ព័ត៌មានជាតិ

រដ្ឋសភារៀបចំ «សភាត្រាប់» ជាលើកដំបូងណែនាំយុវជនឱ្យបានស្គាល់ពីដំណើរការសភានិងការតស៊ូមតិនយោបាយ

បានផុស

២ ខែ មុន

នៅ

ថ្ងៃអង្គារ ២១ មេសា ២០២៦

ដោយ

រដ្ឋសភាកម្ពុជាបានរៀបចំសភាត្រាប់ជាលើកដំបូងក្នុងប្រវត្តិសាស្ត្ររបស់ខ្លួន ដើម្បីបណ្ដុះសមត្ថភាព ស្មារតី និងមនសិការដល់យុវជន ជាពិសេសក្មេងស្រីឱ្យស្វែងយល់ហ្វឹកហាត់ការងារតស៊ូមតិបែបនយោបាយ។ កម្មវិធីសភាត្រាប់នេះមានរយៈពេល១ថ្ងៃកន្លះដែលរៀបចំនៅអាគាររដ្ឋបាលវិមានរដ្ឋសភាភ្នំពេញ ដែលមានយុវជនចូលរួមប្រមាណ៨០នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានក្រុមសភាជាតិកម្ពុជានៃអ្នកនយោបាយស្ត្រីលោកស្រី ឡោក ខេង បានថ្លែងក្នុងពិធីបើកនៅព្រឹកថ្ងៃទី២១ ខែមេសា ឆ្នាំ២០២៦នេះ ថា សភាត្រាប់ នេះគឺជាគំនិតផ្ដួចផ្ដើមរបស់គណៈកម្មការទី៨ និងក្រុមសភាជាតិកម្ពុជានៃអ្នកនយោបាយសភាស្ត្រី (ក.ស.ក.ន.ស) ដែលជាគម្រោងបន្តពីយុទ្ធនាការ ក្មេងស្រីឆ្ពោះទៅកាន់ភាពជាអ្នកដឹកនាំ។

លោកស្រីបញ្ជាក់ថា៖ «សភាត្រាប់គឺជាផ្នែកមួយនៃការបណ្ដុះបណ្ដាលសមត្ថភាព ស្មារតី និងមនសិការដល់យុវជន ជាពិសេសក្មេងស្រីឱ្យពួកគាត់ខិតខំស្វែងយល់ហ្វឹកហាត់ការងារតស៊ូមតីបែបនយោបាយ។ ក្នុងអំឡុងនៃកម្មវិធី ក្មួយៗនឹងទទួលបានការបណ្ដុះបណ្ដាលមូលដ្ឋានដែលចាំបាច់ដើម្បីអាចធ្វើត្រាប់ការប្រជុំសភាដោយពេញលេញបាន»។

កម្មវិធីសភាត្រាប់នេះទទួលបានការគាំទ្រដោយ UN Women និង UNFPA ដែលផ្ដល់ការគាំទ្រស្មារតី បច្ចេកទេស និងហិរញ្ញវត្ថុសម្រាប់ដំណើរការកម្មវិធីនេះ។ អ្នកសម្របសម្រួលអង្គការសហប្រជាជាតិប្រចាំកម្ពូជាលោកស្រី Vladanka Andreeva បានលើកឡើងផងដែរថា គំនិតផ្ដួចផ្ដើមនេះមានសារៈសំខាន់ដើម្បីជំរុញស្ត្រីក្នុងវិស័យនយោបាយ ដែលជាការវិនិយោគដ៏សំខាន់សម្រាប់អនាគតប្រទេសកម្ពុជា។

លោកស្រីថា៖ «នេះគឺមិនត្រឹមតែជាព្រឹត្តិការណ៍មួយទេ វាគឺជាបទពិសោធន៍នៃការសិក្សាស៊ីជម្រៅមួយ។ នៅទីនេះយើងមានយុវជនប្រមាណ៨០នាក់ក្នុងបន្ទប់នេះ ក្នុងនោះមាន៦៥នាក់គឺជាយុវតីដែលមកពីទូទាំងប្រទេសកម្ពុជាដើម្បីចូលរួមជាមួយអ្នកទាំងអស់គ្នាដែលជាសមាជិកសភា និងថ្នាក់ដឹកនេះ»។

អនុប្រធានទី២ រដ្ឋសភា លោក វង សូត បានថ្លែងផងដែរថាព្រឹត្តិការណ៍នេះគឺជាលើកដំបូងគេដែលពុំធ្លាប់បានរៀបចំតាំងពីនីតិកាលទី១រហូតមកដល់ពេលនេះ ដោយលោកសង្ឃឹមថានឹងមានព្រឹត្តិការណ៍បែបនេះជាបន្តបន្ទាប់ទៀតផងដែរ។

