គ.ជ.ប កំណត់ពេល ​ក្នុង​ការ​ដាក់​​​ពាក្យ​សុំ​ចុះ​ឈ្មោះ​​ភ្នាក់ងារ​គណបក្ស​ និងអ្នកសង្កេតការណ៍​

គណៈកម្មាធិការជាតិរៀបចំការបោះឆ្នោត (គ.ជ.ប) បានបញ្ជាក់​ពីការ​ដាក់ និងការទទួលពាក្យសុំ​​ចុះ​​​ឈ្មោះ​​​​ភ្នាក់ងារ​​​គណបក្ស​នយោបាយ និង​​​​អ្នក​​​​សង្កេត​​​ការ​ណ៍​ជាតិ អន្តរ​​ជាតិ សម្រាប់​ការបោះ​​ឆ្នោត​​លើកទី១ ដើម្បី​​​ជ្រើស​​រើស​​ក្រុម​ប្រឹក្សា​ក្រុង​បូក​គោ ​ខេត្ត​កំពត ​ឆ្នាំ២០២១។ នេះបើ​យោង​តាមលិខិត ចុះ​ថ្ងៃ​ទី០៥ ខែឧសភា ឆ្នាំ២០២១​​។​

បើតាម គ.ជ.ប​ កាលបរិច្ឆេទនៃការដាក់ និងការទទួលពាក្យសុំចុះឈ្មោះភ្នាក់ងារគណបក្សនយោបាយ សម្រាប់ការចុះឈ្មោះបោះឆ្នោត នឹងចាប់ផ្ដើមពីថ្ងៃទី០៤ ដល់ថ្ងៃទី៣០ ខែមិថុនា ឆ្នាំ២០២១។ គណបក្សនយោបាយទាំងអស់ ដែលបានចុះបញ្ជីត្រឹមត្រូវតាមច្បាប់ស្ដីពីគណបក្សនយោបាយមានសិទ្ធិដាក់ភ្នាក់ងាររបស់ខ្លួនចាប់ពី២រូប ដោយពេញសិទ្ធិ១រូប និងបម្រុង១រូប ដើម្បីសង្កេតមើលការចុះឈ្មោះបោះឆ្នោត នៅតាមការិយាល័យចុះឈ្មោះបោះឆ្នោតក្នុងសង្កាត់។

ចំណែកការ​​ដាក់ និងការទទួលពាក្យសុំចុះឈ្មោះភ្នាក់ងារគណបក្សនយោបាយសម្រាប់ការបោះឆ្នោត និងរាប់សន្លឹកឆ្នោត នឹងចាប់ផ្ដើមពីថ្ងៃទី១១ ដល់ថ្ងៃទី១៧ ខែមិថុនាឆ្នាំ ២០២១។

ដោយឡែកកាលបរិច្ឆេទនៃការដាក់ និងការទទួលពាក្យសុំចុះឈ្មោះអ្នកសង្កេតការណ៍ជាតិ នឹង​​ចាប់ផ្ដើមពីថ្ងៃទី​០១ ខែឧសភា ដល់ថ្ងៃទី១៤ ខែកក្កដា ឆ្នាំ២០២១ ហើយការដាក់ និងការទទួលពាក្យសុំចុះឈ្មោះអ្នកសង្កេតការណ៍អន្តរជាតិ ​ចាប់ផ្ដើមពីថ្ងៃទី០១ ខែឧសភា ដល់ថ្ងៃទី២១ ខែកក្កដា ឆ្នាំ២០២១។

សូមបញ្ជាក់ថា សម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត នឹងប្រព្រឹត្តទៅនៅថ្ងៃអាទិត្យ ទី២៥ ខែកក្កដា ឆ្នាំ២០២១ ខាងមុខ ហើយគ្រប់គណបក្សនយោបាយ ដែលបានចុះបញ្ជីត្រឹមត្រូវស្របតាមច្បាប់ស្តីពីគណបក្សនយោបាយនៅក្រសួងមហាផ្ទៃ មានសិទ្ធិចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ បោះឆ្នោតនេះ៕

អត្ថបទ៖ កោះកែវ​