ឈ្លោះ​គ្នា​រាល់ថ្ងៃ ឈាន​​ទៅ​ដុតសម្លាប់ប្រពន្ធ ជជីកសួរ​ថា​មកពី​ប្រពន្ធញៀនល្បែង

សៀមរាប៖ នៅទីបំផុតកម្លាំងនគរបាលជំនាញខេត្តសៀមរាបនិងនគរបាលស្រុកស្វាយលើ បានបំបែកករណី​ដុតសម្លាប់មនុស្សចោលនៅក្នុងព្រៃកាលពី៣ថ្ងៃមុនបានហើយ តាមពិតឃាតកគឺជាប្តីរបស់ស្ត្រីរងគ្រោះសោះ។

ហេតុការណ៍ឃាត់ខ្លួននេះធ្វើឡើងនៅវេលាម៉ោង១និង០០នាទីថ្ងៃទី០១ខែឧសភាឆ្នាំ២០២១លំនៅភូមិខ្នារក្រៅ(ត្រពាំងត្បាល់ ) ឃុំកន្ទួត ស្រុកស្វាយលើ ខេត្តសៀមរាប។

លោកឧត្តមសេនីយ៍ត្រី ភឹង​ចិន្តារ៉េត ស្នងការរងទទួលផែនកណ្តាលព្រហ្មទណ្ឌនៃស្នងការដ្ឋាននគរបាលខេត្តសៀមរាប បានមានប្រសាសន៍ថា​ កម្លាំងនគរបាលជំនាញព្រហ្មខេត្តសៀមរាបនិងនគរបាលស្រុកស្វាយលើ បានសហការគ្នាស្រាវជ្រាវរហូតដល់៣ថ្ងៃ ទើបបំបែកសំណុំរឿងនេះបានដោយជោគជ័យ។

លោកបន្តថា កម្លាំងនគរបាលបាន​ឃាត់ខ្លួនជនសង្ស័យឈ្មោះ អេង អឿន ភេទប្រុស អាយុ៥២ឆ្នាំ មានទីលំនៅភូមិខ្នារក្រៅ(ត្រពាំងត្បាល់ ) ឃុំកន្ទួត ស្រុកស្វាយលើ ខេត្តសៀមរាប(ត្រូវជាប្ដី) ដែលពាក់ពន្ធ័ករណីឃាតកម្មប្រព្រឹត្ត កាលពីថ្ងៃទី២៧ខែមេសាឆ្នាំ២០២១វេលាម៉ោង១១និង១០នាទី នៅចំណុចផ្ទះរបស់ខ្លួន ទៅលើជនរងគ្រោះឈ្មោះ លី កុលាប (ត្រូវជាប្រពន្ធ) អាយុ៣៦ឆ្នាំរស់នៅភូមិឃុំខាងលើ។

លោកបន្ថែមថា នៅវេលាម៉ោង០៨និង០០នាទី ថ្ងៃទី៣០មេសាឆ្នាំ២០២១ជនសង្ស័យឈ្មោះ អេង អឿន ភេទប្រុស អាយុ ៥២ឆ្នាំ បានមករាយការណ៍ប្រាប់សមត្ថកិច្ចប៉ុស្តិ៍នគរបាលថា បាត់ប្រពន្ធកាលពីថ្ងៃទី២៧ មិនដឹងទៅណាមូលហេតុពួកគាត់ឈ្លោះពាក្យសម្តីគ្នា។ 

ក្រោយទទួលព័ត៌មាន ប៉ុស្តិ៍នគរបាលរដ្ឋបាល បានសហការជាមួយនឹងប្រជាការពារភូមិនិងប្រជាពលរដ្ឋ ជួយរកឈ្មោះ លី កូលាប ដែលបានបាត់ខ្លួន។ នៅវេលាម៉ោង១០និង៣០នាទីថ្ងៃដដែល ប្រជាការពារភូមិបានរុករកនៅដីចំការរបស់​ជនសង្ស័យ​ស្ថិតនៅខាងក្រោយវិហារព្រះយេស៊ូ ភូមិត្រពាំងពពេល ឃុំតាសៀមស្រុកស្វាយលើ ខេត្តសៀមរាប ក៏បានឃើញសាកសពមនុស្សត្រូវបានភ្លើងឆេះសល់តែឆ្អឹងក្នុងព្រៃល្បាស់ចំណុចខាងលើ។