លោកបានបន្ថែមថា៖ «កម្មវិធីសភាត្រាប់នេះ លើសពីការធ្វើត្រាមសម័យប្រជុំសភាទៅទៀត។ កម្មវិធីនេះ គឺជាស្ពានដ៏មានអត្ថន័យ រវាងអ្នកដឹកនាំជំនាន់បច្ចុប្បន្ន និងអ្នកដឹកនាំនាពេលអនាគត ដែលនឹងក្លាយជាអ្នករៀបចំគោលនយោបាយ និងអភិបាលកិច្ចរបស់ប្រទេសជាតិយើង»។

កម្មវិធីសភាត្រាប់នេះនឹងរៀបចំឡើងរយៈពេល១ថ្ងៃកន្លះនៅវិមានរដ្ឋសភាកម្ពុជា ដោយមានកម្មវិធីអមជាច្រើនដើម្បីណែនាំឱ្យយុវជនបានស្គាល់ពីដំណើរការសភា បទបញ្ជាផ្ទៃក្នុង បែបបទរដ្ឋបាល រចនាសម្ព័ន្ធសភា ទស្សនកិច្ចសាលពិព័ណ៌ សាលប្រជុំពេញអង្គសភា ស្វែងយល់ពីដំណើរការកសាងច្បាប់ និងដើរតួរជាសមាជិកសភា តំណាងរាជរដ្ឋាភិបាល ដើម្បីពិភាក្សានិងអនុម័តលើសេចក្ដីព្រាងច្បាប់ផងដែរ។

យុវជនមកពីខេត្តព្រះសីហនុលោក ផេង វណ្ណរិន អាយុ២៣ឆ្នាំសិក្សាផ្នែកឆ្នៃម៉ូតនៅសាលាមួយក្នុងរាជធានីភ្នំពេញ ដែលបានចូលរួមកម្មវិធីនេះបានបង្ហាញការយល់ឃើញថាកម្មវិធីសភាត្រាប់គឺជាផ្នែកមួយដ៏សំខាន់ក្នុងការណែនាំ និងបង្ហាញពីការងាររបស់ស្ថាប័នសភាដល់យុវជន។ លោកថានេះជាលើកទីមួយដែលបានមកឃើញនិងស្គាល់ផ្ទាល់ក្នុងស្ថាប័នដ៏សំខាន់របស់ជាតិមួយនេះ។

លោកសង្ឃឹមថានាពេលអនាគតយុវជនកម្ពុជានឹងទទួលបានឱកាសកាន់តែទូលំទូលាយដើម្បីចូលរួមជីវភាពជាអ្នកតំណាងរាស្ត្រ។

លោកថា៖ «ប្រសិនបើកឱកាសទូលំទូលាយ ហើយយុវជនដែលពួកគាត់មានសមត្ថភាពគាត់អាចបង្ហាញខ្លួនពួកគាត់ទៅកាន់ផ្នែកមួយនៃសង្គមខ្ញុំជឿថាឱកាសនោះគួរតែឱ្យពួកគាត់ក្នុងការដែលក្លាយខ្លួនជាយុវជនថ្មី ជាផ្នែកមួយនៃអ្នកជំនាន់ក្រោយដែលអាចផ្សព្វផ្សាយនឹងពាំនាំសំឡេងពួកគាត់ឱ្យកាន់តែទូលំទូលាយជាងនេះ»។

គួរឱ្យដឹងផងដែរថា កម្មវិធីសភាត្រាប់នេះត្រូវបានធ្វើបន្តពីគម្រោង ក្មេងស្រីឆ្ពោះទៅកាន់ភាពជាអ្នកដឹកនាំ #Girls2leader ដែលសភាកម្ពុជាបានចុះមូលដ្ឋានជួបជាមួយក្មេងស្រីចែករំលែកបទពិសោធន៍របស់សមាជិការដ្ឋសភា សមាជិកាក្រុមប្រឹក្សាមូលដ្ឋាន ក៏ដូចជាថ្នាក់ដឹកនាំស្ត្រីផ្សេងទៀត ដើម្បីបណ្ដុះក្ដីសុបិន្ត ឈោងចាប់អាជីពនយោបាយ៕

អត្ថបទដោយ ហ៊ុន សិរីវឌ្ឍន៍

Related Topics:រដ្ឋសភា លោក វង សូត យុវជនកម្ពុជា

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា