លើកដំបូ​ងរកឃើញជនជាតិ​ឥណ្ឌូណេស៊ី ឆ្លងកូវីដច្រើន​បំផុត​​នៅ​ប្រទេស​កម្ពុជា​

តាម​ព័ត៌មាន​របស់​ក្រសួង​សុខាភិបាល​នៅ​ថ្ងៃនេះ មានជនជាតិ​ឥណ្ឌូណេស៊ី ៦៩ នាក់​បាន​ឆ្លង​កូវីដ ១៩ ក្នុងរយៈ​ពេល ២៤ ម៉ោង​នេះ។ នេះជាករណី​ឆ្លង​​ដ៏ច្រើន​បំផុត​លើ​សហគមន៍​ជនជាតិ​ឥណ្ឌូណេស៊ី​ ដែល​មក​រស់នៅ​​ប្រកប​របរ​នៅក្នុង​ប្រទេស​កម្ពុជា។

មាន​សហគមន៍​ជនជាតិឥណ្ឌូណេស៊ី​កំពុង​​រស់នៅប្រទេសកម្ពុជា ហើយ​មួយ​ចំនួន​បានទៅធ្វើការ​​នៅ​ទីក្រុងប៉ោយប៉ែត ជា​ទីប្រជុំជន​ដ៏ធំ​ជាប់ព្រំដែនថៃ។

​កាលពីថ្ងៃទី២១ខែមេសាឆ្នាំ២០២១ អាជ្ញាធរ​ក្រុង​ប៉ោយប៉ែត​បាន​រកឃើញ​បុរសជនជាតិឥណ្ឌូនេស៊ីម្នាក់ឈ្មោះ​ជូហាន សូសាន់តូ ស្នាក់នៅ ក្នុងបុរីដួងច័ន្ទ ឆ្លងកូវីដ ១៩។ អាជ្ញាធរបានសម្រេចបិទខ្ទប់បុរីដួងច័ន្ទស្ថិត​នៅក្នុងភូមិសាមគ្គីមានជ័យ សង្កាត់ប៉ោយប៉ែតក្រុងប៉ោយប៉ែតខេត្តបន្ទាយមានជ័យជាបណ្តោះអាសន្នក្រោយរកឃើញមនុស្ស៣នាក់ឆ្លងកូវីដ១៩ និងរកឃើញអ្នកជាប់ពាក់ព័ន្ធ៧០នាក់ផ្សេងទៀត។

រដ្ឋបាលខេត្តបន្ទាយមានជ័យបានប្រកាស​បិទ​បណ្ដោះអាសន្ននៅក្នុងភូមិសាស្ត្រក្រុងប៉ោយប៉ែត ខេត្តបន្ទាយមានជ័យរយៈពេល២សប្ដាហ៍ គិតចាប់ពីម៉ោងសូន្យថ្ងៃទី២៦ខែមេសា រហូតដល់ថ្ងៃទី៩ខែឧសភាឆ្នាំ២០២១ដើម្បីទប់ស្កាត់ការឆ្លងរាលដាលជំងឺកូវីដ១៩៕