ដោយហេតុនេះកម្លាំងជំនាញនៃអធិការដ្ឋានសហការជាមួយប៉ុស្តិ៍រដ្ឋបាលកន្ទួត និងប៉ុស្តិ៍រដ្ឋបាលតាសៀម ចុះដល់កន្លែងសាកសព​ដែលត្រូវភ្លើងឆេះ ដើម្បីស្រាវជ្រាវនិងប្រមូលព័ត៌មាន។ ក្រោយពីមានការឆ្លងយោបល់ពីការិយាលយ័ព្រហ្មទណ្ឌកំរិតធ្ងន់ ជនសង្ស័យ​ឈ្មោះ អេង អឿន ​ត្រូវ​បាន​នាំ​ខ្លួនមកសាកសួរនៅអធិការដ្ឋាននិង​បានសារភាពថាពិតជាបានសម្លាប់ប្រពន្ធពិតប្រាកដមែន។

ជនសង្ស័យ​ប្រាប់​មូលហេតុឈានដល់ការសម្លាប់ប្រពន្ធ ដោយសារ​មានជម្លោះអំពើហិង្សាក្នុងគ្រូសារយូរមកហើយ ដោយគាត់អង្វរប្រពន្ធមិនឲ្យលេងល្បែង បែរជាប្រពន្ធនិយាយថាស៊ូលែងលះប្តីឲ្យតែបានលេងល្បែង។ នៅថ្ងៃទី២៧ខែមេសា ពួកគាត់បានឈ្លោះគ្នាអំពីរឿងប្រពន្ធ រកលក់ដីតែគាត់មិន​ឲ្យ​លក់ព្រោះខ្លាចយកប្រាក់ទៅលេងល្បែង ក៏ឈ្លោះប្រកែកគ្នា ប្រពន្ធបានយកដំបងឈើមកវាយ ហើយគាត់ចាប់ច្រានផ្ដូលហើយយកដៃសង្កត់ក មុនដំបូងសង្កត់តែដៃម្ខាងទេ ដោយប្រពន្ធរើបំរាស់រកវាយគាត់ទៀត គាត់ក៏សង្កត់ច្របាច់ក ដោយដៃទាំងពីរផ្ងាពោះរហូតដល់ដាច់ខ្យល់ស្លាប់។

ពេលស្លាប់ហើយ គាត់អូសសពទៅដាក់ក្បែរទ្រុងជ្រូក ហើយគ្របកៅស៊ូតង់ពណ៌ខៀវពីលើមិនឲ្យ​អ្នកណាដឹង ដោយ​ទុកសាកសពចំនួនពីរយប់គឺយប់ថ្ងៃទី២៧និង២៨មេសា២០២១ លុះដល់វេលាម៉ោង០៤,០០នាទីទៀបភ្លឺ ថ្ងៃទី២៩ខែមេសា គាត់ដឹកសាកសព និងគោយន្តកន្រ្តៃយកទៅដុតចោលនៅចំនុចខាងលើដោយមានគំនរអុសនិងប្រេងម៉ាស៊ូតពេលដុតរួចគាត់ត្រឡប់មកផ្ទះវិញមិនប្រាប់អ្នកណាឡើយ។

បច្ចុប្បន្នកម្លាំងនគរបាលជំនាញកំពុងកសាងសំណុំរឿងបញ្ជូនទៅតុលាការដើម្បីចាត់ការតាមផ្លូវច្បាប់៕

អត្ថបទ៖ កុសល