រះសីហនុ ចូលមន្ទីរពេទ្យនៅថ្ងៃទី ១៩ ខែមេសា វេលាម៉ោង ១៨៖៣០ នាទីស្ថិតក្នុងស្ថានភាពហត់ដង្ហក់ខ្លាំង តម្រូវឱ្យគ្រូពេទ្យសង្គ្រោះបន្ទាន់ និងប្រើម៉ាស៊ីនជំនួយ។

ជាករណីសង្ស័យគ្រូពេទ្យបានយកសំណាកនិងរកឃើញវិជ្ជមានកូវីដ១៩ អ្នកជំងឺបានស្លាប់នៅថ្ងៃទី ២០ ខែមេសាដោយសារស្ថានភាពជំងឺធ្ងន់ធ្ងរ។

៣. បុរសជនជាតិខ្មែរ អាយុ ៦៣ ឆ្នាំ រស់នៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មានជំងឺលើស សម្ពាធឈាម និងទឹកនោមផ្អែមប្រចាំកាយ បុរសរូបនេះបានស្លាប់មុនពេលចូលមកដល់មន្ទីរពេទ្យ ហើយគ្រូពេទ្យធ្វើតេស្តសំណាកឃើញវិជ្ជមានជំងឺកូវីដ១៩ គ្រូពេទ្យសន្និដ្ឋានថាបុរសរូបនេះស្លាប់ដោយសារជំងឺកូវីដ១៩ រួមផ្សំនឹងជំងឺប្រចាំកាយ។

៤. ស្ត្រីជនជាតិខ្មែរ អាយុ៥២ឆ្នាំ រស់នៅសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ បានចូលសម្រាកនៅមន្ទីរពេទ្យនៅថ្ងៃទី ២០ ខែមេសា វេលាម៉ោង៣៖១៥នាទី ក្នុងស្ថានភាពក្តៅខ្លួន និងហត់ខ្លាំង គ្រូពេទ្យធ្វើតេស្តសំណាកឃើញវិជ្ជមានកូវីដ១៩។ អ្នកជំងឺបានស្លាប់នៅម៉ោង ០៦៖០០ ថ្ងៃដដែលដោយសារជំងឺកូវីដ១៩។

៥. ស្ត្រីជនជាតិខ្មែរ អាយុ ៦១ឆ្នាំ រស់នៅស្រុកអង្គស្នួល ខេត្តកណ្តាល បានចូលសម្រាកនៅមន្ទីរពេទ្យនៅថ្ងៃទី​១២ ខែមេសា ក្នុងស្ថានភាពក្តៅខ្លួន និងហត់ខ្លាំង ហើយបានស្លាប់នៅថ្ងៃទី ២០ ខែមេសា វេលាម៉ោង ១៧៖៥០ នាទី ដោយសារជំងឺកូវីដ១៩ រួមផ្សំនិងជំងឺទឹកនោមផ្អែមប្រចាំកាយ៕

អត្ថបទ៖ ឡេង ដេត