អាជ្ញាធរខណ្ឌព្រែកព្នៅផ្អាកទីតាំងបែងចែកផលនេសាទ១៤ថ្ងៃ

អាជ្ញាធរខណ្ឌព្រែកព្នៅបានសម្រេចផ្អាកដំណើរការទីតាំងបែងចែកផលនេសាទត្រី (យឿត្រី) ដែលស្ថិតនៅភូមិពោធិមង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ រយៈពេល១៤ថ្ងៃជាបណ្តោះអាសន្ន ដើម្បីទប់ស្កាត់ការឆ្លងរាលដាលជំងឺកូវីដ-១៩។

តាមសេចក្តីជួនដំណឹងរបស់រដ្ឋបាលខណ្ឌព្រែកព្នៅ ចុះថ្ងៃទី២៦ ខែមេសានេះ បានឱ្យដឹងថា ការបិទទីតាំងយឿត្រីនេះដោយសារស្ថានភាពនៃការរាលដាលនៃជំងឺកូវីដ-១៩​ ក្នុងរយៈពេលប៉ុន្មានថ្ងៃនេះមានអាជីវករ និងប្រជាពលរដ្ឋបានឆ្លងវីរុសកូវីដ-១៩ ក្នុងសហគមន៍ ២០កុម្ភៈ ដែលស្ថានភាពនេះបានឆ្លងរាលដាលយ៉ាងឆាប់រហ័សគួរឱ្យព្រួយបារម្ភ និងចាំបាច់ត្រូវមានវិធានការសុខាភិបាលទប់ស្កាត់ជាបន្ទាន់។

រដ្ឋបាលខណ្ឌបានបន្តថា ចំពោះមុខរដ្ឋបាលខណ្ឌសុំផ្អាកដំណើរការជាបណ្ដោះអាសន្នទីតាំងយឿត្រីនេះ រយៈពេល១៤ថ្ងៃដោយគិតចាប់ពីថ្ងៃទី២៦ ខែមេសា ដល់ថ្ងៃទី០៩ ខែឧសភា ឆ្នាំ២០២១ ដើម្បីបង្ការ និងទប់ស្កាត់ការឆ្លងរីករាលដាលជំងឺកូវីដ-១៩ ដល់អាជីវករ អតិថិជន ក៏ដូចជាបងប្អូនប្រជាពលរដ្ឋដែលចេញចូលក្នុងទីតាំងយឿត្រីខាងលើ។

រដ្ឋបាលខណ្ឌព្រែកព្នៅសូមអំពាវនាវដល់អាជីវករចេញចូលនៅក្នុងទីតាំងយឿត្រីខាងលើសូមមានការយល់អធ្យាស្រ័យ និងចូលរួមអនុវត្តតាមសេចក្តីជួនដំណឹងនេះឱ្យមានប្រសិទ្ធភាព។ ក្នុងករណីមិនសហការ គណៈបញ្ជាការឯកភាពខណ្ឌនឹងអនុវត្តទៅតាមច្បាប់ជាធរមាន៕

អត្ថបទ៖ សំអឿន