មន្ទី​រសេដ្ឋកិច្ច​ខេត្ត​តាកែវ ប្រ​គល់​អំណោយ​ជូន​រដ្ឋបាល​ខេត្ត​ទុក​ចែកជូន​ពលរដ្ឋ​ខ្វះខាត​​

​ព្រឹក​ថ្ងៃទី​២៩ ខែមេសា ឆ្នាំ​២០២១ លោក ហោ បុ​ណ្ណ​វ​ឌ្ឍ ប្រ​ធាន​មន្ទីរ​សេដ្ឋកិច្ច​និង​ហិរញ្ញវត្ថុ​ខេត្តតា​កែវ បាន​នាំយក​អំណោយ​មួយចំនួន​ជូន​រដ្ឋបាលខេត្ត​ដើ​ម្បី​ទុក​ប្រ​គល់​ដល់​ពល​រដ្ឋ​ខ្វះ​ខាត់​ក្នុង​មូល​ដ្ឋាន​។

ក្នុងឱកាស​ទទួល​អំណោយ​នោះ​ផងដែរ លោក អ៊ូច ភា អភិបាល​ខេត្តតាកែវ បាន​មានប្រសាសន៍​ថ្លែងអំណរគុណ​ចំពោះ​លោក​ប្រធាន​មន្ទីរ និង​សហការី ដែល​បាន​នាំយក​អំណោយ​មក​ផ្តល់ជូន​ដល់​រដ្ឋបាលខេត្ត ដើម្បី​ចាត់ចែង​​បន្ត​ទៅដល់​បងប្អូន​ប្រជាពលរដ្ឋ​ដែលមាន​ជីវភាព​ខ្វះខាត និង​ពលរដ្ឋ​កំពុងតែ​ធ្វើ​ច​ត្តា​ឡី​ស័ក​តាម​មណ្ឌល​ច​ត្តា​ឡី​ស័ក ហើយ​តាមរយៈ​សកម្មភាព​នេះ គឺជា​ការចែករំលែក​និង​ចេះ​ជួយ​គ្នា​ក្នុង​គ្រា​លំបាក ។

លោក​អភិបាល​ក៏បាន​ជូនពរ​ទៅដល់​លោក​ប្រធាន​មន្ទីរ និង​សហការី​ទាំងអស់ សូម​ទទួលបាន​នូវ​សុខ​ភាពល្អ ទទួលបាន​ជោគជ័យ​គ្រប់​ភារកិច្ច​ការងារ និង​ជៀស​ផុតពី​ជំងឺឆ្លង​ចង្រៃ​។

សូមបញ្ជាក់ថា អំណោយ​ដែល​ប្រ​គល់​ជូន​រដ្ឋបាលខេត្ត​នាពេលនោះ​មាន មី​ចំនួន​៥០​កេស ទឹក​បរិសុទ្ធ៥០​កេស ទឹក​ស៊ី​អ៊ី​វ​២៥​យួរ និង​ទឹកត្រី​២៥​យួរ​ផងដែរ​៕​

អត្ថបទ ៖ វីរៈ​